އެމްޑީޕީ ގައުމީ މަޖިލީހުގެ މެމްބަރު އަހްމަދު ސަލީމް (މާޒް ސަލީމް)އަށް މަރުގެ އިންޒާރުދީފި އެވެ.

"ހުރިހާ"އާ ވާހަކަދައްކަވަމުން މާޒް ސަލީމް ވިދާޅުވީ ވަޓްސްއެޕް މެދުވެރިކޮށް މަރުގެ އިންޒާރުދީ އޯޑިއޯ ރެކޯޑިންތަކެއް އޭނާއަށް މީހަކު ރޭ ފޮނުވާފައިވާ ކަމަށެވެ.

ސަލީމް ވިދާޅުވީ އޭނާއަށް މަރުގެ އިންޒާރުދިނީ ބިދޭސީއެއް ކަމަށެވެ. އަދި ރޭ ހެންވޭރު ޕޮލިސް ސްޓޭޝަނަށް ގޮސް އެ މައްސަލަ ހުށަހެޅި ކަމަށާއި ނަމަވެސް ފުލުހުން އެ މައްސަލަ ނުބަލާ ކަމަށް އޭނާ ވިދާޅުވި އެވެ.

މިކަމާ ގުޅޭގޮތުން ނޫސްވެރިއަކު ކުރި ސުވާލެއްގެ ޖަވާބުގައި ފުލުހުންގެ މީޑިއާ އޮފިޝަލް ވިދާޅުވީ ހޯމް މިނިސްޓްރީގެ ކުރީގެ ސްޓޭޓް މިނިސްޓަރަކަށް މަރުގެ އިންޒާރުދިން މައްސަލަ ރޭގެވަގުތެއްގައި ފުލުހުންނަށް ރިޕޯޓްކޮށްފައިވާ ކަމަށެވެ. އަދި އެ މައްސަލައާ ގުޅިގެން ބަލަންޖެހޭ ކަންކަން ބަލަމުން އަންނަ ކަމަށް އޮފިޝަލް ވިދާޅުވި އެވެ.

ފުލުހުން ދިން ޖަވާބާ ގުޅިގެން ސަލީމް ވިދާޅުވީ 24 ގަޑިއިރު ވީއިރުވެސް މައްސަލަ ބަލަން ނުފަށާ އޮތީ އެއީ ބަލަންނުޖެހޭ މައްސަލައެއްވީމަ ކަމަށެވެ.

"ރަނގަޅުވަހަކައެއް ފުލުހުން އެ ވިދާޅުވީ. ބަލަންޖެހޭ މައްސަލައެއް ވެއްޖެއްޔާ ބަލާނީ. އަޅުގަނޑަށް މަރުގެ އިންޒާރުދިން މައްސަލަ އަކީ ބަލަން ނުޖެހޭ ކަމެއްވީމަ 24 ގަޑިއިރު ވެސް ނުބަލާ އޮތީ،" ސަލީމް ވިދާޅުވި އެވެ.

މަރުގެ އިންޒާރުދިން ކަމުގެ ހެއްކާއެކު ފުލުހުންނަށް މައްސަލަ ހުށަހެޅިޔަސް 24 ގަޑިއިރު ވެގެންދިޔައިރު އޭނާގެ ބަޔާނެއް ވެސް ނަގާފައިނުވާ ކަމަށް ސަލީމް ވިދާޅުވި އެވެ.

"މިބާވަތުގެ މައްސަލަތައް ބެލުމުގައި ހަމަޖެހިފައި އޮންނަ އުސޫލަކީ އެންމެ ފުރަތަމަ ވިކްޓިމްގެ ބަޔާނެއް ތަހުގީގަށް ނެގުން. އަޅުގަނޑަކީ ވިކްޓިމް ކަމަށްވާއިރު، މައްސަލަ ފުލުހުންނަށް ހުށަހެޅިތާ 24 ގަޑިއިރު މިވީ. އަޅުގަނޑުގެ ބަޔާނެއް ނުނަގާ އަދި،" ސަލީމް ވިދާޅުވި އެވެ.

ސަލީމް ތުހުމަތު ކުރެއްވިގޮތުގައި ފުލުހުން އޭނާއަކީ އެމްޑީޕީ ގައުމީ މަޖިލީހުގެ މެމްބަރަކަށްވުމުން އެ މައްސަލައަށް މާބޮޑު ސަމާލުކަމެއްދޭން ފުލުހުން ބޭނުމެއްނުވެ އެވެ.