ބޮލީވުޑްގެ މަޝްހޫރު ބައެއް ފަންނާނުންނަށް އަވަށްޓެރި ޕާކިސްތާނުން މަރުގެ އިންޒާރު ދީފައިވާ ކަމަށް އިންޑިއާގެ މީޑިއާތަކުން ބުނެފި އެވެ.

ރިޕޯޓުތައް ބުނާ ގޮތުގައި ބޮލީވުޑްގެ ނަންހިނގާ ހަތަރު ފަންނާނަކަށް ވަނީ އީމެއިލް މެދުވެރިކޮށް މަރުގެ އިންޒާރު ލިބިފަ އެވެ. އޭގެ ތެރޭގައި ހިމެނެނީ ކަޕިލް ޝަރްމާ، ރާޖްޕަލް ޔާދަވް، ރެމޯ ޑިސޫޒާ އަދި ސުގަންދާ މިޝްރާ އެވެ.

އެ ފަންނާނުންނަށް ލިބުނު އީމެއިލްގައި ބުނެފައިވަނީ އެ މީހުންގެ އެންމެ ފަހުގެ ހަރަކާތްތައް ވަރަށް ގާތުން ބަލަމުން އަންނަ ކަމަށާއި މިކަން ލުއިކޮށް ނުނެގުމަށެވެ.

"މިއީ ޕަބްލިސިޓީ ސްޓަންޓެއް ނުވަތަ ފުރައްސާރައެއް ނޫން. މި މެސެޖު ސީރިއަސް ގޮތުގައި ބަލައިގަތުން އެއީ އެންމެ ރަނގަޅު ގޮތް،" ބިޝްނޫގެ ނަމުގައި ފޮނުވި އެ އީމެއިލްގައި ބުނެފައިވެ އެވެ.

ބޮލީވުޑްގެ އެ ތަރިންނަށް މަރުގެ އިންޒާރު ދީފައިވަނީ ކީއްވެގެންކަން އެނގިފައިނުވާއިރު މި މައްސަލަ ވަނީ މުމްބާއީގެ ފުލުހުންނަށް ހުށައަޅާފަ އެވެ.

ކަޕިލްއާއި ރާޖްޕަލް އަދި ސުގަންދާއަކީ ބޮލީވުޑް އަދި ހިންދީ ޓީވީ ދާއިރާގައި މަޝްހޫރު ކޮމީޑިއަނުންނަށް ވާއިރު ރެމޯއަކީ ކުޅަދާނަ ކޮރިއޯގްރާފަރެކެވެ.