ރައީސް ޑރ. މުޙައްމަދު މުއިއްޒުގެ ސަރުކާރުން މިހާރު އުޅެނީ ވޯޓުލެވޭ އުމުރު 21 އަހަރަށް ބަދަލުކުރަން ކަމަށް އެމްޑީޕީގެ ރައީސް އަދި ކުރީގެ ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެ އެވެ.

އެމްޑީޕީން "ފުދިއްޖެ ފުނޑިއްޖެ"ގެ ނަމުގައި ބުރާސްފަތި ދުވަހުގެ ރޭ ބޭއްވި ކަންމަތީ ޖައްސާގައި ވާހަކަ ދައްކަވަމުން ޝާހިދު ވިދާޅުވީ އުމުރުން 18 އަހަރު ފުރިފައިވާ ކޮންމެ ރައްޔިތަކަށް ވޯޓު ލުމުގެ ހައްގު ލިބިފައި ވާކަމަށާއި 18 އަހަރުން މަތީގެ ކޮންމެ ދިވެއްސަކަށް ވެސް މީހަކާ އިނދެވޭ ކަމަށެވެ. އަދި ޖިނާއީ ކުށުގެ ޒިންމާ ވެސް 18 އަހަރުން މަތީގެ ކޮންމެ ދިވެއްސަކު ނަގަން ޖެހޭކަން ފާހަގަކުރައްވައި ޝާހިދު ވިދާޅުވީ 18 އަހަރުން މަތީގެ ކޮންމެ ދިވެއްސަކަށް ވޯޓުލުމުގެ ޙައްގު ހޯދައިދިނީ އެމްޑީޕީން އެތައް ގުރުބާންތަކެއް ވެގެން ކަމަށެވެ.

"އަށާރަ އަހަރުން މަތީގެ ކޮންމެ މީހަކަށް ވޯޓުލުމުގެ ޙައްގަކީ އެމްޑީޕީން ވަކާލާތު ކޮށްގެން އެމްޑީޕީން މަގުމައްޗަށް ނިކުމެގެން އެމްޑީޕީން މުޒާހަރާ ކޮށްގެން ދިވެހި ރައްޔިތުންނަށް ހޯދާދީފައިވާ ޙައްގެއް. މި ސަރުކާރުން މިހާރު އުޅެނީ އެ ހައްގު ނިގުޅައިގަންނަން،" ޝާހިދު ވިދާޅުވި އެވެ.

އަށާރަ އަހަރުން މަތީގެ ކޮންމެ މީހަކަށް ވޯޓުލުމުގެ ޙައްގަކީ އެމްޑީޕީން ވަކާލާތު ކޮށްގެން އެމްޑީޕީން މަގުމައްޗަށް ނިކުމެގެން އެމްޑީޕީން މުޒާހަރާ ކޮށްގެން ދިވެހި ރައްޔިތުންނަށް ހޯދާދީފައިވާ ޙައްގެއް. މި ސަރުކާރުން މިހާރު އުޅެނީ އެ ހައްގު ނިގުޅައިގަންނަން،
އަބްދުﷲ ޝާހިދު

21 އަހަރު ނުފުރޭ ދިވެހިންނަށް ސިނގިރޭޓު ވިއްކުމާއި ގަތުން މަނާކޮށްފައި ވުން ދެކޮޅު ނުޖެހޭ ކަން ފާހަގަކުރައްވާ ޝާހިދު ވިދާޅުވީ މިއަދުގެ ސަރުކާރުން ސިނގިރޭޓުގެ މައްސަލއިގަ، 18 އަހަރުފުރި 21 އަހަރު ނުފުރޭ މި ކެޓަގަރީގައި ތިބޭ މީހުންނަށް، ކުދީންނަށް، ސިނގިރޭޓު ވިއްކުން މަނާކޮށްފައި ވަނީ ވަކަރަށް ޖައްސަވާލެއްވުމަށްޓަކައި ކަމަށެވެ.

ޝާހިދު ވިދާޅުވީ އޭނާ ގަބޫލުކުރައްވާ ގޮތުގައި މިކަން މިގޮތަށް ކޮށްފައި މިވަނީ ގަސްތުގައި މަކާރާއި ހީލަތުން ކަމަށެވެ. އަދި މިއީ ޒުވާނުން ބަސް ބުނާ މިންވަރެއް ބެލުމަށް ކޮށްފައިވާ ކަމެއް ކަމަށް ޝާހިދު ވަނީ ވިދާޅުވެފަ އެވެ.

ޒުވާނުން މިކަމުގައި އެއްޗެއް ނުބުނެ ތިބެން ވެއްޖެނަމަ މަޖިލީހުގައި އޮތް ސަރުކާރުގެ ސުޕަ މެޖޯރެޓީ ބޭނުންކޮށްގެން ވޯޓުލެވޭ މީހުންގެ އުމުރު 21 އަހަރަށް ބަދަލު ކުރާނެ ކަމަށް ޝާހިދު ވަނީ ވިދާޅުވެފަ އެވެ.

ޝާހިދު ވަނީ އެމްޑީޕީން އެތައް މަސައްކަތެއް ކޮށްގެން ހޯދާދީފައިވާ ޙައްގު ދޫކޮށްނުލުމަށް އަދުގެ ޒުވާނުންނަށް ގޮވާލާފައެވެ. މިއަދު ބަހެއްނުބުނެ ފަހަތަށްޖެހި ތިބެންވެއްޖެނަމަ އޭގެ ސަބަބުން ދެން އަންނާނެ ކަންތައްތައް މާ ނުރައްކާތެރި ކަމަށް ޝާހިދު ވަނީ ވިދާޅުވެފަ އެވެ.