ވެރިކަންކުރާ ޕީއެންސީ އަކީ ރާއްޖޭގައި އޮތް އެންމެ ބޮޑު ސިޔާސީ ޕާޓީކަމަށް ހަދައި އިއުލާންކުރީ ސިފައިންނާއި ފުލުހުން ވެސް ވަގަށް އެ ޕާޓީއަށް ވައްދައިގެންކަން ފަޅާއަރައިފި އެވެ.

ފުލުހުންނާއި ސިފައިންގެ ބައެއް އޮފިސަރު ވަނީ އެ މީހުންނަށް ނޭނގި އެ މީހުންގެ ނަމުގައި ވަގު ފޯމްތަކެއް ފުރައިގެން ޕީއެންސީއަށް ވައްދާފައިވާކަން "ހުރިހާ"އަށް ކަށަވަރުކޮށްދީފަ އެވެ.

ބައެއް އޮފިސަރުން ވަނީ އެ މީހުންގެ ނަމުގައި ހުށަހަޅާފައިވާ ވަގު ފޯމްތައް "ހުރިހާ"އާ ހިއްސާކޮށްފަ އެވެ. އެގޮތުން އޭގެރެއިން ބައެއް ފޯމްތަކުގައި މަންމަގެ މައުލޫމާތު ހިމަނާފައި ވަނީ ނުބައިކޮށެވެ. އަދި އެ ފޯމްތަކުގައި ޖަހާފައި ވަނީ މުއްދަތު ހަމަވެފައިވާ އައިޑީކާޑްގައި ޖެހުމަށް ޑީއެންއާރަށް ދީފައިވާ ފޮޓޯ އެޑިޓްކޮށް މޮޑިފައިކޮށްގެން ކަމަށް އެ އޮފިސަރުން ކިޔައިދިނެވެ.

އެގޮތުން ސިފައިނާއި ފުލުހުންގެ 15 އަށްވުރެ ގިނަ އޮފިސަރުން ވަގަށް ޕީއެންސީއަށް ވައްދާފައިވާކަން "ހުރިހާ"އަށް ވަނީ ކަށަވަރުވަފަ އެވެ.

މިކަމާ ގުޅިގެން ފުލުހުންނާއި އެމްއެންޑީއެފް އިން އެއްވެސް ބަހެއް ނުބުނެ އެވެ.

އެތައް ހާސް ވަގު ފޯމް ހުށަހަޅައިގެން އެންމެ މެންބަރުން ގިނަ ޕާޓީއަކަށް ވެރިކަން ކުރާ ޕީއެންސީ ހަދައި އެ ޕާޓީން އަންނަނީ އެކަމާ އުފާފާޅުކުރަމުންނެވެ.

މިއީ ފަހުގެ ތާރީހެއްގައި ވެރިކަން ކުރާ ޕާޓީއަކުން ޑީއެންއާރު (އައިޑީކާޑު ޔުނިޓް)ގެ ޑޭޓާބޭސް އިން ވައްކަން ކޮށްގެން މިހާ ގިނަ މީހުން ޕާޓީއަކަށް ވެއްދި ފުރަތަމަ ފަހަރެވެ. އެ ޕާޓީން ވަނީ ހޯމް މިނިސްޓްރީގެ އިސްބޭފުޅުން ލައްވައި ޑީއެންއާރުގެ ޑޭޓާ ބޭސް ކަހާލައިގެން އެތައް ހާސް ފޯމެއް ފުރައިގެން އިލެކްޝަންސް ކޮމިޝަނަށް ހުށަހަޅައިފަ އެވެ.

މިދިޔަ ޑިސެމްބަރު 31 އާ ހަމައަށް އިލެކްޝަންސް ކޮމިޝަންގެ ވެބްސައިޓުގައި ހިމަނާފައިވާ އެންމެ ފަހުގެ ތަފާސްހިސާބުތަކުން ދައްކާ ގޮތުން ޕީއެންސީގައި މިވަގުތު 68،968 މެންބަރުން އެބަ ތިއްބެވެ.

މިދިޔަ އަހަރު ފެށިއިރު 28،201 މެމްބަރުން ތިބި ކަމަށް ބުނާ ޕީއެންސީން ވަނީ މެންބަރުން އިތުރު ކުރުމަށް ހުށަހެޅި ވަގު ފޯމްތަކާއެކު އެތައް ބައެއްގެ ފާޑުކިޔުން އަމާޒުވެފަ އެވެ.

ވަގު ފޯމްގެ މައްސަލަ ފުލުހުންނަށް ހުށަހަޅާފައި ވަނިކޮށް މައްސަލަ ނުނިމެނީސް ޕީއެންސީން ހުށަހެޅި ފޯމްތައް ބަލައިގަނެ ޕްރޮސެސްކުރުމުން ގިނަ ބަޔަކު އަންނަނީ އެކަމާ ފާޑުކިޔަމުންނެވެ. އެއީ ރައީސް ޑރ. މުހައްމަދު މުއިއްޒުގެ ނުފޫޒުން ކޮށްފައިވާ ކަމެއް ކަމަށް ގިނަ ބަޔަކު އަންނަނީ ތުހުމަތުކުރަމުންނެވެ.