ޔަހޫދީ ދައުލަތާއި ޣައްޒާގައި ވެރިކަންކުރާ ހަމާސް ޖަމާއަތާ ދެމެދު ވެފައިވާ ހަނގުރާމަ ހުއްޓައިލުމުގެ އެއްބަސްވުމުގެ ދަށުން، ހަމާސް އިން މިނިވަންކުރި ހަތަރު ޔަހޫދީއެއްގެ ބަދަލުގައި ޔަހޫދީ ޖަލުތަކުގައި ތިބި ފަލަސްޠީނުގެ 200 ގައިދީން މިނިވަންކޮށްފި އެވެ.

މި މަހުގެ 19ވަނަ ދުވަހު ތަންފީޒުކުރި ހަނގުރާމަ ހުއްޓާލުމުގެ އެއްބަސްވުމުގެ ދަށުން އަސީރުން ބަދަލުކުރުމަށް ހަމަޖެހިފައި ވަނީ ތިން މަރުޙަލާއަކަށް ބަހާލައިގެންނެވެ.

ކޮންމެ މަރުޙަލާއެއް ވެސް 42 ދުވަހަށް ދެމިގެން ދާނެ އެވެ. ފުރަތަމަ މަރުހަލާގައި ހަމާސް އިން ޖުމްލަ 33 އަސީރުން ދޫކޮށްލުމަށް ހަމަޖެހިފައިވެ އެވެ. މި މަރުހަލާގައި ދޫކުރާނީ އަންހެނުންނާއި ކުޑަކުދިންނާއި އުމުރުން 50 އަހަރުން މަތީގެ މީހުންނެވެ. އޭގެ ބަދަލުގައި 2,000 އަށް ވުރެ ގައިދީން ޔަހޫދީން މިނިވަން ކުރާނެ އެވެ.

އެ އެއްބަސްވުމާ އެއްގޮތަށް އެއްބަސްވުން ތަންފީޒުކުރި ފުރަތަމަ ދުވަހު ވަނީ ޔަހޫދީންގެ ތިން އަސީރުންގެ ބަދަލުގައި ފަލަސްތީނުގެ 90 ގައިދީން މިނިވަންކޮށްފަ އެވެ. އެއީ ހަމާސުން މިނިވަން ކުރާ ކޮންމެ އަސީރަކަށް 30 ގައިދީންގެ މަގުންނެވެ.

އެ ދުވަހަށް ފަހު ކޮންމެ ހަތް ދުވަހަކުން އަސީރުން ބަދަލުކުރުމަށް ދެ ފަރާތުން އެއްބަސްވެފައިވެ އެވެ.

އެއްބަސްވުން ތަންފީޒުކުރިތާ ހަތް ދުވަސް ފާއިތުވުމުން ދެވަނަ ބުރަކަށް މި ވަނީ އަސީރުން ބަދަލުކޮށްފަ އެވެ. އެގޮތުން ހަމާސުން ވަނީ ޔަހޫދީ އަސްކަރިއްޔާގެ ހަތަރު އަންހެން ސިފައިން ރެޑްކްރޮސްއާ ހަވާލުކޮށްފަ އެވެ. އެ ވަގުތު އެ ސަރަޙައްދުގައި ގިނަ ޢަދަދެއްގެ ހަމާސްގެ ހަނގުރާމަވެރިންނާއި އާންމުން އެއްވެ ތިއްބެވެ.

އޭގެ އިރުކޮޅެއްގެ ތެރޭގައި ހުޅަނގު އައްސޭރީގައި ހުންނަ ޔަހޫދީންގެ އޮފާ ޖަލުން ފަލަސްތީނަށް ނިސްބަތްވާ ގައިދީން މިނިވަންކޮށް ބަސްތަކަށް އަރުވައިގެން ވަނީ ގެންގޮސްފަ އެވެ.

ޔަހޫދީން މިނިވަން ކުރި މީހުންގެ ތެރޭގައި އުމުރަށް ޖަލަށް ލާފައިވާ 121 މީހުންނާއި ދިގު ހުކުމެއް ތަންފީޒު ކުރަމުން ދިޔަ 79 މީހުން ހިމެނެއެވެ. މިނިވަން ކުރި ގައިދީންގެ ތެރެއިން އެންމެ ދުވަސްވީ މީހާގެ އުމުރަކީ 69 އަހަރެވެ. އަދި އެންމެ ހަގީ އުމުރުން 15 އަހަރުގެ ކުއްޖެކެވެ.

ޔަހޫދީންގެ ޖަލުތަކުން ސަލާމަތްވި ފަލަސްތީނުގެ ރައްޔިތުންގެ ތެރެއިން 114 މީހުން ގެންގޮސްފައި ވަނީ ހުޅަނގު އައްސޭރީގެ ރާމަﷲ އަށެވެ. އަދި 16 މީހުން ގެންގޮސްފައި ވަނީ ޣައްޒާގެ ޚާން ޔޫނިސަށެވެ. ދެ ސަރަޙައްދުން ވެސް މިނިވަން ކުރި ގައިދީންނަށް ވަނީ ހޫނު މަރުހަބާއެއް ކިޔައިފަ އެވެ.

ބާކީ ތިބި 70 ގައިދީން ގެންގޮސްފައި ވަނީ މިސްރަށެވެ. މިސްރުގައި 48 ގަޑިއިރު ހޭދަކުރުމަށް ފަހު އެ މީހުން ދެން ގެންދާނީ ތޫނިސަށާއި ތުރުކީވިލާތަށާއި އަލްޖަޒާއިރަށެވެ. މި ހުރިހާ ގައުމަކުން ވެސް ވަނީ އެ މީހުން ބަލައިގަތުމަށް އެއްބަސްވެފަ އެވެ.