ޑީޕްސީކް: ޗައިނާގެ އޭއައި އިން އެމެރިކާ ހާސްކޮށްލައިފި
އަނެއްކާވެސް ރާކީ އިތުރު ކައިވެންޏެއް ކުރަނީ!
12 ކޭސް ރެޑްބުލް ވަގަށް ނެގި މީހަކު 12 މަހަށް ޖަލަށް
ސިޔާސީ ޕާޓީ (ޕީޕީއެމް) އުވާލަން އެޕާޓީގެ ސެނެޓަށް ނުނިންމޭނެ ކަމަށާއި އެއީ އިލެކްޝަން ކޮމިޝަނަށް ވެސް ކުރެވޭނެ ކަމެއް ނޫންކަމަށް އެ ޕާޓީގެ ކުރީގެ ރައީސް އަބްދުﷲ ޔާމީން ރޭ ވިދާޅުވެއްޖެ އެވެ.
ކުރީގެ ރައީސް ޔާމީން މިފަދައިން ވިދާޅުވެފައިވަނީ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ރަސްމީކޮށް އުވާލާ ސިޔާސީ ޕާޓިތަކުގެ ދަފްތަރުން އުނިކޮށްފައިވާ މައްސަލައަށް އިޝާރާތްކުރައްވާ، ޕީޕަލްސް ނެޝަނަލް ފްރޮންޓް (ޕީއެންއެފް)ގެ ޖަލްސާގައި ވާހަކަ ދައްކަވަމުންނެވެ.
ރައީސް ޔާމީން ވިދާޅުވީ ޕާޓީއެއް އުފައްދަނީ އެތައް ބައެއްގެ މަސައްކަތުން އެތައް ބަޔަކު ޕާޓީއަށް ސޮއިކޮށްގެން ކަމަށާ އެހެންކަމުން ޕާޓީ އުވާލުމުގައި ވެސް އެ ޕާޓީއެއްގެ މެމްބަރުންގެ ބަސް އޮންނަން ވާނެ ކަމަށެވެ. ނަމަވެސް ޕީޕީއެމް އުވާލުމަށް ރައީސް މުހައްމަދު މުއިއްޒުގެ ރޭވުމުގެ ތެރެއިން ވަނީ ޕީޕިއެމްއިން އަސާސީ ގަވާއިދުވެސް ބަދަލުކޮށް އެކަމަށް މަގު ފަހިކޮށްފައިވާ ކަމަށާ އެއީ ވެގެންވާނެ ގޮތެއް ނޫން ކަމަށް ވެސް ރައީސް ޔާމީން ފާހަގަކުރެއްވި އެވެ.
ރައީސް ޔާމީން ވިދާޅުވީ ޕާޓީގެ ސެނެޓުން އިސްލާހު ގެނެސްފައިވީ ނަމަވެސް ޕާޓީ އުވާލުން އެއީ ޕާޓީގެ ސެނެޓަށް ކޮންގްރެސްއިން ދީފައި އޮތް ބާރެއް ނޫން ކަމަށެވެ. އަދި ޕާޓިއަކީ އެތައް ބައެއްގެ ހައްގުތައް އެކުލެވޭ އެއްޗެއް ކަމަށާއި ޕާޓީގެ ސެނެޓަކީ ރަމްޒީ ބައެއް ކަމަށް އެމަނިކުފާނު ވިދާޅުވި އެވެ.
ރައީސް ޔާމީން ވިދާޅުވީ ރައްޔިތުންގެ މަޖިލީހުގައި ވެސް މެމްބަރުންނަކީ ދާއިރާތައް ތަމްސީލުކޮށް ރައްޔިތުންގެ ފަރާތުން ގާނޫނުތައް ނަގަހައްޓާ ދަމަހައްޓަން ތިބޭ ރަމްޒީ ބައެއް ކަމަށާއި ހަމަ ޕާޓީގެ އާންމު މެމްބަރުންނާ ސެނެޓާ ދޭތެރޭގައި ވެސް ކަން މި އޮންނަނީ އެ އުސޫލުން ކަމަށެވެ. އަދި އިލެކްޝަންސް އިން އެ އޮތީ ފޯމަލީ ޕާޓި އުވާލާފައި ކަމަށާއި ގާނޫނު ދަމަހައްޓާ ކަމަށްވަންޏާ އިލެކްޝަނަށް މީކީ ކުރެވޭނެކަމެއް ނޫންކަން އެނގެންވާނޭ ކަމަށް ވެސް އެމަނިކުފާނު ވިދާޅުވި އެވެ.
"ޕާޓީއަކީ އެތައް ބައެއްގެ އެއްޗެއް. ސެނެޓަކީ ރަމްޒީ ބައެއް. ރައްޔިތުންގެ މަޖިލީހުގައި ދާއިރާތައް ތަމްސީލުކޮށް ރައްޔިތުންގެ ފަރާތުން ގާނޫނުތައް ނަގަހައްޓާ ދަމަހައްޓަން ތިބޭ ރަމްޒީ ބައެއް މަޖިލިސް މެމްބަރުންނަކީ. ހަމަ އެ އުސޫލުން މި އޮންނަނީ ޕާޓީގެ އާންމު މެމްބަރުންނާ ސެނެޓާ ދޭތެރޭގައި،" ރައީސް ޔާމީން ވިދާޅުވި އެވެ. "އިލެކްޝަންސް އިން އެ އޮތީ ފޯމަލީ ޕާޓި އުވާލާފައި. އަޅުގަޑުގެ ވާހަކައަކީ ގާނޫނު ދަމަހައްޓާ ކަމަށްވަންޏާ އިލެކްޝަނަށް އެނގޭނެ މީކީ ކުރެވޭނެކަމެއް ނޫންކަން. ޕާޓިގެ ސެނެޓަށް ކޮންގްރެސް އިން ދީފައި ނެތް ބާރެއް އެއީ."
ރައީސް ޔާމީން އިތުރަށް ވިދާޅުވީ، ޕީޕީއެމް އުވާލަން ނިންމީ ޕާޓީ މެމްބަރުންގެ ހައްގުތަކެއް ސެނެޓުން ވަގަށް ދަމައިގަނެގެން ކަމަށެވެ.
ވަގު ފޯމުތައް ފުރައި ވެރިކަން ކުރާ ޕާޓީ ޕީއެންސީއަށް ވަގަށް މެމްބަރުން އިތުރުކުރި މައްސަލައާއި ގުޅުވައި ޔާމީން ވިދާޅުވީ މިކަން ވެސް މިއޮތީ ސީދާ އީސީގެ ބައިވެރިވުމާއެކު ކޮށްފައި އޮތް ކަމެއް ކަމަށެވެ. އެގޮތުން މިހާރު އީސީއަށް އެތަނުގެ ގާނޫނީ ޒިންމާ އަދާނުކުރެވޭ ކަމަށް އާއްމުން ޤަބޫލުކުރާ ކަމަށާއި ސަރުކާރު ހިންގާ ޕީއެންސީ އަށް މީހުން ވެއްދުމަށް ވަގު ފޯމް ހުށަހެޅެނީ އީސީން އެކަން ފަހިކޮށްދޭތީ ކަމަށް ރައީސް ޔާމީން ވިދާޅުވި އެވެ.
