ގިނަ ބައެއްގެ ޓްރެވަލް ބަކެޓް ލިސްޓުގައި ޖަޕާން ހިމެނިފައި އޮންނަ މައިގަނޑު އެއް ސަބަބަކީ އެ ގައުމަށް އަންނަ "ޗެރީ ބްލޮސޮމްސް" މޫސުމެވެ.
މުޅި ޖަޕާން ފިޔާތޮށި ކުލައިން ޖަރީ ކޮށްލާ އެ މޫސުމުގައި އެގައުމަށް ޒިއާރަތްކުރާ ފަތުރުވެރިން ބޮޑުތަނުން އިތުރުވާއިރު އެ މޫސުން ވެފައިވަނީ މުޅި ދުނިޔޭގައި ވެސް ޖަޕާނަށް ލިބިފައި އޮންނަ ހާއްސިއްޔަތަކަށެވެ.
ބޮޑެތި ބިޔަ ޗެރީ ބްލޮސޮމްސް ގަސްތަކުގައި މާ އަޅައި ފޮޅިފައި ހުންނައިރު އެ މަންޒަރު ދުރަށް ފެންނަނީ ވަރަށް ޗާލު ކޮށެވެ. ހާއްސަކޮށް ފޮޓޯ ނަގަން އެއީ ވަރަށް ވެސް ހިތްގައިމު މަންޒަކެވެ.
ޖަޕާނު ބަހުން "ސަކޫރާ"ގެ ނަން ދެވިފައިވާ އެ މޫސުމަކީ ސަގާފީ ގޮތުން ވެސް އެ ގައުމަށް ވަރަށް ހާއްސަ ދުވަސްވަރެކެވެ. އެގޮތުން އެ މޫސުމާ ގުޅުވައިގެން ގިނަ ފެސްޓިވަލްތައް ވެސް ބޭއްވެ އެވެ.
ސަކޫރާއަކީ ޖަޕާނުގެ ބަހާރު މޫސުމުގެ ފެށުމަށްވާއިރު އެއީ އާ ފެށުންތަކާއި ދިރިއުޅުމުގެ ހާއްސަ ކަންކަން ރަމްޒުކޮށްދޭ މޫސުމެއް ކަމަށް އެ ގައުމުގެ ރައްޔިތުން ގަބޫލު ކުރެ އެވެ.
މާޗް މަހާއި އޭޕްރިލް މަސް ހިމެނޭ ގޮތަށް ގާތްގަނޑަކަށް ހަފްތާއެއްހާ ދުވަހަށް ދެމިގެންދާ އެ މޫސުމަކީ ޖަޕާނުގެ ފަތުރުވެރިކަން ކުރިއެރުވުމަށްޓަކައި އެ ގައުމުގެ ސަރުކާރުން ބޭނުންކުރާ އެއް އުކުޅެވެ.
މި އަހަރުގެ ސަކޫރާ މޫސުން ފެށިފައިވާކަން ރަސްމީކޮށް ޖަޕާނުން އިއުލާން ކޮށްފައިވާއިރު ޖަޕާނުގެ މަންޒަރުތައް ފެންނަ ފޮޓޯތައް މިހާރު ސޯޝަލް މީޑިއާގައި ދަނީ ދައުރުވަމުންނެވެ.
ޗެރީ ބްލޮޮސޮމްސް ބަލާލަން ދިއުމަކީ ޓްރެވަލް ބަކެޓް ލިސްޓުގައި ހިމެނޭ ކަމެއް ނަމަ މިއީ އެ ހުވަފެން ހަގީގަތަކަށް ހަދަންވީ ވަގުތެވެ.