ނޫސްވެރިކަމުގެ މިނިވަންކަން ބޭނުން ކުރާއިރު ނޫސްވެރިން ޒިންމާދާރުވުން ވެސް މުހިންމު ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

އެމަނިކުފާނު މިފަދައިން ވިދާޅުވެފައި ވަނީ މީޑިއާ ކޮންޓްރޯލް ބިލާ ގުޅިގެން އެކްސްގައި ކުރެއްވި ޕޯސްޓެއްގައި އެވެ.

އެކްސްގައި ކުރެއްވި ޕޯސްޓެއްގައި ނަޝީދު ވިދާޅުވީ، މީޑިއާ ކޮންޓްރޯލް ބިލާ ގުޅޭގޮތުން ހުރިހާ ޕާޓީތަކާއެކު މަޝްވަރާ ބައްދަލުވުން ބޭއްވަން ބޭނުންތެރި ކަމަށެވެ.

ހަމަ އެއާ އެކު ނޫސްވެރިކަމުގެ މިނިވަންކަން ވެސް އިންތިހާއަށް ބޭނުންތެރި ކަމަށާއި ނޫސްވެރިން ޒިންމާދާރުވުން ވެސް މުހިންމު ކަމަށް ނަޝީދު ވިދާޅުވި އެވެ.

މިދިޔަ ބުރާސްފަތި ދުވަހު ނަޝީދު ވަނީ މީޑިއާ ކޮންޓްރޯލް ބިލު ތަސްދީގުނުކުރުމަށް ރައީސް މުހައްމަދު މުއިއްޒަށް ގޮވާލައްވައިފައެވެ.

https://x.com/MohamedNasheed/status/1962107644555964809

ނަޝީގުގެ އިތުރުން ރާއްޖޭގެ މީޑިއާތަކުންނާއި ބައިނަލްއަގްވާމީ ޖަމިއްޔާ ތަކުން ވެސް މި ބިލު ބޭރުކުރުމަށް އަންނަނީ ގޮވާލަމުންނެވެ.

މި ވަގުތު ބިލު އޮތީ ކޮމިޓީ މަރުހަލާގައެވެ. ކޮމިޓީ މަރުހަލާއަށް ފަހު ދެން އޮންނާނީ ތަޅުމުން ބިލު ފާސްކުރުމެވެ. އޭގެ ފަހުން ދެ ހަފުތާގެ ތެރޭ ރައީސް ބިލު ތަސްދީގުކުރައްވަން ޖެހޭނެއެވެ. ނޫނީ މަޖިލީހަށް ބިލު އަނބުރާ ފޮނުވާލަން ޖެހޭނެއެވެ.

މީގެ ކުރިން ނަޝީދު އެކްސްގައި ކުރެއްވި ޕޯސްޓެއްގައި ވިދާޅުވެފައި ވަނީ ސަރުކާރުން ޚިޔާލު ފާޅުކުރުމުގެ މިނިވަންކަމުގެ ހައްގު ހަނިކުރަން މަސައްކަތްކުރުމަކީ ގައުމުގެ މިނިވަންކަމާއި ބާއްޖަވެރިކަމަށް އެޅޭ ހުރަހެއް ކަމަށް ވިދާޅުވެފަ އެވެ.

ނަޝީދު މިފަދައިން ޕޯސްޓެއް ކުރައްވާފައިވަނީ މީޑިއާ ކޮންޓްރޯލް ބިލާ މެދު ހުރި ކަންބޮޑުވުންތައް ހިއްސާކުރުމަށް ބްރޯޑްކާސްޓިން ކޮމިޝަނާއި މީޑިއާ ކައުންސިލް ވަކިވަކިން ހާޒިރުކޮށް އެ މުއައްސަސާތަކާ ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން މިއަދު ބައްދަލުކޮށްފައިވަނިކޮށެވެ.

މީޑިއާ ބިލާ ގުޅޭގޮތުން ނޫސްތަކާ މާދަމާ ބައްދަލުކުރާއިރު، އޭގެ އަނެއް ދުވަހު ނޫސްވެރިންގެ ޖަމިއްޔާ އެމްޖޭއޭއާއި ޔޫތު މިނިސްޓްރީއާ ވެސް ކޮމިޓީން ބައްދަލުކުރާނެއެވެ.

މި ބިލާ ގުޅޭގޮތުން ބްރޯޑްކާސްޓިން ކޮމިޝަންގެ ކަންބޮޑުވުމަކީ ބިލު ހުށަހެޅުމުގެ ކުރިން އެއްވެސް މަޝްވަރާއެއް ކޮށްފައި ނުވާތީ އެވެ. އެގޮތުން، އެ ކޮމިޝަންގެ ރައީސް ޞަފާ ޝަފީގު ވިދާޅުވީ، ބިލު އެކުލަވައިލުމުގައި ދިރާސާކުރަން ޖެހޭ ބައިވަރު ކަންކަން އެބަހުރި ކަމަށާއި މިހާރު އެ ބިލު އެކުލަވާލާފައިވާ އޮތް ގޮތުން، ބިލު ޑްރާފްޓުކުރުމުގެ މަރުހަލާގައި ކަމާ ގުޅޭ އެއްވެސް ފަރާތްތަކާ އެއްވެސް މިންވަރަކަށް މަޝްވަރާކުރި ކަމަށް ނުދެކޭ ކަމަށެވެ.

މީޑިއާ ކައުންސިލްގެ ފަރާތުން ބުނީ، މީޑިއާ ރެގިއުލޭޓްކުރުމާ އެއްވެސް ވަރަކަށް ދެކޮޅު ނޫން ކަމަށާއި މީޑިއާ ރެގިއުލޭޓްކުރުމަށް ބޭނުންވަނީ ހަރުދަނާ ގޮތެއް ކަމަށެވެ.

މިހާރު ހުށަހަޅާފައި އޮތް މީޑިއާ ބިލު ފާސްކޮށް ބިލު ތަސްދީގުކޮށްފިނަމަ، ވަކިވަކި ނޫސްވެރިން 5،000 ރުފިޔާއާއި 25،000 ރުފިޔާއާ ދެމެދުގެ އަދަދަކުން ޖޫރިމަނާކުރެވޭއިރު މީޑިއާތައް 100،000 ރުފިޔާއިން ޖޫރިމަނާކުރެވެ އެވެ.

މީގެ އިތުރުން، އެ ބިލުގެ ދަށުން އުފައްދާ މީޑިއާ ރެގިއުލޭޓަރީ ކޮމިސަނަށް ހުށަހެޅޭ މައްސަލައެއް އެއްކޮށް ބަލައި ނުނިމެނީސް މީޑިއާތަކުގެ ރަޖިސްޓްރީ ބާތިލުކޮށް ނޫސްތައް ހުއްޓުވާލުމުގެ ބާރު ވެސް އާ ގާނޫނާ އެކު އުފައްދާ ކޮމިޝަނަށް ލިބޭނެ އެވެ. .