ރާއްޖޭގައި މިވަގުތު އޮތް އެންމެ ބޮޑު ސިޔާސީ ޕާޓީ މޯލްޑިވިއަން ޑިމޮރެޓިކް ޕާޓީ މިހާރު މިދަނީ ވަރަށް އުނދަގޫ ދުވަސްތަކެއް ތަޖުރިބާ ކުރަމުން ކަމަށާއި މި ހާލަތުން އަރައިގަތުމަށް ބޭނުންވަނީ އެންމެން އެކަތިގަނޑެއްގެ ގޮތުގައި ތިބުން ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެ އެވެ.

މުޅި ޕާޓީހެން ރޫޅި ބައިބައިވެ، ދެ ފެކްޝަނަކަށް ބެހިފައިވާ ކަމަށް ގިނަ ބަޔަކު ބުނަމުން އަންނަ މި ދަނޑިވަޅުގައި އެމްޑީޕީ އުފެއްދުމުގައި ވެސް އެންމެ އިސް ދައުރެއް އަދާކުރެއްވި ރައީސް ނަޝީދު ނަސޭހަތްތެރިވީ ޕާޓީ އެކަތިގަނޑެއްގެ ގޮތުގައި އޮވެ ކުރިޔަށް ދިއުމަށެވެ.

ޕާޓީ އެކަތިގަނޑެއްގެ ގޮތުގައި އޮވެ ކުރިޔަށް ދިއުމަށް ނަސޭހަތްތެރިވަމުން ރައީސް ނަޝީދު ވަނީ ހުސެއިން ސަލާހުއްދީންގެ ޅެންބައިތެއް ހިމަނުއްވައި ޕާޓީ މިވަގުތު އޮތް އުނދަގޫ ހާލަތު ސިފަކޮށްދެއްވާފަ އެވެ. އެގޮތުން އެމްޑީޕީ އުނގަދޫ ދުވަސްތަކެއް ތަޖުރިބާކުރަމުން ދިޔަ ނަމަވެސް އެ ޕާޓީ އަށް މި އުނދަގޫ ދުވަސްތަކުން އަރައިގަންނަށް އެނގޭނެ ކަމަށާއި އެކަމަށް ޝައްކު ނުކުރާ ކަމަށް އެމަނިކުފާނު ވިދާޅުވި އެވެ.

ރައީސް ނަޝީދު ވިދާޅުވީ މިވަގުތު އެމްޑީޕީ ތަޖުރިބާކުރަމުން އަންނަ މިހާލަތަކީ ޕާޓީގެ ގިނަ މެމްބަރުން ވިދާޅުވާ ގޮތުގައި އެއްވެސް އެކުވެރިކަމެއް، އެއްބައެއްވަންތަކަމެއް ނެތުމުން ދިމާވެގެން އުޅޭ ހާލަތެއް ކަމަށެވެ. އެހެންކަމުން މިވަގުތައް ޕާޓީއަށް އެންމެ މުހިންމީ އެކުވެރިކަމާއި އެއްބައެއްވަންތަކަން ކަމަށް ގިނަ މެމްބަރުން ދެކޭ ކަމަށް ވެސް އެމަނިކުފާނު ވިދާޅުވި އެވެ.

މީގެ އިތުރުން ނަޝީދު ވިދާޅުވީ 1933 ވަނަ އަހަރު މޯޓަރު ބޯޓުގެ ގަޑުބަޑުގައި ވެސް އެކުވެރިކަމާއި އެއްބައިވަންތަ ކަމަކީ އެންމެ މުހިންމު ކަންތައް ކަމަށް ރާއްޖޭގެ ޖުމްހޫރިއްޔާ މުޙައްމަދު އަމީން ދީދީ އެމަނިކުފާނުގެ އޭރު އޮތް ކެބިނެޓަށް ވެސް ވިދާޅުވެފައިވާ ކަމަށެވެ. އަދި ކެބިނެޓްގެ އެކަކަށް ލިބޭ ގެއްލުމެއް ކެބިނެޓުގައި ދެން ތިބި އެންމެން ވެސް އެ ގެއްލުން ލިބެން ޖެހޭނެ ކަމަށް އަމީން ވިދާޅުވި ކަމަށް ނަޝީދު ލިޔުއްވާފައިވެ އެވެ.

މީގެ އިތުރުން އަމީން ދީދީ އާއި ދެ ފަރީދުން ވެސް މޯޓަރު ބޯޓުގައި އެއް އަހަރަށް ކޮޅުބަށް ދާން ޖެހުނު ކަމަށާއި ކޮޅުބުގައި އެވެރިން އެއް އަހަރު މަޑުކުރަން ޖެހުނު ކަމަށް ލިޔުއްވާފައިވެ އެވެ.

ނަޝީދު ވަނީ އޭރު އެ ބޭފުޅުން ކޮޅުބުގައި ތިއްބެވި އިރު ހުސެއިން ސަލާހުއްދީން ލިޔުއްވިކަމަށް ބުނާ ޅެންބައިތެއް ވެސް ހިއްސާކުރައްވާފަ އެވެ. އެ ޅެންބައިތައް އިޝާރާތް ކުރައްވައި ނަޝީދު ވިދާޅުވެފައި ވަނީ އެއީ ވަގުތުގެ މުނާސަބު ކަން މުހިންމު ކަން އަންގައިދިނުމަށް ހިއްސާކުރައްވާފައިވާ ޅެންބައިތެއް ކަމަށެވެ.

ރައީސް ނަޝީދު މިފަދައިން ވިދާޅުވެ އެކްސްގައި މެސެޖެއް ހިއްސާކޮށާްފައިވާއިރު، އެމްޑީޕީ އަކީ މިވަގުތު އެންމެ މައްސަލަ ބޮޑު ސިޔާސީ ޕާޓީ ކަމަށް މިއަދު ގިނަ ބަޔަކު އަންނަނީ ބުނަމުންނެވެ.