ސައްހަ ނޫން ޓެލެގްރަފިކް ޓްރާންސްފާ (ޓީޓީ) ފޮނުވައިގެން ބޭރުގެ ކުންފުނިތަކުން ވިޔަފާރިކުރަމުން ދިޔަ މައްސަލައިގައި 16 ދައުވާއެއް މއ. ހަނިސާކަލް، ހުސައިން ޝިފާއުގެ މައްޗަށް ސާބިތުވާ ކަމަށް ކްރިމިނަލް ކޯޓުން ކަނޑައަޅައިފި އެވެ.

ޝިފާއުގެ މައްޗަށް 23 ދައުވާއެއް ދައުލަތުން ކުރި އެވެ. އޭގެ ތެރެއިން 16 ދައުވާއެއް ސާބިތުވާ ކަމަށް ކްރިމިނަލް ކޯޓުން މިއަދު ވަނީ ނިންމައިފަ އެވެ.

ސާބިތުވީ އެނގި ހުރެ ސައްހަ ނޫން ލިޔުމެއް ދިނުމުގެ ކުށުގެ ނުވަ ދައުވާއަކާއި މަކަރާއި ހީލަތް ހެދުމުގެ ކުށުގެ ހަތް ދައުވާ އެވެ. އޭނާގެ މައްޗަށް އުފުލާފައިވާ މަނީ ލޯންޑްރިންގެ ހަތް ދައުވާއާ މެދު ފަހުން ގޮތެއް ނިންމާނެ ކަމަށް މައްސަލަ ބައްލަވާ ގާޒީ ވަނީ ވިދާޅުވެފަ އެވެ.

ޝިފާއުގެ މައްޗަށް ސާބިތުވި ދައުވާތަކަށް އަދަބު ކަނޑައެޅުމުގެ އަޑުއެހުން އަންނަ ހަފްތާގައި ބާއްވަން ވަނީ ތާވަލްކޮށްފަ އެވެ. އެ އަދަބު ކަނޑައަޅަންދެން ޝިފާއު ބަންދުކުރަން ކޯޓުން އަމުރުކޮށްފައިވާތީ އޭނާ މިހާރު ހުރީ ފުލުހުންގެ ބަންދުގަ އެވެ.

މި މައްސަލައިގެ ހުކުމާ ހިސާބަށް ގޮސްފައި ވަނިކޮށް އިއުތިރާފުގެ އެއްބަސްވުމެއް ޝިފާއުއާއެކު ހަދައި އޭނާ ސަލާމަތްކުރަން ޕީޖީ އޮފީހުން މަސައްކަތް ކުރި އެވެ. ނަމަވެސް ގެއްލުން ލިބުނު މީހުންނަށް ބަދަލު ލިބިފައިނުވާތީ އެފަދަ ލުޔެއް ދެވެން ނެތް ކަމަށް ގާޒީ އަލީ ނަދީމް ވަނީ ނިންމާފަ އެވެ.

ކިންގްޑަމް އޮފް ފުރުޓްސް ނަމަކަށް ކިޔާ، އަމިއްލަ ފަރުދެއްގެ ވިޔަފާރިއެއް މެދުވެރިކޮށް، ރާއްޖެއިން ބޭރުގެ ކުންފުނިތަކާ އެކު މަކަރާއި ހީލަތުން ކުރި ވިޔަފާރީގެ މުއާމަލާތްތަކުގެ މައްސަލައިގައި 2023 ވަނަ އަހަރު ޝިފާއު ހައްޔަރުކުރުމަށް ފަހު ކޯޓުން ދޫކޮށްލުމުން އޭނާ ފިލައިގެން ރާއްޖޭން ބޭރަށް ގޮސްފައިވެ އެވެ. އޭގެ ފަހުން އޭނާ ހޯދަން އިންޓަޕޮލް މެދުވެރިކޮށް ރެޑް ނޯޓިސް ނެރުމުން އަމިއްލައަށް ރާއްޖެއަށް އައުމުން ހައްޔަރުކުރުމަށް ފަހު ޕާސްޕޯޓް ހިފެހެއްޓުމަށްފަހު ދޫކޮށްލި އެވެ.

އޭނާއަށް ރައީސް މުހައްމަދު މުއިއްޒު މީގެކުރިން ވަނީ ޖަނަވާރުތަކާ ބެހޭ މިނިސްޓްރީގެ ޕޮލިޓިކަލް ޑިރެކްޓަރުކަން ވެސް ދެއްވާފަ އެވެ. ގިނަ ބައެއްގެ ފާޑުކިޔުންތައް އަމާޒުވުމުން ރައީސް އޮފީހުން ބުނީ އެއީ އޮޅުމަކުން ވީ ކަމެއް ކަމަށެވެ.