ގިނަ ބައެއްގެ މަގުބޫލުކަން ހޯދާފައިވާ ހޮލީވުޑްގެ ތަރި ބްރޫސް ވިލްސްގެ އެންމެ ފަހުގެ ސިއްހީ ހާލަތާ ބެހޭގޮތުން އޭނާގެ އަންހެނުން އެމާ ހެމިންގްސް ވިލްސް ވާހަަކަ ދައްކައިފި އެވެ.

ދާދި ފަހުން މީޑިއާއަށް ދިން އިންޓަވިއުއެއްގައި އެމާ ބުނީ ބްރޫސްގެ ސިއްހީ ހާލަތާ ބެހޭ ކަންކަން އޭނާއަށް މާ ބޮޑަށް ފަހުމުނުވާ ކަމަށެވެ.

އެގޮތުން އެއީ ގެއްލުމާ އެއްވަރަށް ފައިދާވެސް ހުރި ކަމެއް ކަމަށާއި ބްރޫސްއަށް އޭނާގެ ބަލި ހާލަތު ރަނގަޅަށް ނޭނގޭތީ އިތުރު ސްޓްރެސްއާއި ހާސްކަން ކުރިމަތިނުވާ ކަމަށެވެ.

އެއާއެކު ބްރޫސްއަށް މިހާރުވެސް އޭނާގެ އާއިލާގެ މެމްބަރުން ވަކިކުރަން އެނގޭ ކަމަށާއި އޭނާގެ އާއިލާއާއެކު ގުޅުން ބާއްވަންވީ ހާއްސަ ގޮތެއް އޭނާއަށް އެނގޭ ކަމަށް ވެސް އެމާ ބުންޏެވެ.

2009 ވަނަ އަހަރުގެ ތެރޭގައި ކައިވެނިކުރި ބްރޫސްއާއި އެމާއަށް ދެ ކުދިން ލިބިފައިވެ އެވެ. އެ ދެ ކުދިންގެ އުމުރަކީ މިހާރު 13 އަހަރާއި 11 އަހަރެވެ.

ނަފްސާނީ ބައްޔެއް ކަމަށްވާ އެފްޓީޑީއަށް 2022 ވަނަ އަހަރު ފަރުވާ ހޯދަން ފެށި ހިސާބުން ބްރޫސް ވަނީ އޭނާގެ 40 އަހަރުގެ ދިގު ހޮލީވުޑް ކެރިއަރު ނިންމާލައި ކެމެރާތަކާ ދުރަށް ގޮސްފަ އެވެ.