ހިޔާ ޓަވަރެއްގައި ރޭ ހިނގި އަލިފާނުގެ ހާދިސާގައި 38 އެޕާޓްމަންޓަކަށް ގެއްލުންވެ، 85 މީހަކަށް ވަގުތީ ބޯހިޔާވެހިކަން ހަމަޖައްސާފައިވާ ކަމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން މިއަދު ބުނެފި އެވެ.

އެންޑީއެމްއޭ އިން ބުނީ ހިޔާގެ ފަސްވަނަ ޓަވަރުގައި ހިނގި އަލިފާނުގެ ހާދިސާގައި ގެއްލުންވީ 38 އެޕާޓްމަންޓެއްގެ ނަރުދަމާ ހޮޅިއަށް ކަމަށާއި އެކަން ރަނގަޅު ކުރުމަށް އެޗްޑީސީ އިން މަސައްކަތް ކުރަމުންދާ ކަމަށެވެ.

ގެއްލުންވި އެޕާޓްމަންޓްތަކުގެ ތެރެއިން އެހީތެރިކަން ބޭނުންވި 18 އެޕާޓްމަންޓެއްގައި ދިރިއުޅޭ 85 މީހަކަށް ވަގުތީ ބޯހިޔާވެހިކަން ފޯރުކޮށްދިނުމުގެ އިތުރުން ކެއުން ބުއިމަށް އެހީތެރިކަން ފޯރުކޮށްދިން ކަމަށް އެންޑީއެމްއޭ އިން ބުންޏެވެ.

"މި ހާދިސާއަށް ފަހު ނަރުދަމާއަށް ލިބުނު ގެއްލުން ދެނެގަނެ ގެއްލުންތައް މަރާމާތުކުރުމުގެ މަސައްކަތް އެޗްޑީސީ އިން ދަނީ ކުރަމުންނެވެ. އަދި އަލިފާނުގެ ހާދިސާއާ ގުޅިގެން އިތުރަށް ބަލަން ޖެހޭ ކަންކަން އެޗްޑީސީ އާއި މި އޮތޯރިޓީން މި ދަނީ ބަލަމުން،" އެންޑީއެމްއޭއިން ބުންޏެވެ.

ރޭ 18:33 ހާއިރު ހިނގި އެ އަލިފާނުގެ ހާދިސާ ހިނގީ ހިޔާގެ ފަސް ވަނަ ޓަވަރުގެ ނުވަ ވަނަ ފަންގިފިލާ އާއި 14 ވަނަ ފަންގިފިލާއާ ދެމެދުގެ ވައިގޮޅީގައި ހުރި އޭސީ އައުޓްޑޯ ޔުނިޓެއްގަ އެވެ.

އެ ޓަވަރުގެ ވައިގޮޅީގައި ހުރި ފެންހޮޅިތަކަށް ވަރަށް ބޮޑެތި ގެއްލުން ވަނީ ވެފަ އެވެ.