ރައީސުލްޖުމްހޫރިއްޔާ މުހައްމަދު މުއިއްޒު ކައުންސިލްތައް ބަދުނާމުކޮށް ވާހަކަދައްކަވަނީ ސަރުކާރުގެ ނާގާބިލުކަން ފޮރުވުމަށް ކަމަށް އިދިކޮޅު އެމްޑީޕީ އިން މިއަދު ބުނެފި އެވެ.

އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި އެ ޕާޓީގެ ކައުންސިލް އިންތިހާބުގެ ތަރުޖަމާން އަދި ދިއްދޫ ދާއިރާގެ ރައީސް އަބްދުﷲ ވަހީދު ވިދާޅުވީ، ކައުންސިލްތައް ބަދުނާމުވާ ގޮތަށް ރައީސް ވާހަކަ ދައްކަވަނީ ކައުންސިލްތަކަށް ޖެއްސުން ކުރުމުގެ ނިޔަތުގައި ކަމަށެވެ.

ރާއްޖޭގެ 57 ރަށެއްގެ ކައުންސިލުން ތަރައްގީގެ މަޝްރޫއުތަކަށް ހުރަސްއަޅާ ކަމަށް ރައީސް މުއިއްޒު ކުރެއްވި ތުހުމަތުތަކާ ގުޅިގެން ވަހީދު ވިދާޅުވީ، އެއީ ކޮން ރަށްތަކެއްތޯ ބެލުމަށް މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން (އާރްޓީއައި) ހުށަހަޅާފައިވާ ކަމަށެވެ. ނަމަވެސް، މިއަދާ ހަމައަށް ވެސް ސަރުކާރުން އެ މައުލޫމާތު ފޯރުކޮށްދީފައި ނުވާ ކަމަށާއި، އެފަދަ މައުލޫމާތެއް ސަރުކާރަށް ނުދެވޭނެ ކަމަށް އޭނާ ޗެލެންޖު ކުރެއްވި އެވެ.

"ސީދާ ކައުންސިލްތަކަށް ފުރައްސާރަ ކުރުމަށްޓަކައި ކައުންސިލްތަކަށް ޖެއްސުން ކުރުމަށްޓަކައި ރައީސުލްޖުމްހޫރިއްޔާ ދައްކާ ވާހަކަ. މި ސަރުކާރުގެ ނާގާބިލުކަން ފޮރުވަންވެގެން ރައީސުލްޖުމްހޫރިއްޔާ ދައްކާ ވާހަކަ،" ވަހީދު ވިދާޅުވި އެވެ.

އޭނާ އިތުރަށް ވިދާޅުވީ ސަރުކާރުން ދަނީ ކުރިއަށް އޮތް އިންތިހާބާ ދިމާކޮށް ވަޒީފާ ބަހައި، އިންތިހާބަށް އެކި ގޮތްގޮތުން ނުފޫޒު ފޯރުވަމުން ކަމަށާއި، އެކަމުގެ ހެކިތައް ވެސް ލިބިފައިވާ ކަމަށެވެ.

ލާމަރުކަޒީ ނިޒާމަށް މި ސަރުކާރުން ގެނައި ބަދަލުތަކަށް ފާޑުވިދާޅުވަމުން ވަހީދު ފާހަގަކުރެއްވީ، ކައުންސިލްތައް އެއްފަރާތްކޮށް ސަރުކާރުން ބޭނުންވާ މަޝްރޫއުތައް ހިންގޭ ގޮތަށް ގާނޫނު މިހާރު ބަދަލުކޮށްފައިވާ ކަމަށެވެ. އަދި ލޯކަލް ގަވަމަންޓް އޮތޯރިޓީ (އެލްޖީއޭ) ހިންގަނީ ސަރުކާރުން އުފެއްދި ކައުންސިލް މިނިސްޓްރީގެ ދަށުން ކަމަށްވާއިރު، ކައުންސިލަކުން ހުއްދަ ނުދީގެން މަޝްރޫއެއް ހުއްޓިފައި އޮތް ނަމަ، ކައުންސިލް ބައިޕާސްކޮށް އެ މަޝްރޫއެއް ކުރިއަށް ގެންދިއުމުގެ ބާރު ސަރުކާރަށް އޮންނާނެ ކަމަށް އޭނާ ވިދާޅުވި އެވެ.

އަންނަ އެޕްރީލް މަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިހާބާ ދިމާކޮށް ސަރުކާރުން މިފަދަ ތުހުމަތުތައް ކުރަމުންދާއިރު، އެ ދުވަހު ރިޔާސީ އިންތިހާބާއި މަޖިލިސް އިންތިހާބު އެއްކޮށްލުމާ މެދު ރައްޔިތުންގެ ފެންނަ ނުފެންނަ ވޯޓެއް ނެގުމަށް ވެސް ވަނީ ނިންމާފަ އެވެ.