އިންޑިއާ ކަނޑުގެ ސްރީލަންކާ ކައިރީގައި އޮތް އީރާނުގެ އަސްކަރީ މަނަވަރަކަށް އެމެރިކާގެ ސަބްމެރިންއަކުން ދިން ހަމަލާއެއްގައި 84 ފަޅުވެރިން މަރުވި ހާދިސާއަށްފަހު، އީރާނުގެ ދެވަނަ މަނަވަރެއް ސްރީލަންކާގެ ކަނޑުގެ ސަރަހައްދާ ގާތްކުރަމުންދާ ކަމަށް އެގައުމުގެ ސަރުކާރުން ބުރާސްފަތި ދުވަހު މަޖިލީހުގައި ހާމަކޮށްފި އެވެ.

ސްރީލަންކާގެ މީޑިއާ މިނިސްޓަރު ނަލިންދަ ޖަޔަތިއްސަ ވިދާޅުވި ގޮތުގައި، އީރާނުގެ މި މަނަވަރު މިހާރު އޮތީ ސްރީލަންކާގެ ކަނޑުގެ ސަރަހައްދުން ބޭރުގަ އެވެ. ނަމަވެސް އެކަމާ ގުޅޭ އިތުރު ތަފްސީލެއް އޭނާ ހާމައެއް ނުކުރައްވަ އެވެ. ރަސްމީ މަސްދަރުތަކުން މައުލޫމާތުދޭ ގޮތުގައި، ރައްކާތެރިކަން ހޯދުމަށްޓަކައި ސްރީލަންކާގެ ކަނޑުގެ ސަރަހައްދަށް ވަނުމަށް އީރާނުން އެދިފައިވާތީ، އެކަމާ މެދު ގޮތެއް ނިންމެވުމަށް ރައީސް އަނޫރާ ކުމާރަ ދިސާނަޔަކަ ވަނީ އިސް ބޭފުޅުންނާ ބައްދަލުކުރައްވާފަ އެވެ.

އީރާނުގެ އެ މަނަވަރުގައި 300 އެއްހާ ފަޅުވެރިންނާއި ތަމްރީނު ހޯދާ ކެޑޭޓުން ތިބި ކަމަށް ބެލެވެއެވެ. ބުދަ ދުވަހު ލަންކާގެ ދެކުނުއައްސޭރިން ބޭރުން ފައްތާލި މަނަވަރެކޭ އެއްފަދައިން، މި މަނަވަރަށް ވެސް ހަމަލާއެއް އަތުވެދާނެ ކަމުގެ ބިރު ވަނީ ހީވެފަ އެވެ.

އީރާނުގެ މަނަވަރު ރޭގެ ވަގުތެއްގައި ލަންކާ ކައިރިން ހަމަލާދީ ފައްތާލާފައިވަނީ، އެމެރިކާ އާއި އިޒްރޭލުން ގުޅިގެން އީރާނަށް ދެމުންދާ ހަމަލާތަކާ ގުޅިގެން މެދުއިރުމަތީގައި އުފެދިފައިވާ ހަނގުރާމަ ފުޅާވަމުންދާ ދަނޑިވަޅެއްގަ އެވެ. އީރާނުގެ ޚާރިޖީ ވަޒީރު އައްބާސް އަރަގްޗީ ވަނީ މި ހަމަލާ ކުށްވެރިކުރައްވައި، މިފަދަ ކަންކަން ފެށުމުގެ ނަތީޖާ ހިތިވާނެ ކަމަށް ވިދާޅުވެ ވޮޝިންޓަނަށް އިންޒާރު ދެއްވާފަ އެވެ.

އަރަގްޗީ އެކްސްގައި ކުރެއްވި ޕޯސްޓެއްގައި ވިދާޅުވީ، އިންޑިއާގެ ކަނޑުގެ ސިފައިންގެ މެހެމާނެއްގެ ގޮތުގައި އޮތް މަނަވަރަށް އެމެރިކާއިން ހަމަލާދިނީ އީރާނުގެ އައްސޭރިއާ 2,000 މޭލު ދުރުން، ބައިނަލްއަގުވާމީ ކަނޑުގެ ސަރަހައްދުގައި އެއްވެސް އިންޒާރެއް ދިނުމަކާ ނުލައި ކަމަށެވެ.

ސްރީލަންކާގެ ޚާރިޖީ ވަޒީރު ވިޖިތަ ހޭރަތު ވިދާޅުވި ގޮތުގައި، އޭނާ ވަނީ އީރާނުގެ ޚާރިޖީ ވަޒީރާ ވާހަކަދައްކަވައި، ހަމަލާތައް ވަރުގަދަވަމުންދާތީ އެކަމުގެ ކަންބޮޑުވުން ފާޅުކުރައްވައި، މަޝްވަރާގެ މަގު އިޚްތިޔާރު ކުރުމަށް ގޮވާލައްވާފަ އެވެ.

މި ހާދިސާގައި މަރުވި ފަޅުވެރިންގެ ހަށިތައް ލަންކާގެ ގޯލްގެ މޯޗަރީއަށް ގެންގޮސްފައިވާއިރު، މަރުވި މީހުންގެ އަދަދު 84 އަށް އަރާފައިވާ ކަމަށް ހޮސްޕިޓަލުން ވަނީ ކަށަވަރުކޮށްދީފަ އެވެ. ގިނަ އަދަދެއްގެ ހަށިތައް ބެލެހެއްޓުމަށްޓަކައި ކަމާބެހޭ ފަރާތްތަކުން ދަނީ ކޯލްޑް ސްޓޯރޭޖް ކޮންޓޭނަރުތައް ތައްޔާރުކުރަމުންނެވެ. ކަނޑުގެ ސިފައިންގެ ތަރުޖަމާނު ބުއްދިކަ ސަމްޕަތު ވިދާޅުވީ، ގެއްލިފައިވާ މީހުން ހޯދުމުގެ މަސައްކަތް އަދިވެސް ކުރިއަށްދާ ކަމަށެވެ.

ހަމަލާއިން ސަލާމަތްވި 32 މީހަކަށް ހޮސްޕިޓަލުގައި ވަރުގަދަ ސަލާމަތީ ފިޔަވަޅުތަކާއެކު ދަނީ ފަރުވާ ދެމުންނެވެ. އިންޓަނޭޝަނަލް ކޮމިޓީ އޮފް ދަ ރެޑް ކްރޮސް އިން ބުނީ، އަނިޔާވި މީހުންނަށް ބޭނުންވާ އެހީތެރިކަން ފޯރުކޮށްދިނުމަށް ލޯކަލް އޮތޯރިޓީތަކާ ގުޅިގެން މަސައްކަތް ކުރަމުންދާ ކަމަށެވެ.

ހަމަލާގެ ޝިކާރައަކަށްވި މަނަވަރަކީ އިންޑިއާގެ ވިޝާކަޕަޓްނަމްގައި ބޭއްވި އަސްކަރީ ތަމްރީނުތަކެއް ނިންމާލުމަށްފަހު އެނބުރި ދަތުރުކުރި މަނަވަރެކެވެ. މި ހާދިސާއާ ގުޅިގެން އިންޑިއާގެ ޚާރިޖީ ވަޒީރު އެސް. ޖައިޝަންކަރު ވެސް ވަނީ އީރާނުގެ ޚާރިޖީ ވަޒީރާ ފޯނުން ގުޅުއްވައި މަޝްވަރާ ކުރައްވާފަ އެވެ.

މެދުއިރުމަތީގެ މައްސަލަތަކުގައި ސްރީލަންކާ އަބަދުވެސް ގެންގުޅެނީ ވަކިފަރާތަކަށް ނުޖެހޭ ސިޔާސަތެކެވެ. އީރާނަކީ ސްރީލަންކާގެ ސައިފަތް ގަންނަ އެންމެ ބޮޑު އެއް ގައުމުކަން ފާހަގަކުރެ ވެއެވެ.