2023 ވަނަ އަހަރު ލަންޑަންގެ ނައިޓްކްލަބެއްގައި ހިންގި މާރާމާރީއަކާ ގުޅިގެން، އެމެރިކާގެ މަޝްހޫރު އާރްއެންޑްބީ ލަވަކިއުންތެރިޔާ ކްރިސް ބްރައުން އާންމު އިޖުތިމާއީ ނުކިޔަމަންތެރިކަން ނުވަތަ މާރާމާރީ ހިންގުމުގެ ކުށަށް ކޯޓުގައި އިއުތިރާފު ވެއްޖެ އެވެ.

ލަންޑަންގެ ސައުތުވާކް ކްރައުން ކޯޓުގައި ކުރިއަށްދިޔަ އަޑުއެހުމުގައި އުމުރުން 37 އަހަރުގެ ކްރިސް ބްރައުން މި ކުށަށް އިއުތިރާފުވުމާ ގުޅިގެން، އޭނާގެ މައްޗަށް މީގެ ކުރިން އުފުލާފައިވާ އަނިޔާވެރިކޮށް ހަމަލާދިނުމާއި ނުރައްކާތެރި ހަތިޔާރެއް (ފުޅިއެއް) ބޭނުން ކޮށްގެން ބޮޑު އަނިޔާއެއް ދޭން އުޅުމުގެ ސީރިއަސް ދައުވާތައް ޕްރޮސެކިއުޓަރުން ވަނީ އަނބުރާ ގެންގޮސްފަ އެވެ.

މި ހާދިސާ ހިންގާފައިވަނީ 2023 ވަނަ އަހަރުގެ ފެބްރުއަރީ މަހު، ލަންޑަންގެ މޭފެއާ ސަރަހައްދުގައި ހުންނަ "ޓޭޕް" ނައިޓްކްލަބުގަ އެވެ. ދައުވާކުރާ ފަރާތުން ބުނާ ގޮތުގައި، ކްރިސް ބްރައުން ވަނީ މިއުޒިކް ޕްރޮޑިއުސަރެއް ކަމަށްވާ އަބްރަހާމް ދިއާވްގެ ބޮލުގައި ޓެކީލާ ފުޅިއަކުން ދެފަހަރަށް ޖަހައި ބޮޑެތި އަނިޔާތަކެއް ދީފަ އެވެ.

މި މައްސަލައިގައި ކްރިސްއާއެކު އޭނާގެ ރަހުމަތްތެރިޔާ އަދި ވޯކަލް ކޯޗު އޮމޯލޯލޫ އަކިންލޯލޫ (40 އަހަރު) ވެސް ވަނީ މާރާމާރީގެ ކުށަށް އިއުތިރާފުވެފަ އެވެ.

ދައުވާކުރާ ފަރާތުގެ ވަކީލުން ބުނި ގޮތުގައި މިއީ އެއްވެސް ސަބަބެއް ނެތި، އާންމުން އެއްވެ ތިބި ތަނެއްގައި ހިންގި ނުރައްކާތެރި މާރާމާރީ އެކެވެ.

ގާނޫނުގެ ކުރިމަތީގައި އެއްވެސް މީހަކީ މަތީގައިވާ މީހެއް ނޫންކަން ސާބިތު ކޮށްދިނުމަށް އިނގިރޭސިވިލާތުގެ ކަމާބެހޭ އިދާރާ ތަކުން މަސައްކަތް ކުރާނެ ކަމަށް ވެސް އެ ފަރާތްތަކުން ފާހަގަކުރި އެވެ.

މި މައްސަލައިގައި ކްރިސް ބްރައުންއާއި އޭނާގެ ބައިވެރިޔާގެ މައްޗަށް ހުކުމް ކުރުން އޮންނާނީ އަންނަ އޮކްޓޫބަރު މަހުގެ 26 ވަނަ ދުވަހު އެވެ.

އިނގިރޭސި ވިލާތުގެ ގާނޫނު ބުނާ ގޮތުން އާންމު ތަނެއްގައި ބިރުވެރިކަން އުފެދޭ ގޮތަށް މާރާމާރީ ހިންގުމުގެ ކުށަށް އެންމެ ބޮޑުވެގެން ތިން އަހަރުގެ ޖަލު ހުކުމެއް އަތުވެދާނެ އެވެ.

ކްރިސް ބްރައުން ހައްޔަރު ކޮށްފައިވަނީ މީގެ ކުރިން 2025 ވަނަ އަހަރުގެ މެއި މަހު އިނގިރޭސި ވިލާތަށް ޓުއާއެއްގެ ތެރެއިންނެވެ. ނަމަވެސް، 5 މިލިއަން ޕައުންޑުގެ ކަފާލާތެއް ދެއްކުމަށްފަހު އޭނާ ވަނީ ދުނިޔޭގެ އެކި ކަންކޮޅުތަކުގައި ކޮންސަޓްތައް ބޭއްވުމުގެ ހުއްދައާއެކު ދޫކޮށްލާފަ އެވެ.

މިއީ ކްރިސް ބްރައުންގެ މާޒީގައި މާރާމާރީއާއި ގާނޫނީ މައްސަލަތަކާ ކުރިމަތިލާން ޖެހުނު ފުރަތަމަ ފަހަރެއް ނޫނެވެ. މީގެ ކުރިން 2009 ވަނަ އަހަރު މަޝްހޫރު ލަވަކިއުންތެރިޔާ ރިއާނާއަށް އަނިޔާކުރި މައްސަލައިގައިވެސް އޭނާ ވަނީ ކުށަށް އިއުތިރާފުވެފަ އެވެ.