Nepal ah eheevumah Raajje in 1 million Rufiya hadhiyaa koffi

ނޭޕާލާއި ޗައިނާ ގުޅޭ ބޯޑަރު ސަރަހައްދުގެ ފަރުބަދަމަތިން ބިޔަ ގަނޑުފެންގަނޑެއް (ގްލޭސިއާއެއް) ކަނޑައިގެން ވެއްޓި ހިނގި ކުއްލި ފެންބޮޑުވުމާއި ކިސަޑު ފޭބުމުގެ ނުރައްކާތެރި ހާދިސާއާ ގުޅިގެން، އެ ގައުމުގެ ޑިޒާސްޓާ ރިލީފް ފަންޑަށް ރާއްޖެއިން އެއް މިލިއަން ރުފިޔާ ހަދިޔާކޮށްފި އެވެ.

ރައީސް އޮފީހުން މިއަދު ހާމަކުރި ގޮތުގައި، މިދިޔަ އޮގަސްޓް މަހުގެ 26 ވަނަ ދުވަހު ނޭޕާލަށް ކުރިމަތިވި މި ހިތާމަވެރި ހާދިސާއާ ގުޅިގެން ހިންގާ އިންސާނީ އެހީތެރިކަމުގެ މަސައްކަތްތަކަށް އެއްބާރުލުން ދިނުމުގެ ގޮތުން، އެ ގައުމުގެ "ޕްރައިމް މިނިސްޓާ ޑިޒާސްޓާ ރިލީފް ފަންޑު" އަށް އެއް މިލިއަން ރުފިޔާ ހަދިޔާކުރެއްވުމަށް ރައީސް މުހައްމަދު މުއިއްޒު ނިންމަވާފައިވާ ކަމަށެވެ.

މި އެހީއަކީ ސަރަހައްދީ އެއްބައިވަންތަކަން ދެމެހެއްޓުމަށާއި، މިފަދަ ނުރައްކާތެރި އަދި ދަތި ދަނޑިވަޅުތަކުގައި އެކުވެރި ގައުމުތަކާ އެކު ރާއްޖެ ސާބިތުކަމާއެކު އޮތްކަން ހާމަކޮށްދިނުމުގެ ގޮތުން ދިން އެހީއެއް ކަމަށް ރައީސް އޮފީހުން ބުންޏެވެ. އަދި މި ހާދިސާގައި ގިނަ އަދަދެއްގެ ބަޔަކު މަރުވެ، ބޮޑެތި ގެއްލުންތަކެއް ލިބުމާ ގުޅިގެން، ރައީސް މުއިއްޒު ވަނީ ނޭޕާލުގެ ސަރުކާރަށާއި ރައްޔިތުންނަށް ތައުޒިޔާ ވިދާޅުވެ، ހަމްދަރުދީ ފާޅުކުރައްވާފަ އެވެ.

ރާއްޖެއާއި ނޭޕާލާ ދެމެދު 1980 ވަނަ އަހަރު ސިޔާސީ ގުޅުން ގާއިމުކުރި ފަހުން ދެ ގައުމުގެ ދެމެދުގައި ވަރަށް ބަދަހި ގުޅުމެއް އޮންނައިރު، މިފަދަ ހާލަތްތަކުގައި ސަރަހައްދީ ގައުމުތަކަށް އެހީތެރިކަން ފޯރުކޮށްދިނުމުގައި ރާއްޖެއިން އަބަދުވެސް ދެމިއޮންނާނެ ކަމަށް ސަރުކާރުން ބުނެ އެވެ.

މި ކާރިސާގައި ނޭޕާލުން މިހާތަނަށް 1،114 މީހުން މަރުވެފައިވާއިރު، ޗައިނާގެ ސަރަހައްދުން ވެސް 16 މީހަކު ވަނީ މަރުވެފަ އެވެ. މީގެ އިތުރުން، ބޭރު ގައުމުތަކުގެ 583 ފަތުރުވެރިން ހިމެނޭހެން 4،462 މީހުން ވީނުވީއެއް ނޭނގި ވަނީ ގެއްލިފަ އެވެ. އަދި ތުރިޝޫލީ ކޯރު ކައިރީގައި ހުރި ހައިޑްރޯޕަވަ މަޝްރޫއުތަކުގެ ތެރޭގައި 500 އާއި 600 އާ ދެމެދުގެ އަދަދަކަށް މީހުން ތާށިވެފައި ތިބި ކަމަށް ބެލެވޭތީ، އެ މީހުން ސަލާމަތްކުރުމުގެ މަސައްކަތް ސަލާމަތީ ފަރާތްތަކުން ދަނީ ކުރަމުންނެވެ.

މި ހާދިސާގައި ލިބުނު ބޮޑެތި ގެއްލުންތަކުން އަރައިގަތުމަށްޓަކައި އެތައް ބިލިއަން ޑޮލަރެއް ހޭދަވާނެ ކަމަށް ނޭޕާލްގެ ފޮރިން މިނިސްޓަރު ޝިޝީރު ހާނާލް ވަނީ ވިދާޅުވެފަ އެވެ.