ޔަމަނުގެ ހޫތީން ސައުދީ އަރަބިއްޔާގެ ވެރިރަށް ރިޔާދުގައި ހުންނަ އަރަމްކޯގެ މަރުކަޒަކަށް މިސައިލާއި ޑްރޯން ބޭނުންކޮށްގެން ހަމަލާދީފި ކަމަށް އެ ޖަމާއަތުން ބުނެފި އެވެ.

އީރާނާ ގުޅުން އޮންނަ ހޫތީން ހޮނިހިރު ދުވަހު ހާމަކުރި ގޮތުގައި، ރިޔާދުގައި ހުންނަ އަރަމްކޯގެ މަރުކަޒަށް ބެލިސްޓިކް މިސައިލާއި ޑްރޯން ބޭނުންކޮށްގެން ހަމަލާދީފައިވަނީ، ސައުދީ އަރަބިއްޔާއިން ޔަމަނުގެ ސަންއާ އަދި އެހެނިހެން ސަރަހައްދުތަކަށް ދެމުންދާ ހަމަލާތަކުގެ ބަދަލު ހިފުމުގެ ގޮތުންނެވެ.

ރޮއިޓާސްއިން ރިޕޯޓުކުރި ގޮތުގައި، ހޮނިހިރު ދުވަހުގެ ކުރީކޮޅު ރިޔާދުގައި ހުންނަ އަރަމްކޯ މަރުކަޒު ހުރި ސަރަހައްދުން ބޯ ދުންތަކާއި އަލިފާންގަނޑެއް އަރަމުންދާތަން ފެނިފައިވެ އެވެ.

ނަމަވެސް، އަރަމްކޯގެ މަރުކަޒަކަށް ހަމަލާއެއް ދީފައިވާކަން ސައުދީގެ ކަމާބެހޭ ފަރާތްތަކުން އަދި ކަށަވަރުކޮށްދީފައެއް ނުވެ އެވެ. އަދި މިކަމާ ގުޅޭގޮތުން އަރަމްކޯއިން ވަކި އެއްޗެއް ބުނެފައެއް ނުވެ އެވެ.

މި ހަމަލާދީފައިވާ ކަމަށް ރިޕޯޓްކޮށްފައި މިވަނީ، ސައުދީ އަރަބިއްޔާގެ ސިޓީތަކަށާއި ހަކަތަ އުފައްދާ މަރުކަޒުތަކަށް ހޫތީން ދެމުންދާ ހަމަލާތައް ވަރުގަދަކޮށް، ދެފަރާތުގެ މެދުގައި ހަމަނުޖެހުންތައް އިތުރުވެފައިވާ ދަނޑިވަޅެއްގަ އެވެ.

މިދިޔަ ހަފުތާގައި ވެސް ޔަންބޫގައި ހުންނަ ސައުދީ އަރަމްކޯގެ މަރުކަޒުތަކަށް މިސައިލާއި ޑްރޯން ބޭނުންކޮށްގެން ހަމަލާދީފައިވާ ކަމަށް ހޫތީން ބުނެފައިވެ އެވެ. އެ ފަހަރު ސައުދީ އަރަބިއްޔާއިން ބުނީ، ތާއިފާއި ޔަންބޫ ސަރަހައްދަށް އަމާޒުކޮށް ހޫތީން ފޮނުވާލި ހަ ބެލިސްޓިކް މިސައިލެއް ހުއްޓުވާފައިވާ ކަމަށާއި، އަރަމްކޯގެ އެއްވެސް ތަނަކަށް ގެއްލުމެއް ލިބިފައި ނުވާ ކަމަށެވެ.