ތެލް އަވީވް (13 ޖޫން) - ފާއިތުވި މެއި މަހު އިޒްރޭލާއި ފަލަސްތީނުގެ ހަމާސް ޖަމާއަތާ ދެމެދު ކުރިއަށްދިޔަ ހަމަލާ ބަދަލުކުރުންތަކުގައި ހަމާސްގެ ހަމަލާތައް ހުއްޓުވުމަށް އިޒްރޭލުން ނާކާމިޔާބު ވެފައިވާ ކަމަށް އެ ގައުމުގެ އަސްކަރިއްޔާގެ ވެރިޔާ ސްޓާފް ޖެނެރަލް އަވީވް ކޮޗަވީ އެއްބަސް ވެއްޖެ އެވެ.

މަގާމާ ހަވާލުވުމަށްފަހު ބޭއްވި ނޫސްވެރިންގެ ބައްދަލުވުމެއްގައި ކޮޗަވީ ވިދާޅުވީ ޣައްޒާއާއި ހަމާސް ޖަމާއަތާ ބެހޭ އާ ސަޔާސަތުތަކެއް އިޒްރޭލުން އެކުލަވާލަން ޖެހިފައިވާ ކަމަށެވެ.

"ފާއިތުވި ތަނުގައި ހިނގާދިޔަ އެއްވެސް ކަމެއް ދެން ތަކުރާރެއް ނުވާނެ،" އޭނާ ވިދާޅުވި އެވެ.

ކޮޗަވީ އިތުރަށް ވިދާޅުވީ އިޒްރޭލުން ފަލަސްތީނާ ދެކޮޅަށް ކުރިއަށްގެންދިޔަ ހަނގުރާމައިގެ އަސަރު ތެދުވެރިކަމާއި އިންސާފުވެރިކަމާއެކު ބަލަންޖެހޭ ކަމަށާއި ދިގު މުއްދަތުގެ ކާމިޔާބީ ހޯދޭނީ އެގޮތުގެ މަތިން ކަމަށެވެ.

ފަލަސްތީނުގެ 260 މީހުން ޝަހީދު ކޮށްލި ހަމަލާ ބަދަލުކުރުންތައް ހިނގާފައި ވަނީ މެއި މަހުގެ 10 ވަނަ ދުވަހުން ފެށިގެން 11 ދުވަސް ވަންދެނެވެ.

އިޒްރޭލުގެ ހަމަލާތަކަށް ޣައްޒާގައި ވެރިކަންކުރާ ހަމާސް ޖަމާއަތުން ވަނީ ވައިގެ މަގުން ރައްދުދީފަ އެވެ. އެގޮތުން 4،000 ރޮކެޓް މިސައިލް އިޒްރޭލާ އަމާޒުކޮށް އެ ޖަމާއަތުން ފޮނުވާލާފައިވާއިރު، އެ ހަމަލާތަކުގައި އިޒްރޭލުގެއެކު ސަރަހައްދުތަކަށް ވަނީ ގެއްލުން ލިބިފަ އެވެ.

ހަމާސް ޖަމާއަތުން މީގެ ކުރިން ބުނެފައި ވަނީ އެ ޖަމާއަތުގެ 10،000 މުޖާހިދުން ޝަހީދުކޮށްލުމަށް އިޒްރޭލުން އަމާޒު ހިފާފައިވީ ނަމަވެސް ހަނގުރާމައިގައި ޝަހީދުވީ ގިނަވެގެން 90 މުޖާހިދުން ކަމަށެވެ. -- ޕްރެސް ޓީވީ