ކޮވިޑް ބައްޔަށް ފަރުވާ ހޯއްދަވަމުން ދަނިކޮށް ސުމުއްވުލް އަމީރު އިބްރާހީމް ފާމުލަދޭރި ކިލޭގެފާނުގެ ދަރިކަނބަލުން ޖަމީލާ އިބްރާހިމް ދީދީ އަވަހާރަވެއްޖެ އެވެ.

އެކަމަނާ އަވަހާރަވީ ދަރުމަވަންތަ ހޮސްޕިޓަލްގައި ފަރުވާދެމުން ދަނިކޮށް މިރޭގެ ވަގުތެއްގަ އެވެ.

އެކަމަނާއަކީ ކުރީގެ ބޮޑުވަޒީރު އަމީރު އިބްރާހީމް ފާމުލަދޭރި ކިލޭގެފާނުގެ އެންމެ ދޮށީ ދަރިކަނބަލުންނެވެ.

އަވަހާރަވިއިރު އެކަމަނާގެ އުމުރުފުޅަކީ 90 އަހަރެވެ. ޖަމީލާ އަކީ ރައްޔިތުންގެ މަޖިލީހުގެ ކުރީގެ ރައީސް ފަޟީލަތުއްޝައިހު އަހުމަދު ޝާތިރުގެ އަނބިކަނބަލުންނެވެ.

ޖަމީލާގެ ބައްޕާފުޅު އަމީރު އިބްރާހީމް ފާމުލަދޭރި ކިލޭގެފާނަކީ 1954 އިން 1957 އަށް ރާއްޖޭގެ ބޮޑުވަޒީރުކަން ކުރައްވާފައިވާ ބޭފުޅެކެވެ.

ރާއްޖެއިން ކޮވިޑްގައި މަރުވި މީހުންގެ އަދަދު މިހާރު މިވަނީ 211 އަށް އަރާފަ އެވެ.