އިންޑިއާގައި އެންމެ މޮޅު އެކްޓަރުންގެ ލިސްޓްގައި ގުނަލާވޭ މަޝްހޫރު އެކްޓަރު ރިޝީ ކަޕޫރުގެ އެންމެ ފަހު ފިލްމުގެ ޕޯސްޓަރު ދައްކާލައިފި އެވެ.

ކެންސަރަށް ފަރުވާ ހޯދަމުން ގެންދަނިކޮށް މިދިޔަ އަހަރުގެ އޭޕްރިލް 30 ގައި ރިޝީ މަރުވިއިރު، އޭނާ ކުޅެމުން ދިޔަ ފިލްމު "ޝަރުމާޖީ ނަމްކީންސް"ގެ މަސައްކަތް ވަނީ ނުނިމި އެވެ.

ރިޝީގެ އުފަން ދުވަހާ ދިމާކޮށް އެކްސެލުން މިވަނީ މި ފިލްމުގެ ފަސްޓްލުކް ރިޝީގެ ފޭނުންނަށް ދޫކޮށްލާފަ އެވެ. މި ފިލްމުގައި ރިޝީއަށް ފުރިހަމަ ނުކުރެވުނު ބައި އޭނާގެ ބަދަލުގައި ކުޅެދީފައި ވަނީ ޕަރޭޝް ރަވޭލް އެވެ.

ރިޝީ ފިލްމުގައި ފެންނާނެ ގޮތުގެ ޕޯސްޓަރާކާއެކު ޕަރޭޝް ވެސް ފެންނާނެ ގޮތް އެކްސެލުން ވަނީ ދައްކާލާފަ އެވެ. މި ފިލްމުގައި ޖޫހީ ވެސް މުހިއްމު ރޯލެއް އަދާކުރެ އެވެ.

ރިޝީ އާއި ޕަރޭޝް ވެސް ފެންނަ ޕޯސްޓަރު ދައްކާލުމަށްފަހު، އެކްސެލުން ބުނީ ރިޝީގެ ފަހު ފިލްމު ގެނެސްދޭވޭތީ ފަޚްރުވެރިވާ ކަމަށެވެ. އަދި މިއީ ރިޝީގެ މިލިއަނުން ގުނާލެވޭ ފޭނުންނަށް ދޫކޮށްލާ ހަދިޔާއެއް ކަމަށް ވެސް އެކްސެލުން ވަނީ ބުނެ އެވެ.

ރިޝީގެ ބަދަލުގައި ޕަރޭޝް މި ފިލްމު ނިންމާދީފައިވާތީ ޕަރޭޝްއަށް އެކްސެލުން ވަނީ ޝުކުރު އަދާކޮށްފަ އެވެ.

https://www.instagram.com/p/CTY1Z02CIBW/?utm_source=ig_embed&ig_rid=b5c4d35d-9389-45f9-b3f8-98ad62cad908

އެކްސެލް އެންޓަޓެއިންމަންޓާއި މެކްގަފިން ޕިކްޗާސްއިން ޕްރޮޑިއުސްކުރާ މި ފިލްމު ޑައިރެކްޓްކޮށްފައި ވަނީ ހިތޭޝް ބާޓިއާ އެވެ. މި ފިލްމު އުފައްދާފައި ވަނީ ސާދާ މިޒާޖެއްގެވެރި 60 އަހަރުގެ ދުވަސްވީ މީހަކަށް ދިމާވާ ހާދިސާތަކެއްގެ މައްޗަށް ބިނާކޮށެވެ.

ރިޝީގެ އެންމެ ފަހު ފިލްމު ނެރޭނެ ދުވަހެއް އަދި އިއުލާނެއް ނުކުރެ އެވެ.

ލޭގެ ކެންސަރު ބަލީގައި ރިޝީ މަރުވި އިރު، އޭނާ އެންމެ ފަހުން ފެނިފައިވާ ފިލްމަކީ 2019 ގެ ޑިސެމްބަރުގައި ރިލީޒްކުރި އިމްރާން ހާޝިމީގެ ތުރިލާ "ބޮޑީ" އިންނެވެ.