މަލައިކާ ޖަޖްކުރި ފަސް ރިއަލިޓީ ޝޯ

ބޮލީވުޑްގެ ގިނަ އައިޓަމް ލަވަތަކުން ފެނި ގިނަ ބައެއްގެ މަގުބޫލްކަން ހޯދި މަލައިކާ އަރޯރާއަކީ މިވަގުތު ހުރި އެންމެ "ޑިމާންޑް" ބޮޑު އެއް ޖަޖޭ ބުނުމަކުން ގޯހަކަށް ނުވާނެ އެވެ.

އޭނާގެ ކެރިއަރުގައި އޭނާ ވަނީ ގިނަ ޑާންސް ޝޯތަކެއް ޖަޖު ކޮށްފަ އެވެ. މިފަހަރު މި ބަލައިލަނީ މަލައިކާ ޖަޖު ކުރި 5 ޑާންސް ޝޯއަށެވެ.

ނަޗް ބަލިޔޭ

ސްޓާ ވަންއިން ދެ ސީޒަން ދެއްކުމަށްފަހު ފަހުން ސްޓާ ޕްލަސްއިން ގެނެސްދިން ކަޕްލް ޑާންސް ޝޯ "ނަޗް ބަލިޔޭ"އަކީ މަލައިކާ ޖަޖުކަން ކުރި ފުރަތަމަ ޝޯ އެވެ. ޒަވާޖީ ގޮތުން ގުޅިގެން އުޅޭ ފަރާތްތަކާއި ލޯބިވެރިންނަށް ޚާއްސަކޮށް ގެނެސްދޭ މި ޝޯގެ 10 ސީޒަން ނިންމާލާފައިވާއިރު މަލައިކާއަކީ ސީޒަން 1 އަދި 2 ގެ ޖަޖެވެ.

ފުރަތަމަ ސީޒަންގައި މަލައިކާއާއެކު ޖަޖުން ޕެނަލްގައި ހިމެނެނީ ސަރޯޖް ޚާނާއި ފަރްހާން އަޚްތަރެވެ. ދެވަނަ ސީޒަން ޖަޖުކުރީ މަލައިކާއާއި ސަރޯޖްގެ އިތުރުން ކުނާލް ކޯލީ އެވެ.

ސުޕަ ޑާންސާ ޗެޕްޓަރު 4

މިހާރު ސްޓާ ޕްލަސްއިން ގެނެސްދޭ ކުޑަކުދިންގެ ޑާންސް ޝޯ "ސުޕަ ޑާންސާ ޗެޕްޓަރު 4" އަކީ ކުރިން ޝިލްޕާ ޝެޓީ ޖަޖުކުރި ޝޯއެކެވެ. މަލައިކާ ޝޯއާ ގުޅުނީ ކޮވިޑާ ގުޅިގެން ޝިލްޕާއަށް ޝޫޓިން ލޮކޭޝަނަށް ދެވޭގޮތް ނުވެގެން ޝޯ ދޫކޮށްލުމުންނެވެ.

ސުޕަ ޑާންސާގެ ޖަޖުންނަކީ މަލައިކާގެ އިތުރުން ގީތާ ކަޕޫރާއި ޓެރެންސް ލުވިސް އަދި އަނޫރާގް ބާސޫއެވެ.

ޖަލަކް ދިކްލާ ޖާ

ސެލެބްރިޓީ ޑާންސް ޝޯ "ޖަލަކް ދިކްލާ ޖާ" އަކީ ވެސް މަލައިކާ ޖަޖުކުރި ޝޯއެކެވެ. އޭގެ ހަތަރު ވަނަ ސީޒަނާއި 8 ވަނަ ސީޒަން ޖަޖުކުރިއިރު 8 ވަނަ ސީޒަންގައި މަލައިކާ އައީ ކަރަން ޖޯހަރްގެ ބަދަލުގަ އެވެ. ހަތަރު ވަނަ ސީޒަންގެ ޖަޖުންނަކީ މަލައިކާގެ އިތުރުން ރެމޯ ޑީ ސޫޒާއާއި މަދޫރީ ދިކްޝިޓެވެ. އަށް ވަނަ ސީޒަންގެ ޖަޖުންނަކީ މަލައިކާގެ ޝާހިދު ކަޕޫރާއި ލައުރެން ގޮތުލީބްއާއި ގަނޭޝް ހެގްޅޭ އެވެ. ކާމިޔާބުކަމާއެކު 9 ސީޒަން ނިންމާލާފައިވާއިރު 10 ވަނަ ސީޒަން މިއަހަރު ޖުލައިގައި ފަށާނެ އެވެ.

އިންޑިއާސް ބެސްޓް ޑާންސާ

"އިންޑިއާސް ބެސްޓް ޑާންސާ"އަކީ މުޅި އިންޑިއާއަށް ހުޅުވާލައިގެން މިދިޔަ އަހަރު ބޭއްވި ޑާންސް ރިއަލިޓީ ޝޯއެކެވެ. ބާރްތީ ސިންގއާއި އޭނާގެ ފިރިމީހާ ހާރްޝް ލިމްބާޗިޔާ ހުށަހަޅައިދިން މި ޝޯވގެ ޖަޖުކަންކުރީ މަލައިކާގެ އިތުރުން ގީތާ ކަޕޫރާއި ޓެރެންސް ލުވިސް އެވެ. އަދި ޚާއްސަ ޖަޖެއްގެ ގޮތުގައި ނޯރާ ފަތޭހީ ވެސް ދެތިން ހަފުތާގައި ބައިވެރިވި އެވެ. ޝޯގެ އެއްވަނައަށް ހޮވުނީ ޓައިގާ ޕޮޕް އެވެ. ދެވަނަ ސީޒަން މިއަހަރު ފަށާނެ އެވެ.

އިންޑިއާސް ގޮޓް ޓެލެންޓް

ތަފާތު ހުނަރުތައް ދައްކާލުމަށް އިންޑިއާގެ މީހުންނަށް ހުޅުވާލި ޝޯ "އިންޑިއާސް ގޮޓް ޓެލެންޓް"ގެ 8 ސީޒަން ގެނެސްދީފައިވާ އިރު 4 ވަނަ ސީޒަނުން ފެށިގެން މަލައިކާއަކީ ޖަޖިން ޕެނަލްގެ މެންބަރެކެވެ. މަލައިކާގެ އިތުރުން ޖަޖުންގެ ތެރޭގައި ހިމެނެނީ ކިރޮން ކޭރްއާއި ކަރަން ޖޯހަރެވެ.

މި ޝޯވތަކުގެ އިތުރުންވެސް މަލައިކާ ޖަޖުކުރި އެހެން ޝޯތައް އެބަހުއްޓެވެ. އޭގެ ތެރޭގައި "ޕާފެކްޓް ބްރައިޑް"، "އިންޑިއާސް ނެކްސްޓް ޓޮޕް މޮޑެލް" އަދި "އެމްޓީވީ ސުޕަމޮޑެލް އޮފް ދަ ޔިއާ" ހިމެނެއެވެ. މަލައިކާގެ ފާހަގަކޮށްލެވޭ ލަވަތަކުގެ ތެރޭގައި "ޗައްޔާ ޗ ައްޔާ"، "މުންނީ ބަދުނާމް ހުއީ"، "އަނާރްކަލީ ޑިސްކޯ ޗަލީ" އަދި "ޕާންޑޭޖީ ސީޓީ" ހިމެނެ އެވެ.