ދައުލަތުގެ އެހީތެރިކަމުގެ ދަށުގައި ތިބޭ ކުޑަކުދިންނަށް އާޓް އަދި މިއުޒިކް ތެރެޕީ ސެޝަން ހިންގައިދިނުމަށް ރާއްޖެއާއެކު މަސައްކަތް ކުރުމަށް ޔުނައިޓެޑް ނޭޝަންސް އިންސްޓިޓިއުޓް ފޯ ޓްރެއިނިން އެންޑް ރިސާޗް (ޔުނިޓާ) އަދި ގްލޯބަލް ފައުންޑޭޝަން ފޯ ޕަފޯމިން އާޓްސް (ޖީއެފްޕީއޭ) އިން އެއްބަސްވެއްޖެ އެވެ.

އެފަދަ ޕްރޮގްރާމެއް ހިންގުމަށް އެއްބަސްވެވަޑައިގެންފައި ވަނީ ރައީސުލްޖުމްހޫރިއްޔާގެ ދެކަނބަލުން ނިއުޔޯކަށް ކުރައްވަމުން ގެންދަވާ ދަތުރުގައި، ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދު، ޔުނިޓާގެ ނިއުޔޯކް އޮފީހުގެ ހެޑާއި، ޖީއެފްޕީއޭގެ އެގްޒެކެޓިވް ޑިރެކްޓަރު ލޫސިއާ ޖޭ. ގުއޯ އާއި، ޖީއެފްޕީއޭގެ އާޓިސްޓް ރޮސްޓާގައި ހިމެނޭ ޕިއަނިސްޓެއް ކަމަށްވާ ބައިރޮން ޒޫއޮ އާއި ކުރެއްވި ބައްދަލުވުމެއްގަ އެވެ.

މި ބައްދަލުކުރެއްވުމުގައި ޔުނިޓާ އާއި ޖީއެފްޕީއޭގެ ފަރާތުން ބައިވެރިވެވަޑައިގެންނެވި ބޭފުޅުން ވަނީ އާޓް އަދި މިއުޒިކަކީ އިލްމީ ކަންކަމާއި ސިއްްހީ ދުޅަހެޔޮކަމަށް ގިނަ ގުނަ ފައިދާތަކެއް ލިއްބައިދޭ އެއްޗެއްކަން ފާހަގަކުރައްވައި، ދުނިޔޭގެ ނަން މަޝްހޫރު ބޮޑެތި ޔުނިވަސިޓީތަކާއި ގުޅިގެން ކުރިޔަށްގެންދާ ބައެއް އޮންލައިން ކޯސްތަކާ ގުޅޭ މަޢުލޫމާތުތައް ހިއްސާކުރައްވާފަ އެވެ.

މިގޮތުން ރާއްޖޭގައި ދައުލަތުގެ އެހީތެރިކަމުގައި ތިބޭ ކުޑަކުދިންނަށް ހާއްސަކޮށްގެން، އެފަދަ ޕްރޮގްރާމެއް ފަރުމާކޮށް ހިންގުމަށް ރާއްޖޭގެ ކަމާބެހޭ ފަރާތްތަކާއެކު ވީ އެންމެ އަވަހަކަށް މަޝްވަރާތައް ފައްޓަވާނެ ކަމަށް ޔުނިޓާ އަދި ޖީއެފްޕީއޭއިން ވަނީ އެއްބަސްވެވަޑައިގެންފަ އެވެ.

މީގެ އިތުރުން ސްކޫލް ކުދިންނަށް އާޓް އެންޑް މިއުޒިކް ތެރަޕީ ފޯރުކޮށްދިނުމަށް ޓްރެއިން- ދަ- ޓްރެއިންނާ އުސޫލުން ރާއްޖޭގެ ޓީޗަރުންނަށް ވެސް ސެޝަންތަކެއް ކުރިޔަށް ގެންގޮސްދިނުމަށް ތައްޔާރަށް ތިއްބެވިކަމަށް މި ބައްދަލުވުމުގައި އެ ބޭފުޅުން ވިދާޅުވެފައިވެ އެވެ.