ލަންޑަން (30 ސެޕްޓެމްބަރު)- އިނގިރޭސިވިލާތުގައި ތެލުގެ ދަތިކަން ކުރިމަތިވެފައިވާ މި ދަނޑިވަޅުގައި ގައުމުގެ އެކި ހިސާބުތަކުގައި ހުރި ހުސްވެފައިވާ ތެޔޮ ވިއްކާ ސްޓޭޝަންތަކަށް ތެޔޮ އުފުލަން އެ ގައުމުގެ އަސްކަރިއްޔާއިން ނުކުމެއްޖެ އެވެ.

އެ ގައުމަށް ތެޔޮ އުފުލުމުގެ ދަތިކަން ކުރިމަތިވެފައިވާތާ ހަފްތާއެއް ވެފައިވާއިރު، އެއްގަމު އުޅަނދު ގެންގުޅޭ އާއްމުން ވަނީ އެއްފަހަރާ ގިނަ އަދަދަކަށް ތެޔޮ ގަނެފަ އެވެ. ނަތީޖާއަކަށްވީ ތެލުގެ ތާށިކަން އިތުރުވުމެވެ.

އެ ގައުމުގެ ތެޔޮ ކުންފުނިތަކުން ވަނީ ކާރުހާނާތަކުން ފިއުލް ސްޓޭޝަނަށް ތެޔޮ އުފުލާނެ ޑްރައިވަރުން މަދު ކަމަށް ބުނެ ކަންބޮޑުވުން ފާޅުކޮށްފަ އެވެ.

އިދިކޮޅު ފަރާތްތަކުން ބުނާ ގޮތުގައި ގައުމު މިހާލަތަށް ދާން ޖެހުނީ ސަރުކާރުން ގެންގުޅުނު ނާގާބިލް ސިޔާސަތުތަކުގެ ސަބަބުންނެވެ. ނަމަވެސް ސަރުކާރުން ވަނީ މި ތުހުމަތުތައް ދޮގުކޮށް މިއީ ކޮވިޑް 19ގެ ޕެންޑަމިކްގެ ސަބަބުން ކުރިމަތިވި ކަމެއް ކަމަށް ބުނެފަ އެވެ.

އެ ގައުމުގެ ބިޒްނަސް މިނިސްޓަރު ވާސީ ވާޓެންގް ވިދާޅުވީ 150 އަށްވުރެ ގިނަ އަސްކަރީ ސިފައިން ޓޭންކުތައް ހިންގުމުގައި ހަރަކާތްތެރިވާނެ ކަމަށާއި ވަރަށް އަވަހަށް އެކި ހިސާބުތަކަށް ތެޔޮ ފޯރުކޮށްދެވޭނެ ކަމަށެވެ.

ތެޔޮ ލިބުން ދަތިވުމާއެކު އިނގިރޭސި ވިލާތުގެ ވިޔަފާރިތަކަށް ބުރޫ އަރައި އިގްތިސާދަށް ވަނީ ވަރަށް ބޮޑު ހީނަރުކަމެއް ލިބިފަ އެވެ. -- ރޮއިޓާސް