ހިލޭ ގިނަ ކަންތައްތައް ކޮށްދޭ، މާލޭގައި ހުންނަ މަޝްހޫރު ހަސަންފުޅު ގަރާޒްގެ ވެރިޔާ ހަސަން ގާސިމް (ހަސަން ފުޅު) ނިޔާވެއްޖެ އެވެ.

އުމުރުން 76 ހަސަންފުޅު ނިޔާވީ ރޭގެ ވަތުތެއްގަ އެވެ. އޭނާގެ ޖަނާޒާ ބޭއްވުމަށް ހަމަޖެހިފައި ވަނީ މިއަދު މެންދުރު ނަމާދަށްފަހު މަސްޖިދުއް ތަޢާވުން (އާސަހަރާ) މިސްކިތުގަ އެވެ.

ހަސަންފުޅު ގަރާޖުގެ ހިދުމަތް ދިނުމުގެ މަސައްކަތް ފަށާފައިވަނީ މީގެ 40 އަހަރު ކުރިންނެވެ.

ހަސަންފުޅު އެންމެ ފުރަތަމަ ދޭން ފެށީ ބައިސްކަލު މަރާމާތު ކުރުމުގެ މަސައްކަތެވެ. ނަމަވެސް ފަހުން ސައިކަލުތައް ގިނަވެ، ސައިކަލުތަކުގެ ޑިމާންޑު ބޮޑުވުމުން ހަސަންފުޅުގެ ގަރާޖުން ސައިކަލު މަރާމާތު ކުރުމުގެ ހިދުމަތް ވެސް ދެމުން ދިޔަ އެވެ. އަދި އޭނާގެ ގަރާޖުން ހިދުމަތް ހޯދާ މީހުން އެނޫން އެހެން ތަނަކަށް ހިދުމަތް ހޯދަން ނުދާކަން ވެސް ފާހަގަކޮށްލެވެ. އެންމެ ބޮޑު ސަބަބަކީ ހަސަންފުޅުގެ ސަކަ މިޒާޖާއި، އޮންނަ އެކުވެރިކަމެވެ.

ގަރާޖުން ހިދުމަތް ހޯދާ މީހުންނަށް ހިލޭ ވައި ޖަހައި ދިނުމާއި، ލޯގަނޑު ބަދަލުކޮށް ދިނުމާއި، މިނޫން ވެސް ބައެއް ކަންކަން ހަސަންފުޅު ކޮށްދެނީ އެއްވެސް އަގެއް ނެގުމެއްނެތި އެވެ. އޭނާގެ ތިން ދަރިންނަށް ކިޔަވައިދިނުމާއި ދިރިއުޅުމުގެ އެހެން ހުރިހާ ބޭނުންތަކެއް ވެސް ފުއްދީ ގަރާޖުން ލިބުނު ފައިސާ އިންނެވެ.

ހަސަންފުޅު ގަރާޖުގެ ޚިދުމަތް ހޯދަން ދާއިރު، އޭނާއާ ބައްދަލުނުވާ ފަހަރެއް މަދުވާނެ އެވެ. އަބަދުވެސް ގޮޑި އަޅައިގެން ގަރާޖު ކުރިމަތީ ހުރެ އެވެ. އުމުރުން ދުވަސްވެ އަމިއްލައަށް މިމަސައްކަތް ނުކުރެވުމުން ބިދޭސީންގެ އެހީއާއިއެކު އޭނާގެ ސީދާ ބެލުމުގެ ދަށުން މިމަސައްކަތް މެދު ކަނޑާނުލައި އޭނާ ދިޔައީ ކުރަމުންނެވެ.