ދިވެހިން މެދުގައި ވެސް މަގުބޫލުކަން ހޯދި "ކަސޯޓީ ޒިންދަގީ ކޭ" ފުރަތަމަ ޝީޒަންގައި ޕްރޭނާގެ ރޯލުން މަގުބޫލުކަން ހޯދި ޓީވީ ތަރި ޝްވޭތާ ތިވާރީގެ ދަރިފުޅު ޕަލަކް ތިވާރީގެ އަލަތު ލަވަ ބޮޑު ތަރުހީބެއް ލިބިއްޖެ އެވެ.

ޕަލަކްގެ ފުރަތަމަ "ބިޖްލީ ބިޖްލީ" މިދިޔަ އާދިއްތަ ދުވަހު ރިލީޒް ކޮށްފައިވާއިރު މިލަވައަށް ގިނަ ބަޔަކު އަންނަނީ ތައުރީފު ކުރަމުންނެވެ.

އަރްވިންދް ހައިރާ ޑައިރެކްޓް ކޮށްފައިވާ މިލަވަޔަކީ ހަރްދީ ސަންދޫ ކިޔާފައިވާ ލަވައެކެވެ.

މި ލަވައިގައި ޕަލަކްގެ އެކްޓިންއަށް ގިނަ ބަޔަކު ވަނީ ތައުރީފު ކޮށްފައިވާއިރު މި ލަވައަށް މިހާތަނަށް ބާރަ މިލިއަނަށް ވުރެ ގިނަ ވިއުސް ވަނީ ލިބިފަ އެވެ.

ޕަލަކްގެ ލަވައަށް ބޮޑު ތަރުހީބެއް ލިބިގެން ގޮސްފައިވާއިރު އޭނާގެ ފުރަތަމަ ބޮލީވުޑް ފިލްމު "ރޯޒީ: ދަ ސެފްރޯން ޗެޕްޓާ" އަންނަ ޖެނުއަރީ މަހު ރިލީޒް ކުރުމަށް ވަނީ ނިންމާފަ އެވެ.

ޕަލަކް އާއެކު މިފިލްމުގައި ފެނިގެން ދާނީ ވިވެކް އޮބްރޯއީ އެވެ. މިދިޔަ އަހަރުގެ ޑިސެމްބަރު މަހު ޝޫޓިން ފަށާފައިވާ މި ފިލްމަކީ ހަގީގީ ހާދިސާއަކަށް ބިނާކޮށް ތައްޔާރު ކޮށްފައިވާ ފިލްމެކެވެ.