ރައީސް އަބްދުﷲ ޔާމީން ފަސް އަހަރަށް ޖަލަށް ލާން ކްރިމިނަލް ކޯޓުން ހުކުމް އިއްވި ބެންޗްގައި ހިމެނިވަޑައިގެންނެވި ގާޒީ އަލްއުސްތާޛު ހުސައިން ފާއިޒު ރަޝާދު ސަސްޕެންޑް ކޮށްފި އެވެ. ގާޒީ ފާިއޒު ސަސްޕެންޑް ކޮށްފައިވަނީ 60 ދުވަހަށެވެ.

ޖުޑިޝަލް ސަރވިސް ކޮމިޝަނުން ނެރުނު ބަޔާނެއްގައިވަނީ ކްރިމިނަލް ކޯޓުގެ ފަނޑިޔާރުންގެ އޯޑިއޯ ރެކޯޑިންގ ތަކެއް ކަމަށް ބުނެ މީޑިއާގައި ދައުރުވި އޯޑިއޯތަކުގެ ފޮރެންސިކް އެނާލިސިސްއިން، އެ އޯޑިއޯތަކުގައި ހިމެނޭ އޯޑިއޯއެއްގައިވާ އަޑާއި ކްރިމިނަލް ކޯޓުގެ ގާޒީ އަލްއުސްތާޛު ހުސައިން ފާއިޒު ރަޝާދުގެ އަޑާ ދިމާވާކަމަށް އޯޑިއޯ އެނާލިސިސްގައި ކަނޑައަޅާފައި ވާތީ ކޮމިޝަނުން އެކަން ތަޙުޤީޤުކުރަން ނިންމާފައިވާ ކަމަށެވެ.

"ގާޒީ އަލްއުސްތާޛު ހުސައިން ފާއިޒު ރަޝާދުގެ ސުލޫކީ މައްސަލައާ ގުޅިގެން، އެ މައްސަލައިގެ ބާވަތަށާއި ތަހުގީގަށް ހޯދިފައިވާ މަޢުލޫމާތަށް ބަލައި، ޝަރުއީ ދާއިރާގެ އިތުބާރު ނެގެހެއްޓުމުގެ އަސާސްގެ މައްޗަށް ބިނާކޮށް، ޖުޑީޝަލް ސާރވިސް ކޮމިޝަންގެ ޤާނޫނުގެ ދަށުން، ކޮމިޝަނުން ވަކިގޮތެއް ކަނޑައަޅަންދެން، 05 ނޮވެންބަރު 2021 އިން ފެށިގެން ވަގުތީގޮތުން 60 ދުވަހަށް ވަޒީފާއަށް ނުނިކުމެ މަޑުކުރުމަށް، ގާޒީ އަލްއުސްތާޛު ހުސައިން ފާއިޒް ރަޝާދަށް އެންގުމަށް ފެންނަކަމަށް މިއަދު ބޭއްވި ޖޭއެސްސީގެ ބައްދަލުވުމުން ވަނީ ނިންމާފަ އެވެ" ޖޭއެސްސީގެ ބަޔާނުގައިވެ އެވެ.

ގާޒީ ފާއިޒު ސަސްޕެންޑް ކޮށްފައިވަނީ ރައީސް ޔާމީނުގެ މައްޗަށް ކްރިމިނަލް ކޯޓުން ކުރި ހުކުމްގައި ފަނޑިޔާރުން ރަހީނުކޮށް ބިރުދައްކާފައިވާ ކަމަށާއި އަދި އެ ހުކުމަށް ރައީސް އޮފީހުން ޗީޕް އޮފް ސްޓާފް އަލީ ޒާުހިރު ނުފޫޒު ފޯރުވާފައިވާ ކަމަށްބުނެ ދަްކާފައިވާ ވާހަކަތައް ލީކުވުމާގުޅިގެން އެ އޯޑިއޯތަކުގެ އެނާލިސިސް ހެދުމުން އެއީ އޯޑިއޯ ފާއިޒްގެ އަޑާ ދިމާވާތީ އެވެ.

ލީކްވި އޯޑިއޯ ތަކުގެ ތެރެއިން އަނެއް ދެފަނޑިޔާރުން ކަމަށްވާ ގާޒީ ސަމީރާއި ގާޒީ އަލީ އާދަމްގެ އޯޑިއޯ ދިމާނުވާ ކަމަށްވެސް މިމަހުގެ ދެވަނަ ދުވަހު ޖޭއެސްސީން ކުރިން ޢާއްމު ކުރި ބަޔާނުގައި ބުނެފައިވެ އެވެ. ފާއިޒު ރަޝާދުގެ އޯޑިއޯ ކަމަށް ބުނާ އޯޑިއޯއަކީ ވެސް ވަކި ބައިބައި ޑިލީޓްކޮށް ގުޅުވައިގެން ހަދާފައިވާ އޯޑިއޯއެއްކަން އެނގޭކަމަށާއި އެހެންނަމަވެސް އެ އޯޑިއޯގައިވާ އަޑާއި މެދު ގާޒީ ފާއިޒު އިންކާރުކުރެއްވި ނަމަވެސް އެއީ ފާއިޒުގެ އަޑުކަން އޯޑިއޯ އެނާލިސިސުން ހާމަވާތީ އެ މައްސަލަ ކޮމިޝަނުން ތަހްގީގުކުރުމަށް ނިންމާ ތަހްގީގު ކޮމިޓީއެއް މިހާރު އެކުލަވާލާފައިވާކަމަށް އެ ބަޔާނުގައިވެ އެވެ.

މިބަޔާންތަކާ ގުޅިގެން އިދިކޮޅުންވަނީ ޖޭއެސްސީގެ މި ނިންމުން ގަބޫލު ނުކުރާ ކަމަށް ބުނެފަ އެވެ. އިދިކޮޅުންވަނީ ދެފަހަރެއްގެ މަތިން ފުލުހުންނާ ބައްދަލުކޮށް އެއޯޑިއޯ ރާއްޖެއިން ބޭރަށް ފޮނުވާ ފުރިހަމ އެނޭލިސިސްއެއް ހެދުމަށް އެދިފަ އެވެ. އަދި ފާއިޒުގެ އަޑު ދިމާވާ ކަމަށް އެނޭލިސިސް އިން ހާމަވުމަކީ އެހާހިސާބުން ރައީސް ޔާމީންއަށް ކޮށްފައިވަނީ ސިޔާސީ ހުކުމެއްކަން ވަރަށް ސާފުކޮށް އެނގޭ ކަމެއް ކަމަށާއި އެހެން ކަމުން ހުކުމް ބާޠިލް ކުރުމަށް އިދިކޮޅުންވަނީ ގޮވާލާފަ އެވެ.