ހޮލީވުޑްގެ އެންމެ މަޝްހޫރު އަދި ބިރުވެރި ފިލްމު ފްރެންޗައިޒްތަކުގެ ތެރޭގައި ހިމެނޭ 'އިންސިޑިއަސް'ގެ އާ ފިލްމު 'އިންސިޑިއަސް: އައުޓް އޮފް ދަ ފާދާ'އަށް ފިލްމީ ފާޑުކިޔުންތެރިންގެ މެދުގައި ބޮޑު ސަމާލުކަމެއް ލިބިއްޖެ އެވެ.

މި ފިލްމަކީ އާންމުކޮށް ފެންނަ ކުއްލިއަކަށް ސިއްސުވާލާ ކަހަލަ އާދައިގެ މަންޒަރުތަކަށްވުރެ ބޮޑަށް، ބެލުންތެރިންގެ ހިތްތަކުގައި ފުން ބިރުވެރިކަމާއި ނުތަނަވަސްކަން އުފެއްދުމަށް އިސްކަންދީފައިވާ ފިލްމެކެވެ.

މި ފިލްމުގައި ކިޔައިދެނީ އާ އާއިލާއަކަށް ކުރިމަތިވާ ބިރުވެރި ކަންތައްތަކެކެވެ. ފިލްމުގެ މައި ކެރެކްޓަރު ޖެމާ އާއި އޭނާގެ އަންހެން ދަރިފުޅު ދިރިއުޅެމުންދަނީ ޖެމާގެ އަމިއްލަ މަންމަ މަރުވި ގޭގަ އެވެ.

މި ފިލްމުގައި 'ދަ ފާދާ' (The Further) ކިޔާ ރޫޙާނީ ދުނިޔެއިން އަންނަ ނުބައި ބާރުތަކަކާއި، ޖެމާއަށް ލިބިފައިވާ ހާއްސަ ގާބިލުކަމެއްގެ ވާހަކަ ގެނެސްދެ އެވެ.

https://www.youtube.com/watch?v=jxU8FU3o75A

އެގޮތުން ޖެމާއަށް އެހެން ދުނިޔެއަށް ވަދެވުމުގެ އިތުރުން، އެ ތަނުގައިވާ ނުބައި އެއްޗެހި އަސްލު ދުނިޔެއަށް ގެނައުމުގެ ނުރައްކާތެރި ބާރު ލިބިފައިވާކަން އެނގިގެންދެ އެވެ.

ފާޑުކިޔުންތެރިން ފާހަގަކޮށްފައިވާ ގޮތުގައި މި ފިލްމުގެ އެންމެ ބޮޑު ބުރެއް ލިބިފައިވަނީ އޭގެ އަޑުގެ މިއުޒިކާއި މާހައުލު އުފައްދާފައިވާ ފުރިހަމަ ގޮތަށެވެ.

ކުއްލިއަކަށް ސިއްސުވާލާ ބިރުވެރި މަންޒަރުތައް މަދުވި ނަމަވެސް، ފިލްމުގެ މުޅި ވާހަކަ ކުރިއަށްދަނީ ބެލުންތެރިންގެ ހިތުގައި ސުވާލު އުފައްދައިދެމުން، ދެންވާނީ ކިހިނެއްކަމާ މެދު ކެތްމަދު ކުރުވަމުންނެވެ.

މި ފިލްމުގެ މުޅި ޕްލޮޓް ބިނާވެފައިވަނީ އިންސާނީ އިހުސާސްތަކާއި، ހިތާމައާއި އަދި މާޒީގެ ހަނދާންތަކާ ކުރާ ހަނގުރާމައިގެ މައްޗަށެވެ.

ފްރެންޗައިޒްގެ ކުރީގެ ބައިތަކާ ވެސް ގުޅުވައިދެމުން، މި ފިލްމު ވެގެންދަނީ ބިރުވެރި ފިލްމުތަކަށް ލޯބިކުރާ ފަރާތްތަކަށް ކަމުދާނެ ފަދަ ތަފާތު ތަޖުރިބާއަކަށެވެ.