މީހުން ނުހޯދާ ޚިދުމަތަށް އާސަންދައަށް ބިލްކުރި ދެ ކްލިނިކެއް ސަސްޕެންޑްކޮށް، އެ މައްސަލަ ތަހުގީގުކުރަމުން އަންނަ ކަމަށް އާސަންދަ ކުންފުނިން ބުނެފި އެވެ.

ނުހޯދައި ހިދުމަތަށް ބިލުކުރާކަން ހާމަވީ އާސަންދައިގެ ހިދުމަތަށް ދާދިފަހުން ގެނައި ބަދަލުތަކާ ގުޅިގެންނެވެ. އާސަންދަ ކުންފުނިން ދާދިފަހުން ތައާރަފުކުރި އެޕްލިކޭޝަންގައި އެ މީހަކު ހޯދި ހިދުމަތެއްގެ ތަފުސީލް ފެންނަން ހުރެ އެވެ. އަދި އެކަމަށް ހޭދަވި ފައިސާގެ އަދަދާއި ތާރީހާއި ތަން ވެސް އެނގެން ހުރެ އެވެ.

މިދިޔަ ޑިސެމްބަރުމަހު ތައާރަފުކުރި އެ އެޕްލިކޭޝަނުން އާސަންދައިގެ ޚިދުމަތް ހޯދުމުން ފޯނަށް ނޮޓިފިކޭޝަނެއް ލިބެ އެވެ. މިއީ އެމީހަކު ހޯދާ ޚިދުމަތުގެ ރެކޯޑްތައް ބަލަހައްޓާ، އަދި އާސަންދަ ކުންފުނިން ޚިދުމަތް ދިނުމުގައި ދެފުށް ފެންނަ ނިޒާމަކުން މަސައްކަތް ކުރިއަށްގެންދިއުމަށް ތައާރަފްކުރި ޚިދުމަތެކެވެ.

ޕީއެސްއެމް ނިއުސްގެ "ރާއްޖެ މިއަދު" ޕްރޮގްރާމްގައި ވާހަކަދައްކަވަމުން އެ ކުންފުނީގެ ޖެނެރަލް މެނޭޖަރު އާމިނަތު ޒީނިޔާ ވިދާޅުވީ އެ ޚިދުމަތް ތައާރަފުކުރިތާ މަހެއްހާ ދުވަހުގެ ތެރޭގައި 325 ޝަކުވާ އާއްމުން ހުށައަޅާފައިވާ ކަމަށެވެ. މީގެ ތެރެއިން 15 ޕަސެންޓް މީހުން ހުށަހަޅާފައި ވަނީ، އެ މީހުން ނުހޯދާ ޚިދުމަތަކަށް ބިލް ކުރުމުގެ މައްސަލަ ކަމަށް އޭނާ ވިދާޅުވި އެވެ.

"ބަލިމީހާ ޚިދުމަތް ނުހޯދަނީސް، މި ނޮޓިފިކޭޝަން އަންނަނީ އާސަންދައިން ބޭސްފަރުވާއަށް ޚިދުމަތެއް ހޯދައިފިކަމަށް. މި ޝަކުވާ އާސަންދައަށް ހުށައެޅުމުން ދެ ކްލިނިކެއް އިންވެސްޓިގޭޓްކުރަމުން މިދަނީ،" ޒީނިޔާ ވިދާޅުވި އެވެ.

އޭނާ ވިދާޅުވީ ނުހޯދާ ޚިދުމަތަށް ބިލްކުރާ މައްސަލަތައް އާސަންދައިން ސީރިއަސް މައްސަލަތަކެއްގެ ގޮތުގައި ބަލައި ތަހުގީގު ކުރަމުން އަންނަ ކަމަށެވެ. އަދި މިގޮތަށް ބެލި ބެލުމުން، ބައެއް ކްލިނިކްތަކުން ނާޖާއިޒު މަންފާ ހޯދުމަށް އޮޅުވާލައިގެން ބިލް ކުރަމުންދާ ކަމަށް ހާމަވެފައިވާ ކަމަށާއި މިކަމާ ގުޅިގެން މިހާތަނަށް ދެ ކްލިނިކެއް ސަސްޕެންޑްކޮށް އެ މައްސަލަ ބަލަމުން އަންނަ ކަމަށް ޒީނިޔާ ވިދާޅުވި އެވެ.

"އަޅުގަނޑުމެން ވަރަށް ބޮޑަށް އެދެން މި ޙާލަތުގައި ބަލިމީހަކަށް ގުޅައިފިއްޔާ، އެމީހެއްގެ ސިއްޙީ ލިޔެކިޔުންތައް އަޅުގަނޑުމެންނާ ހިއްސާކުރުމަށް. އަދި އެ މުއްދަތުގައި ޚިދުމަތް ހޯދި އެހެން ޕޭޝަންޓުންނަށް ވެސް ގުޅާ އެބަ މައުލޫމާތު ނަގަން،" އޭނާ ވިދާޅުވި އެވެ.

ޒީނިޔާ ވިދާޅުވީ މި ކްލިނިކްތަކުން ވަރަށް ބޮޑެތި އަދަދުތަކުން އޮޅުވާލައިގެން ފައިސާ ހޯދާފައިވާކަން މިހާތަނަށް ބެލިބެލުމުން ހާމަވެފައިވާ ކަމަށެވެ. އަދި ބަލިމީހާ ހޯދި ޚިދުމަތަށްވާ ފައިސާ އެ މީހާގެ އަތުންނާއި އަދި އާސަންދައިން ވެސް އެ ޚިދުމަތަށްވާ ފައިސާ ނަގާ މައްސަލަ ވެސް ފާހަގަވެފައިވާ ކަމަށް އޭނާ ވިދާޅުވި އެވެ.

އާސަންދަ ކުންފުނީގެ ޑެޕިއުޓީ މެނޭޖިން ޑިރެކްޓަރު އިބްރާޙިމް ރަޝީދު ވިދާޅުވީ ފޯނަށް ނޮޓިފިކޭޝަން ލިބޭ ޚިދުމަތާއެކު، ޚިދުމަތް ދިނުމުގެ ނިޒާމުގައި ހުރި މުހިންމު މައްސަލަތެއް ދެނެގަނެވެން ފަށާފައިވާ ކަމަށެވެ. އަދި ޕާމަސީތަކުން ނުދޭ ބޭހަށް ބިލްކުރުން ވެސް ބޮޑު މައްސަލައެއްގެ ގޮތުގައި ދެނެގަނެވިފައިވާ ކަމަށް އޭނާ ވިދާޅުވި އެވެ.

"2021 ވަނަ އަހަރު ވެސް 8 ތަނެއް ސަސްޕެންޑްކުރިން. އެއީ 1 ފާމަސީއާ 7 ކްލިނިކް. ހަގީގަތުގައި މި ނޮޓިފިކޭޝަންގެ ޚިދުމަތާއެކު ލޫޕް ހޯލްސްތައް ދެނެގަތުމަށް ބޮޑު ކުރިއެރުމެއް ލިބިއްޖެ،" ރަޝީދު ވިދާޅުވި އެވެ.

އާސަންދަ ކުންފުނިން ވަނީ، އެ މީހަކު އާސަންދަ ކުންފުންޏަށް ދީފައިވާ ފޯން ނަންބަރު ހިއްސާކުރުމަށް އެދިފަ އެވެ. އަދި ޚިދުމަތާ ގުޅިގެން ޝައްކުވާ އެއްވެސް ކަމެއް ފާހަގަވެއްޖެނަމަ، އެކަން ވީހާ ވެސް އަވަހަށް އެންގުމަށް ވަނީ އެދިފަ އެވެ.