ބޮލީވުޑްގައި މަގުބޫލު ލޯބީގެ ލަވަތަކެއް ކިޔާފައިވާ މަޝްހޫރު ލަވަކިޔުންތެރިޔާ ކްރިޝްނާ ކުމާރު ކުންނަތު (ކޭކޭ)ގެ ކުއްލި މަރުގައި ސުވާލު އުފެދޭ ކަންތައްތައް ހުރުމުން ފުލުހުން ތަހުގީގުކުރަން ފަށައިފި އެވެ.

'ދިލް އިބާދަތު'، ހުދާޖާނޭ، 'ޒަރާ ސަ'، އަދި 'އާނކޯމޭ ތެރީ' ފަދަ މަޝްހޫރު އެތައް ލަވައެއް ކިޔާފައިވާ ކޭކޭގެ މަރުގައި ޝައްކުކުރެވޭ ކަންތައްތަކެއް ހުރުމުން އެމައްސަލަ އިތުރަށް ތަހުގީގު ކުރަމުން އަންނަ ކަމަށް މީޑިއާ ރިޕޯޓުތައް ބުނެ އެވެ.

ފުލުހުން ބުނީ ކޭކޭގެ އާއިލާގެ ހުއްދައާއެކު މިހާރު ޕޯސްޓްމޯޓަމް ހެދުމަށް ނިންމާފައިވާ ކަމަށެވެ.

ކޭކޭ މަރުވީ އޭނާ ރޭ ދިން ޝޯ ނިންމާލިތަނާ ކުޑައިރުކޮޅެއްގެ ތެރެގައި ހާލު ދެރަވެގެންނެވެ. އަދި އޭނާ އިންޑިއާގެ ސީއެމްއާރުއައި ހޮސްޕިޓަލަށް ގެންދިޔަ އިރުވެސް އޮތީ މަރުވެފަ އެވެ.

ކޭކޭ މަރުވިއިރު އޭނާގެ އުމުރަކީ 53 އަހަރެވެ.

ކޭކޭ އަކީ ވަރަށް ގިނަ ބަސްތަކުން އިންޑިއާގެ ފިލްމްތަކަށް ވެސް ލަވަ ކިޔާފައިވާ ފަންނާނެކެވެ. ހިންދީ ބަހުގެ އިތުރުން ތަމަޅަ ބަހުންނާއި ބެންގާލީ ބަހުންނާއި ތެލަގޫ ބަހުންނާއި އަދި އިތުރު އެހެން ބަސްތަކުން ވެސް އޭނާ ވަނީ ގިނަ އަދަދެއްގެ ލަވަ ކިޔާފަ އެވެ.

ކޭކޭ މަރުވުމުން އެތައް ބަޔަކު އަންނަނީ އޭނާގެ އާއިލާއަށާއި ރަހުމަތްތެރިންނަށް ތައުޒިއާ ކިޔަމުންނެވެ. އިންޑިއާގެ ބޮޑުވަޒީރު ނަރެންދްރަ މޯދީ ވެސް ވަނީ ކޭކޭ މަރުވުމުން އެކަމާއި ހިތާމަ ފާޅުކޮށް ޓްވީޓެއް ކުރައްވާފަ އެވެ.

ކޭކޭ މަރުވި އިރު ދެ ދަރިންނާއި އަނތްބަކު ދުނިޔޭގައި އެބަ ތިއްބެވެ.