އިންޑިޔާގެ ލަވަކިއުންތެރިޔާ އަރްޖުން ކަނޫންގޯ އާއި އޭނާގެ ލޯބިވެރިޔާ ކާލާ ޑެނިސް އާ ކައިވެނި ކުރުން މިމަހުގެ ދިހަ ވަނަ ދުވަހަށް ވަނީ ހަމަޖައްސާފަ އެވެ. މީޑިއާ ރިޕޯޓްތައް ބުނާގިތުގައި އަރްޖުނާއި ކާލާ ކައިވެއްޔަށް ތައްޔާރުވަމުން އަންނައިރު މިކައިވެނި ހަފްލާ ބޭއްވުމަށް ނިންމާފައިވަނީ ހިންދޫ ސަގާފަތްތަކާ އެއްގޮތަށެވެ.

“ކާލާއަށް އިންޑިއާގެ ކައިވެނިތައް ވިސްނޭ. މިކައިވެނީގެ ހުރިހާ ޕްލޭނެއް ހެދީ ކާލާ. އޭނާގެ އާއިލާއަކީ އިންޑިއާގެ އާއިލާއެއް ނޫން ނަމަވެސް އެމީހުން ވެސް އަހަރެމެންގެ ސަގާފަތް ވަރަށް ރަގަޅަށް އިނގޭ" އަރުޖުން ބުންޏެވެ.

އިންޑިއާގެ ސަގާފަތާ އެއްގޮތަށް މިއަހަރު ކައިވެނި ކުރި ނަމަވެސް އެމީހުން ވަނީ އަންނަ އަހަރު އިނގިރޭސްވިލާތުގައިވެސް ކައިވެނި ކުރުމަށް ނިންމާފަ އެވެ.

"2023 ގެ އޭޕްރީލުގައި އިނގިރޭސިވިލާތުގައިވެސް ކައިވެނި ކުރުމަށް ވަނީ ނިންމާފައި. މިއީ ކާލާ އާއި އޭނާގެ ގާތް އަދި ލޯބިވާ މީހުންނަށްޓަކައި ބާއްވާ ކައިވެނި ހަފްލާއެއް" އަރުޖުން ބުންޏެވެ.

ވަރަށް ހަގު އުމުރުގައި ކައިވެނި ކުރަން ޖެހިދާނެ ކަމަށް ކުރިން ގަބޫލުވެސް ނުކުރެވޭ ކަމަށް އަރްޖުން ބުންޏެވެ. ނަމަވެސް ކައިވެނި ކުރަން އަވަސްކުރަން ބޭނުންވީ އަވަހަށް އޭނާގެ ހަޔާތަށް ކާލާ ގެންނަން ބޭނުންވާތީ ކަމަށް އޭނާ ބުންޏެވެ.

އޮގަސްޓް މަހުގެ ކައިވެންޏަށް ފަހު ހަމަ އެވަގުތު އަރުޖުން އާއި ކާލާ ހަނީމޫނަށް ދިޔުމަށް ވަނީ ނިންމާފަ އެވެ. ހަނީމޫނަށް ދިނުމަށް އެމީހުން ނިންމާފައިވަނީ ޖަޕާނަށެވެ.

އެ ދެމީހުންގެ ގުޅުމަށް ހަތް އަހަރު ވެފައިވާއިރު، ކައިވެނި ކުރަން ރާވާތާ ދުވަސްކޮޅެއް ވެއްޖެ އެވެ. އެދެމީހުންގެ ކައިވެންޏަކީ އާއިލާއާއި ރައްޓެހިންގެ ހާޒިރުގައި މުމްބާއީގައި ތިން ދުވަހުގެ މުއްދަތަށް ކުރިއަށް ގެންދާ ހަފްލާއެކެވެ.