މިހާރު ބޮޑު ކާމިޔާބީއެއް ހޯދަމުން އަންނަ ބޮލީވުޑް ފިލްމު "ބުރައްމަސްތުރާ" ގެ ތަރި މޯނީ ރޯއީ އާއިލާއާ އެކު ރާއްޖޭގައި އަންނަނީ ޗުއްޓީ ހޭދަކުރަމުންނެވެ.

ޓީވީ ސީރީޒްތަކުން މަޝްހޫރުކަން ހޯދާފައިވާ މޯނީ މިފަހަރު ޗުއްޓީ ހޭދަކުރުމަށް އައިސްފައިވަނީ އޭނާގެ ފިރިމީހާ ސޫރަކް ނަމްބީއާ އާއި އާއިލާގެ އެހެން މެމްބަރުންނާ އެކު އެވެ.

ޅ. އަތޮޅުގައި އޮންނަ ފުށިފަރު ރިސޯޓަށެވެ. މޯނީ ޗުއްޓީ ހޭދަކުރާ ބައެއް ވީޑިއޯ އާއި ފޮޓޯ އޭނާގެ އިންސްޓަގްރާމް އެކައުންޓްގައި އަންނަނީ ހިއްސާ ކުރަމުންނެވެ.

މޯނީ އަކީ މީގެ ކުރިން ވެސް އެތައް ފަހަރެއްގެ މަތިން ރާއްޖޭގައި ޗުއްޓީ ހޭދަކޮށްފައިވާ ބަތަލާއެކެވެ. އެކަމަކު މިއީ ކައިވެނިކުރި ފަހުން ފިރިމީހާއާ އެކީ ރާއްޖެ އަށް ކުރި ފުރަތަމަ ދަތުރެވެ. ދުބާއީގައި ދިރިއުޅޭ ވިޔަފާރިވެރިޔާ އާއި މޯނީ ކައިވެނިކުރީ މި އަހަރުގެ ޖެނުއަރީ މަހު އެވެ.

އުމުރުން 36 އަހަރުގެ މޯނީ އެންމެ ފަހުން ފެނިގެން ގޮސްފައިވަނީ އާލިއާ އާއި ރަންބީރު ކަޕޫރު ލީޑް ރޯލުން ފެނިގެންދިޔަ "ބުރައްމަސްތުރާ" އިންނެވެ.

މޯނީ ކުޅެފައިވާ ބޮލީވުޑުގެ އެހެން ފިލްމުތަކުގެ ތެރޭގައި އަކްޝޭ ކުމާރާ އެކު "ގޯލްޑް" އާއި ޖޯން އަބްރަހަމާ އެކު "ރޯމިއޯ އަކްބަރު ވޯލްޓާ" އަދި ރާޖްކުމާރު ރާއޯއާ އެކު "މޭޑް އިން ޗައިނާ" ހިމެނެ އެވެ.