އަންނަ ސެޕްޓެމްބަރު މަހު ބާއްވާ ރިޔާސީ އިންތިހާބުގައި ވޯޓުލުމަށް ފަހު ބާކީ ހުންނަ ވޯޓް ކަރުދާހާ މެދު އަމަލުކުރާނެ ގޮތަކާ މެދު ހިޔާލު ތަފާތުވުމުން އެކަމާ ބެހޭ ގޮތުން ސިޔާސީ ޕާޓީތަކާ މަޝްވަރާކުރުމަށް ފަހު ނިންމީ ބާކީ ކަރުދާސްތައް ޕަންޗުކޮށް ލޯވަޅެއް އަޅަން ކަމަށް އިލެކްޝަންސް ކޮމިޝަންގެ ނައިބު ރައީސް އިސްމާއިލް ހަބީބް ވިދާޅުވެއްޖެ އެވެ.

ހަބީބު ކުރެއްވި ޓްވީޓެއްގައި ވިދާޅުވީ އިންތިހާބާ ބެހޭ ގާނޫނުގައި ވޯޓު ކަރުދާހާ މެދު އަމަލުކުރަން ޖެހޭ މާއްދާއަށް ރިއާޔަތްކޮށް އެ ކޮމިޝަނުން ނިންމީ ބާކީ ހުންނަ ކަރުދާސްތައް ސެކިއުރިޓީ އުރައިގައި ބަންދުކުރުމުގެ ކުރިން، "އިންވެލިޑް" ވޯޓުކަރުދާސް ކަމުގައި ކަނޑައެޅުމުގެ ބޭނުމަށް ކެންޑިޑޭޓުންގެ ނަމްބަރު ޖަހާފައިހުންނަ ފަރާތުން ޕަންޗުކުރަން ކަމަށެވެ.

ރިޔާސީ އިންތިހާބާ ގުޅޭގޮތުން ގައުމީ ލަފާދޭ ކޮމިޓީގެ މެންބަރުން އެ މައްސަލާގައި ކޮމިޝަނަށް ލަފާ ދިން ގޮތަށް، ބާކީ ހުންނަ ވޯޓުކަރުދާސްތައް ސެކިއުރިޓީ އުރައިގައި ބަންދު ކުރުމުގެ ކުރިން ޕަންޗުކުރަން ނިންމާފައިވާ ކަމަށް ހަބީބު ވިދާޅުވި އެވެ.

އޭނާ ވިދާޅުވީ އެ ކަރުދާސްތަކަކީ އިންވެލިޑް ވޯޓުކަރުދާސް ކަމުގައި ކަނޑައެޅުމުގެ ބޭނުމަށް، ކެންޑިޑޭޓުންގެ ނަންބަރު ޖަހާފައިހުންނަ ފަރާތުން، ބާކީ ހުންނަ ވޯޓު ކަރުދާސްތައް ޕަންޗުކުރަން ނިންމާފައިވާ ކަމަށެވެ.

ހަބީބު ވިދާޅުވީ އެ ބަދަލު ގެންނަން ނިންމީ އިންތިހާބީ ނިޒާމްގެ އިތުބާރު ބޮޑުކުރުމުގެ ބޭނުމުގައި ކަމަށެވެ.