އިސްރާއީލުން ހިފާފައިވާ ފަލަސްތީނުގެ ބިންތަކުން ފައިބައި އެ ބިންތައް ފަލަސްތީނަށް އަނބުރާ ހަވާލުކުރުމަށް އިންތިހާބީ ރައީސް ޑރ. މުހައްމަދު މުއިއްޒު މިރޭ ގޮވާލައްވައިފި އެވެ.

މުއިއްޒު، އެކްސްގައި ކުރެއްވި ޕޯސްޓެއްގައި ވަނީ 1967 ވަނަ އަހަރު އޮތް ސަރަހައްދީ ރޮނގާ ހަމައަށް އިސްރާއީލް ފަހަތަށް ޖެހުމަށާއި ރެފިއުޖީން އެނބުރި އެމީހުންގެ ވަޒަނަށް ދިއުމުގެ ފުރުސަތު ދިނުމަށް ގޮވާލައްވައިފަ އެވެ.

އަދި ގަދަބާރުން އިސްރާއީލް ސިފައިން ހިފާފައިވާ ފަލަސްތީނުގެ ބިންތައް ފަލަސްތީނުގެ ރައްޔިތުންނަށްދީ، އެ ބިންތަކުން ސިފައިން ފޭބުމަށް ވެސް މުއިއްޒު ގޮވާލެއްވި އެވެ.

މުއިއްޒު އެގޮތަށް ގޮވާލެއްވި އިރު، ހަމާސް ޖަމާއަތުން އިސްރާއީލާ ދެކޮޅަށް ކުއްލިއަކަށް ވަނީ ވަރުގަދަ ހަމަލާތަކެއް ދީ އިސްރާއީލްގެ ސިފައިންނާއި ރައްޔިތުންގެ ތެރެއިން ބަޔަކު މަރާލައި އިތުރު ބަޔަކު ރަހީންކޮށްފަ އެވެ. ފަލަސްތީނުން މިހާތަނަށް އައިއިރު، އެތައް ހާސް ރޮކެޓް ހަމަލާއެއް ޣައްޒާއެއް ވަނީ ފޮނުވާލައިފަ އެވެ. އޭގެ ބަދަލުގައި އިސްރާއީލުން ވެސް ދަނީ ވައިގެ މަގުން ޣައްޒާ އަށް ބޮން އަޅަމުންނެވެ.

ހަމާސް އިން ބުނާ ގޮތުގައި އިސްރާއީލަށް އަމާޒުކޮށް މި ހަމަލާތައް ދޭން ފެށީ މުސްލިމުންގެ މުގައްދަސް ބިން ކަމުގައިވާ އަލް އަގްސާ މިސްކިތުގެ ހުރުމަތް ކަނޑާލުމާއި އެ ތަނަށްދާ މުސްލިމުންނަށް އަނިޔާކޮށް، ހައްޔަރުކުރަމުންދާތީ އެވެ. އަދި މި ހަމަލާތަކަކީ އިސްރާއީލްގެ ސިފައިން ފަލަސްތީނުގެ ހުޅަނގު އައްސޭރި އާއި އެހެން ތަންތަނުގައި ފަލަސްތީން ރައްޔިތުންނަށް އަމާޒުކޮށް ދޭ އަނިޔާވެރި ހަމަލާތަކަށް ދޭ ރައްދެއް ކަމަށް ވެސް ހަމާސް އިން ބުނެ އެވެ.

މި ހަމަލާތަކުގައި އިސްރާއީލްގެ 100 މީހުން މަރާލާފައިވާ އިރު، ފަލަސްތީނުގެ 198 މީހުން މިހާތަނަށް ޝަހީދުކޮށްލާފައިވެ އެވެ.