އިސްރާއީލުން ފަލަސްތީންގެ ޣައްޒާ ރައްޔިތުންނަށް ދެމުން އަންނަ ލާއިންސާނީ އަމަލުތަކާ ގުޅިގެން އިސްރާއީލުން ހިންގަމުންދާ ޖަރީމާތަކާ ދެކޮޅަށް ރައްޔިތުންގެ މަޖިލީހަށް ހުށަހެޅި ކުއްލި މައްސަލައިގެ ބަދަލުގައި ގަރާރު އެޖެންޑާ ކުރަން ރިޔާސަތުން މިއަދު ނިންމައިފި އެވެ.

ޖަލްސާގެ ރިޔާސަތު ބެލެހެއްޓެވި މަޖިލިހުގެ ނައިބު ރައީސް އީވާ އަބްދުﷲ ވިދާޅުވީ ކުއްލި މައްސަލަ ކުރިއަށް ނުގެންދަން ނިންމެވީ މަޖިލިހުގެ ޖަލްސާ އަށް އެޖެންޑާގައި ގަރާރު ހިމެނިފައިވާތީ ކަމަށެވެ.

"މަޖިލިސް ގަވައިދު ތަން ދެނީ ގަރާރައިގެން ކުރިއަށް ދާން. ގަރާރަކީ ހަގީގަތުގައި ދުރާލައި ނަތީޖާއެއް ނެރެވޭ މަސައްކަތަކަށް ވާތީ ގަރާރައިގެން ކުރިއަށް ދިއުން. ކުއްލި މައްސަލައަކަށް ބަހުސް ކުރެވެން އަންނަނީ އެޖެންޑާގައި ނުހިމެނޭ ނަމަ. އެހެން ނަމަވެސް އަޅުގަނޑުމެންނަށް މިވަނީ ހަމަ މި މައްސަލާގައި ރައްޔިތުންގެ މަޖިލީހަށް ކުރިއާ ލައި ގަރާރެއް ލިބި އަދި މިއަދު އެޖެންޑާކޮށްފައި،" އީވާ ވިދާޅުވި އެވެ.

ރައްޔިތުންގެ މަޖިލިހަށް ކުއްލި މައްސަލަ ހުށަހެޅުއްވީ މަޖިލިހުގެ ހޯރަފުށި ދާއިރާގެ މެމްބަރު އަހުމަދު ސަލީމެވެ. އަދި ގަރާރު މަޖިލިހަށް ހުށަހަޅުއްވާފައި ވަނީ މަޖިލިހުގެ ވިލިނގިލީ ދާއިރާގެ މެމްބަރު ސައުދު ހުސެއިނެވެ.

ކުއްލި މައްސަލަ އެޖެންޑާ ނުކުރުމުން މަޖިލިހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު ވަނީ ކަންބޮޑުވުން ފާޅު ކުރައްވައިފަ އެވެ. ޖާބިރު ވިދާޅުވީ ގަވައިދުގައި ހުންނަ އަކުރު އަކުރުގައި ހިފައިގެން މިފަދަ މުހިއްމު މައްސަލަތައް އެޖެންޑާ ނުކުރުން ރަނގަޅު ނޫން ކަމަށާއި ކުއްލި ބަހުސެއް ކުރިއަށް ގެންދިއުމުގެ ފުރުސަތު ހަނިވެގެން ދިއުމުން ހިތާމަ ކުރައްވާ ކަމަށެވެ.

"އަޅުގަނޑު އެދެނީ ފަލަސްތީނުގެ އަހުންނާއި އުހްތުންނަށް މިހާރު ލިބެމުންދާ އަނިޔާ އަޅުގަނޑު ގައިމު ވެސް ކުށްވެރި ކުރަން އަދި އެހެނިހެން ފަރާތްތަކަށް ވެސް ލިބޭ އަނިޔާ ކުށްވެރި ކުރަން،" ޖާބިރު ވިދާޅުވި އެވެ.

އީވާ ވިދާޅުވީ މިއަދު ކުއްލި މައްސަލަ އަށް ޖާގަ ދިނުމަށް މާދަމާ ގަރާރު އެޖެންޑާކޮށްގެން ކުރިއަށް ގެންދެވިދާނެ ކަމަށް ކުއްލި މައްސަލަ އާއި ގަރާރު ހުށަހެޅުއްވި މެމްބަރުންނަށް އެންގެވި ކަމަށެވެ.

"އިއްޒަތްތެރި މެމްބަރަށް ރަނގަޅަށް އެނގިވަޑައިގަންނަވާނެ މަޖިލިސް ގަވައިދަށް ކަން އަޅުގަނޑު ވެސް އިދާރީ މޭޒުން ހުރުމަތްތެރިކޮށް ހިތަން ޖެހޭނީ. އަޅުގަނޑުމެންނަކަށް ގަވައިދާ ހިލާފަކަށް މެމްބަރުން ހުށަހަޅުއްވާފައިވާ މައްސަތަކެއް އެޖެންޑާ ކޮށްގެން ވަކި ގޮތަކަށް ކުރިއަށް ނުގެންދެވޭނެ،" އީވާ ވިދާޅުވި އެވެ.