މިއަދުވެސް ރާއްޖޭގެ ބޮޑުބަޔަކަށް މޫސުން ގޯސްވެ، ވިއްސާރަ ކުރާނެ ކަމަށް މޫސުމާބެހޭ ގައުމީ އިދާރާ އިން ބުނެފި އެވެ.

އެ އިދާރާއިން ބުނީ އުތުރާއި މެދު ރާއްޖެތެރޭގެ އެކި ހިސާބުތަކަށް ވިއްސާރަ ކުރުމާއެކު ގުގުރުން އެކަށީގެންވާ ކަމަށެވެ. އަދި ބައެއް ރަށްތަކަށް ބޯކޮށް ވާރޭ ވެހުން އެކަށީގެންވާ ކަމަށާއި ދެކުނުގެ ބައެއް ރަށްތަކަށް ކެރީގެ އަސަރު ފޯރާނެ ކަމަށް މޫސުމާބެހޭ ގައުމީ އިދާރާ އިން ބުނެ އެވެ.

އެ އިދާރާއިން ވަނީ ހއ. އަތޮޅުން ފެށިގެން ވ. އަތޮޅާ ހަމައަށް މިއަދު އިރުއޮއްސި 6:00 ގެ ނިޔަލަށް ވައިޓް އެލާޓް ވެސް ނެރެފަ އެވެ. އަދި މި ސަރަހައްދުތަކަށް ވެސް ގުގުރުމާއެކު ބޯކޮށް ވާރޭ ވެހޭނެ ކަމަށް ލަފާކުރެވޭ ކަމަށް ވެސް މޫސުމާބެހޭ ގައުމީ އިދާރާ އިން ބުނެ އެވެ.

އެ އިދާރާއިން ބުނީ ކަނޑުތައް އާދައިގެ ވަރަކަށް ގަދަވާނެ ކަމަށް ލަފާކުރެވޭ ކަމަށާއި، މެދު ރާއްޖެތެރެއާއި އުތުރުގެ އަތޮޅުތަކަށް ގަޑިއަކު 10 މޭލާއި 20 މޭލާއި ދެމެދުގެ ބާރު މިނުގައި ވައި ޖެހޭނެ ކަމަށް ލަފާކުރެވޭ ކަމަށެވެ. އަދި ދެކުނުގެ އަތޮޅުތަކަށް ގަޑިއަކު ހަތް މޭލާއި 17 މޭލާއި ދެމެދު ބާރުމިނުގައި ވައިޖެހޭނެ ކަމަށާއި ބޯކޮށް ވާރޭ ވެހޭނެ ކަމަށް ލަފަކުރެވޭ ކަމަށް ވެސް މޫސުމާބެހޭ ގައުމީ އިދާރާ އިން ބުނެ އެވެ. އަދި ރާޅުގެ އުސްމިން ހުންނާނީ 3 ފުޓާ 9 ފޫޓާ ދެމެދު ކަމަށް ވެސް އެ އިދާރާއިން ބުނެ އެވެ.

މިދުވަސްވަރު ކުރަމުންދާ ވިއްސާރައަކީ ހުޅަނގު މޫސުމުގެ ބާރުގަދަވުމުގެ ސަބަބުން ކުރާ ވިއްސާރައެކެވެ.

އެހެންވެ މިދުވަސްވަރު ފެންބޮޑުވެ، ކުރިމަތިވެދާނެ ހާދިސާއަކުން ލިބިދާނެ ގެއްލުންތައް ކުޑަކުރުމަށް ރައްކާތެރިކަމުގެ ފިޔަވަޅުތައް ދުރާލާ އެޅުމަށް ކަމާބެހޭ ފަރާތްތަކުން އަންނަނީ އިލްތިމާސްކުރަމުންނެވެ. އަދި ކަނޑުދަތުރުފަތުރު ކުރުމުގައިވެސް މޫސުމަށް ޚާއްސަ ސަމާލުކަމެއްދީގެން ދަތުރުކުރުމަށް ދަނީ ނަސޭހަތްތެރިވަމުންނެވެ. ނަމަވެސް މޫސުން ގޯސްވުމަށްފަހު މިހާރު މަޑުމަޑުން މޫސުން ރަނގަޅުވަމުންދާ ކަމަށް މޫސުމާ ބެހޭ އިދާރާއިން ބުނެ އެވެ.