މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ މުވައްޒަފުން ދުންފަތާ ދުރަށްދިއުމަށް އެހީތެރިވުމަށް ހާއްސަ ހަރަކާތްތަކެއް ހިންގުމަށް ދަމަނަވެއްޓާއެކު އެއްބަސްވުމެއްގައި މިއަދު ސޮއިކޮށްފި އެވެ.

މި އެއްބަސްވުމުގެ ދަށުން، އެމްއޭސީއެލްގެ މުވައްޒަފުން ދުންފަތުގެ އިސްތިއުމާލް ކުރުމާ ދުރުހެލި އަދި ދުޅަހެޔޮ ސިއްހަތެއްގައި ދެމިތިބުމަޓަކައި މަސައްކަތްކުރެވިގެން ދާނެ އެވެ.

އެމްއޭސީއެލްގެ ކޯޕަރޭޓް އޮފީހުގައި ބޭއްވި ރަސްމިއްޔާތެއްގައި އެ ކުންފުނީގެ ފަރާތުން އެއްބަސްވުމުގައި ސޮއިކުރެއްވީ ކުންފުނީގެ މެނޭޖިން ޑައިރެކްޓަރު އިބްރާހިމް ޝަރީފް މުހައްމަދު އެވެ. އަދި ދަމަނަވެށީގެ ފަރާތުން ސޮއިކުރެއްވީ ޕަބްލިކް ހެލްތް ކޯޑިނޭޓަރު މޫސާ ހަނީފް އެވެ.

ދުންފަތުގެ އިސްތިއުމާލް ކުރުން ހުއްޓާލާ ދުޅަހެޔޮ ސިއްހަތެއްގައި ދެމިތިބުމަށް އެހީތެރިވުމަށް މި އެއްބަސްވުމުގެ ތެރެއިން އެމްއޭސީއެލްގެ އޮކިއުޕޭޝަނަލް ހެލްތް ޓީމުން ދަމަނަވެއްޓާއި ގުޅިގެން ކައުންސެލިން ދިނުމާއި، އެޑިއުކޭޝަނަލް ވޯކްޝޮޕް ހިންގުމާއި، ސަޕޯޓު ގުރޫޕް އުފެއްދުމުގެ އިތުރުން ތަފާތު އެކިއެކި ހަރާތްކާތަކުގެ ތެރެއިން ދުންފަތާއި ދުރައްދިއުމަށް މުވައްވައްޒަފުންނަށް އެހީތެރިކަން ފޯރުކޯށްދިނުމަށް ވަނީ ހަމަޖެހިފަ އެވެ.

މުވައްޒަފުން ދުންފަތާ ދުރުހެލިކުރަން ހާއްސަ ޕްރޮގްރާމެއް ހިންގަން އެމްއޭސީއެލްގެ ސީއީއޯ ސޮއިކުރަނީ. ފޮޓޯ: އެމްއޭސީއެލް

ބައިނަލްއަގުވާމީ ދުންފަތުގެ އިސްތިއުމާލު ކުރުން މަނާ ދުވަހާއި ގުޅުވައިގެން އެމްއޭސީއެލް އިން ދަމަނަވެއްޓާއެކު ވެވުނު އެއްބަސްވުމުގެ އިތުރުން ކުންފުނީގެ މުވައްޒަފުންގެ މެދުގައި ދުންފަތުގެ ނުރައްކަލާމެދު ހޭލުންތެރިކަން އުފެއްދުމަށް ކުރެހުމުގެ މުބާރާތެއް ވަނީ ބާއްވައިފަ އެވެ.

މީގެ އިތުރުން، މުވައްޒަފުންގެ ދުޅަހެޔޮކަމަށް އިސްކަންދީގެން މުޅި އަހަރަށް ބަހާލައިގެން އެމްއޭސީއެލްގެ އިން ދަނީ ހަރަކާތްތައް ރާވާ ހިންގަމުންނެވެ.