މިދިޔަ މަހުގެ ކަރަންޓު ބިލު އިންތިހާއަށް ބޮޑުވުމާ ގުޅިގެން އެކަމުގެ ކަންބޮޑުވުން ފާޅުކޮށް، ސްޓެލްކޯ ކައިރީގައި މުޒާހަރާކޮށްފި އެވެ.

މިއަދު ހަވީރު "ކަރަންޓު ވަގު" ގެ ނަމުގައި ސްޓެލްކޯ ކައިރީގައި އާންމުންގެ ބަޔަކު ވަނީ މުޒާހަރާ ކޮށްފަ އެވެ. އަމީނީ މަގުގައި ހުންނަ ސްޓެލްކޯގެ ހެޑް އޮފީހަށް މުޒާހަރާގެ ބައިވެރިން މިސްރާބު ޖެހުމުން, ބެރިކޭޑް ޖަހައި ފުލުހުން ވަނީ އެ ސަރަހައްދު ބަންދުކޮށްފަ އެވެ.

ބައިވެރިން ވަނީ ކަލާފާނު ސްކޫލު ކުރިމަތީގައި ފުލުހުން ޖަހާފައިވާ ބެރިކޭޑް ކުރިމަތީގައި އެ މީހުންގެ ޝުއޫރު ފާޅުކޮށްފަ އެވެ. އެތަނުގައި ތިބި މީހުން އަޑު އުފުލަމުން ދިޔައީ ސްޓެލްކޯގެ ކަރަންޓުން ވައްކަން ކުރުން ހުއްޓާލުމަށެވެ. އަދި ސްޓެލްކޯގެ އެމްޑީ ހުސެއިން ފަހުމީއާ ރައީސް މުއިއްޒުގެ އިސްތިއުފާއަށް ގޮވި އެވެ.

ފުލުހުންގެ މީޑިއާ ގްރޫޕްގައި ބުނީ ސްޓެލްކޯ ކުރިމަތީގައި ފުލުހުން ހަރަކާތްތެރިވަނީ އާންމުންނަށް ހުރަސް އެޅުމުގެ ގޮތުން ނޫން ކަމަށެވެ. އެތަނަކީ ދައުލަތުގެ އިންފްރާސްޓްރަކްޗާގެ މުހިންމު ބައެއް ކަމަށްވުމުން އެތަނުގައި ފުލުހުންގެ ސެކިއުރިޓީ ގާއިމުކުރި ކަމަށް ފުލުހުން ބުންޏެވެ.

ނިމިދިޔަ ވިއްސާރަ ދުވަސްތަކުގެ ބިލް އާންމު ދުވަސްތަކަށްވުރެ ބޮޑުވުމާ ގުޅިގެން މީސް މީޑިއާގައި ވަރަށް ގިނަ މީހުން ދަނީ ނުރުހުން ފާޅުކުރަމުން ނެވެ. ބައެއް މީހުން ބުނާގޮތުގައި ސްޓެލްކޯއިން ވަނީ މީހުން ދިރިނޫޅޭ ގެތަކަށް ވެސް ބޮޑެތި އަދަދުތަކުން ބިލްތައް ހަދާފަ އެވެ.

މިކަމާ ގުޅޭގޮތުން ސްޓެލްކޯގެ މީޑިއާ އޮފިޝަލް ބުނީ ސްޓެލްކޯ އިން މޭ މަހުގެ ބިލްގައި އޭޕްރީލް މަހުގެ ބިލްގެ ބައެއް ހިމަނާފައިވާ ކަމަށެވެ.

މަދު ބަޔަކު އެ ސަރަހައްދަށް އެއްވި ނަމަވެސް ކަރަންޓު ބިލު އިންތިހާއަށް ބޮޑު ކަމަށް ބުނެ ސޯޝަލް މިޑީއާގައި ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ.