މަސްތުވާތަކެތީގެ ވަބާގައި ޖެހިފައިވާ މީހުންނަށް ފަރުވާ ދިނުމަށް ހާއްސަކޮށްފައިވާ ޑްރަގު ރިހެބިލިޓޭޝަން ސެންޓަރު ގާއިމުކޮށް ހިންގުމަށް މެލޭޝިއާގެ ކުންފުންޏަކުން ޝައުގުވެރިކަން ފާޅުކޮށްފި އެވެ.

ޕީއެސްއެމް އަށް ދެއްވި އިންޓަވިއުއެއްގައި ހޯމް މިނިސްޓަރު އަލީ އިހުސާން ވިދާޅުވީ ޑްރަގް ރިހެބިލިޓޭޝަން ސެންޓަރު ގާއިމުކޮށް ހިންގަން ޝައުގުވެރިވި ކުންފުންޏަކީ ދުނިޔޭގެ އެހެން ގައުމުތަކުގައި ވެސް ސެންޓަރުތައް ގާއިމުކޮށް ހިންގަމުން އަންނަ ކުންފުންޏެއް ކަމަށެވެ. ނަމަވެސް އެއީ ކޮން ކުންފުންޏެއް ކަމެއް އޭނާ ވިދާޅެއް ނުވެ އެވެ.

އިހުސާން ވިދާޅުވީ ޕްރޮޕޯސަލް ހުށަހެޅި ކުންފުނިން ހުށަހަޅާފައިވަނީ ބޮޑު އަގެއް ކަމަށެވެ. އެހެންކަމުން، އެ ކަން ކުރުމުގައި އިތުރު ގޮތްތައް ބަލަމުންދާ ކަމަށާއި މިހާރު އެ ޕްރޮޕޯސަލާ ގުޅިގެން މަޝްވަރާތައް ކުރަމުންދާ ކަމަށް އިހުސާން ވިދާޅުވި އެވެ.

"ރާއްޖޭގައި މަސްތުވާތަކެއްޗަށް ގޮސް، އޭގަ ދެވިހިފާފައި މިތިބޭ ގިނަ މީހުންނަކީ އެހާ ފޯރުންތެރި މީހުންނެއް ނޫން. އެހެންވެ އަޅުގަނޑުމެން އެބަބަލަން މިއަށް ކިހިންތެތޯ ހައްލެއް ލިބޭނީ. ނޭޝަނަލް ޑްރަޖް އެޖެންސީގެ ބަޖެޓުން ނުވަތަ އާސަންދަ ކަހަލަ ފަރުވާދޭ މެކޭނިޒަމެއް މެދުވެރިކޮށްވެސް މިއީ އޮޕްޝަނެއްތޯ ބަލަމުން މިހާރު މިދަނީ." އިހުސާން ވިދާޅުވި އެވެ.

އިހުސާން ވިދާޅުވީ، އަމިއްލަ ފަރާތްތަކުން ޑްރަގް ރިހެބިލިޓޭޝަން ސެންޓަރުގެ ހިދުމަތް ދިނުމަކީ އެކަމުގެ ސަބަބުން ވާދަވެރިކަން އިތުރުވެ، ހިދުމަތުގެ ފެންވަރު ރަނގަޅުވާނެ ކަމެއް ކަމަށެވެ. އަދި ކުޑަ ދުވަސްކޮޅެއްގެ ތެރޭގައި އަމިއްލަ ފަރާތްތަކުން ރާއްޖޭގައި ޚިދުމަތް ދޭން ފަށާނެ ކަމަށް އުއްމީދު ކުރައްވާކަމަށްވެސް އޭނާ ވިދާޅުވި އެވެ.

ރާއްޖޭގެ ތިން ސަރަހައްދެއްގައި ރިހެބިލިޓޭޝަން ސެންޓަރުތައް ގާއިމުކުރުމަށް ނޭޝަނަލް ޑްރަގު އެޖެންސީން ވަނީ ނިންމައިފަ އެވެ. އެއީ، ނ. ވެލިދޫ، ކ. ކާށިދޫ އަދި ލ. އަތޮޅުގެ ރަށެކެވެ.