ސަރުކާރުން ރައްޔިތުންގެ މަޖިލިހަށް ފޮނުވާފައިވާ ދަރަންޏާ ބެހޭ ބިލް އަވަސް ކުރަން އަންނަ އާދިއްތަ ދުވަހު މަޖިލިހުގެ ޖަލްސާއެއް ބޭއްވުމަށް ނިންމައި އެ ދުވަހުގެ އެޖެންޑާ އާންމުކޮށްފި އެވެ.

މަޖިލިހުގެ ގަވައިދުގައި އޮންނަ ގޮތުން އާންމުކޮށް މަޖިލިސް ބާއްވަނީ ހޯމަ، އަންގާރަ އަދި ބުދަ ދުވަހު އެވެ. އާދިއްތަ ދުވަހާއި ބުރާސްފަތި ދުވަހާއި ހޮނިހިރު ދުވަސްތަކުގައި ޖަލްސާ ބާއްވަނީ ވަރަށް މުހިންމު ކަމެއް ކުރިއަށް ގެންދިއުމަށެވެ.

އާދިއްތަ ދުވަހުގެ އެޖެންޑާގައި އޮތީ ބިލާ މެދުގައި ބަހުސް ކުރުމެވެ.

ސަރުކާރުގެ ފަރާތުން އެ ބިލް މަޖިލިހަށް ހުށަހެޅުއްވީ ފުނަދޫ ދާއިރާގެ ޕީއެންސީގެ މެމްބަރު މުހައްމަދު މަމްދޫހު އެވެ. ދަރަންޏާ ބެހޭ ބިލަކީ މަޖިލީހުގެ މި ދައުރުގައި ސަރުކާރުން ހުށަހަޅަން ނިންމާފައިވާ 37 ބިލުތަކުގެ ތެރޭގައި ހިމެނޭ ބިލެކެވެ.

އެޖެންޑާގައި ދެން ހިމެނޭ ކަންކަމުގެ ތެރޭގައި ތުރުކީއަށް ރާއްޖެއިން ކަނޑައަޅާ ސަފީރު ހަމަޖެއްސުމާއި ސައުދީ އަރަބިއްޔާއަށް ކަނޑައަޅާފައި ހުންނަވާ ސަފީރު ޕާކިސްތާނުގެ ސަފީރަކަށް ބަދަލު ކުރުމަށް ރައީސް ޑރ. މުހައްމަދު މުއިއްޒު ފޮނުއްވާފައިވާ މައްސަލަ ހާރިޖީ ގުޅުންތަކުގެ ކޮމެޓީއިން ދިރާސާކޮށް ނިންމިގޮތުގެ ރިޕޯޓު ހުށަހެޅުން ހިމެނެ އެވެ.

އަދި 'ސަމާއޯ އެގްރިމަންޓު'ގައި ރާއްޖެއިން ސޮއިކުރުމާ ގުޅޭގޮތުން މަޖިލީހުގެ ރުހުން ހޯދުމަށް ރައީސް ފޮނުވައްވާފައިވާ މައްސަލަ ހާރިޖީ ގުޅުންތަކުގެ ކޮމެޓީން ދިރާސާކޮށް ނިންމިގޮތުގެ ރިޕޯޓު ހުށަހެޅުން ހިމެނެ އެވެ.