ރައްޔިތުންގެ މަޖިލިހުގެ މެމްބަރުންގެ މުސާރަ ކުޑަކުރަން ފެނިވަޑައިގަންނަވާ ކަމަށާއި އެކަމުގައި މެމްބަރުން ނަމޫނާ ދައްކަވަން ތާއީދު ކުރައްވާ ކަމުގައި މަޖިލިހުގެ މައްޗަންގޮޅި ދެކުނު ދާއިރާގެ ޕީއެންސީގެ މެމްބަރު މުސްތަފާ ހުސެއިން ރޭ ވިދާޅުވެއްޖެ އެވެ.

މިއީ 20 ވަނަ މަޖިލިހުގައި ހިމެނިވަޑައިގަންނަވާ 93 މެމްބަރުންގެ ތެރެއިން މުސާރަ ކުޑަކުރުމަށް ގޮވާލެއްވި ފުރަތަމަ މެމްބަރެވެ. މީގެކުރިން ޕީއެންސީގެ ބައެއް މެމްބަރުން ވަނީ މެމްބަރުންނަށް ލިބިވަޑައިގަންނަވާ މެޑިކަލް އިންޝުއަރެންސް މެދުކަނޑާލަން ވެސް ގޮވާލައްވައިފަ އެވެ.

މުސްތަފާ "އެކްސް" ގައި ކުރެއްވި ޕޯސްޓެއްގައި ވިދާޅުވީ ގައުމަށް ދިމާވެފައިވާ މި ދަތި ދަނޑިވަޅުގައި މެމްބަރުންގެ މުސާރަ ކުޑަކޮށް، ރައްޔިތުންނަށް ނަމޫނާ ދައްކަވަން ހުށަހަޅުއްވާ ކަމަށެވެ. އަދި އެކަމާ ގުޅޭ ގޮތުން ނަގާ ވޯޓުގައި ފެހި ބަޓަން އަށް ފިއްތާލެއްވުމަށް ތައްޔާރަށް ހުންނެވި ކަމުގައި މުސްތަފާ ވިދާޅުވި އެވެ.

ރާއްޖޭގެ އިގްތިސާދީ ހާލަތު ވަރަށް ބޮޑަށް ގޯސްވެފައިވާ އިރު، މި ހާލަތުން އަރައިގަތުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން ސިޔާސީ މަގާމުތައް މަދު ކުރުމާއި ސަރުކާރުގެ ކުންފުނިތައް ރިފޯމް ކުރުމާއި ރިކަރަންޓު ހަރަދު ކުޑަ ކުރުން ފަދަ ކަންކަން ހިމެނެ އެވެ.

ރައީސް ޑރ. މުހައްމަދު މުއިއްޒު ވަނީ ހަރަދުތައް ކުޑަކުރުމުގެ ގޮތުން މިނިވަން ދުވަހުގެ ހަރަކާތްތައް ނުބޭއްވުމަށް އަންގަވައިފަ އެވެ. އަދި މިނިވަން ދުވަސް ފާހަގަ ކުރުމަށް ހަމައެކަނި ޖަލްސާއެއް ބޭއްވުމަށް ވެސް އެމަނިކުފާނު ވަނީ އަންގަވައިފަ އެވެ.

މަޖިލިހުގެ މެމްބަރުންނަށް މަހެއްގެ މައްޗަށް 62،000ރ. އަދި ކޮމިޓީ އެލަވަންސްގެ ގޮތުގައި 20،000ރ. އާ އެކު މަހެއްގެ މައްޗަށް 82،500ރ. ލިބިވަޑައިގެންނެވި އެވެ. ނަވާރަ ވަނަ މަޖިލިހުގައި މެމްބަރުންގެ މުސާރަ ބޮޑު ކުރަން ކޮމިޓީ މަރުހަލާގައި ނިންމި އެވެ. އެކަމަކު، އާންމުންގެ ފާޑު ކިއުންތަކާ ގުޅިގެން އެ މަސައްކަތް މިހާރު ވަނީ މަޑުޖައްސާލައިފަ އެވެ.