ދައުލަތުގެ ހަރަދު ކުޑަކުރަން ފިޔަވަޅުތަކެއް އަޅަން އަންގާފައިވަނިކޮށް، ރައްޔިތުންގެ މަޖިލީހުގެ ފޭދޫ ދާއިރާގެ ކުރީގެ މެންބަރު މުހައްމަދު ނިހާދު ޓޫރިޒަމް މިނިސްޓްރީގެ ސްޓޭޓް މިނިސްޓަރުގެ މަގާމަށް އައްޔަންކޮށްފި އެވެ.

އެމްޑީޕީން ޕީއެންސީއަށް ދާދިފަހުން ބަދަލުވި ނިހާދު ސްޓޭޓް މިނިސްޓަރުގެ މަގާމަށް އައްޔަންކޮށްފައިވަނީ މިދިޔަ ހޮނިހިރު ދުވަހު އެވެ. އޭނާއަކީ އެމްޑީޕީގެ ވެރިކަން ނިމުމާއެކު، އެ ޕާޓީ ދޫކޮށް ޕީއެންސީއާ ގުޅުނު މަޖިލީހުގެ 13 މެންބަރުންގެ ތެރެއިން އެއް މެންބަރެވެ.

ސްޓޭޓް މިނިސްޓަރަކަށް މުސާރައާއި އިނާޔަތްތަކުގެ ގޮތުގައި މަހަކު 43,500ރ. ދައުލަތުގެ ބަޖެޓުން ހަރަދުކުރެ އެވެ. އެއީ އަހަރަކަށް 522،000ރ. އެވެ.

ނިހާދާ އެކު، މިހާރު ޓޫރިޒަމް މިނިސްޓްރީގައި ހަތަރު ސްޓޭޓް މިނިސްޓަރަކު ތިއްބަވާނެ އެވެ. އެއީ ނިހާދުގެ އިތުރުން މުންނިމް އަނީސް އާއި ހާރިސް މުހައްމަދާއި އަހުމަދު ނާޒިމް މުހައްމަދެވެ. މީގެ އިތުރުން އެ މިނިސްޓްރީގައި 11 ނައިބުން ތިއްބަވާ ކަމަށް އެނގިފައިވެ އެވެ.

ސިޔާސީ އިސް މަގާމުތަކަށް މީހުން އައްޔަންކުރުން މަޑުޖައްސާލާނެ ކަމަށް މި އަހަރުގެ ރިޔާސީ ބަޔާނުގައި، ފަސް މަސް ކުރިން ވެސް ރައީސް މުހައްމަދު މުއިއްޒު ވައުދުވެވަޑައިގެންނެވި އެވެ. ނަމަވެސް އޭގެފަހުން އެތައް ސިޔާސީ މުވައްޒަފުންނެއް ވަނީ އައްޔަންކުރައްވާފަ އެވެ.