ސިޔާސީ މަގާމުތަކަށް އައްޔަން ކުރާ މީހުންގެ އަދަދުތައް ވެސް ގާނޫނުން ހިފަހައްޓަން ޖެހޭ ކަމަށް ވެރިކަން ކުރާ ޕާޓީ، ޕީއެންސީގެ ނައިބު ރައީސް، އަދި ބާރަށު ދާއިރާގެ މަޖިލިސް މެންބަރު އިބްރާހިމް ޝުޖާއު ވިދާޅުވެއްޖެ އެވެ.

ޝުޖާއު މިހެން ވިދާޅުވީ މަޖިލިސް މެންބަރުންގެ އަދަދު އިތުރުވެގެންދިޔަ ނުދިނުމަށްޓަކައި އޭނާ މަޖިލީހަށް ހުށަހެޅުއްވި ގަރާރަށް ސިޔާސީ ޕާޓީތަކުގެ ހިޔާލު ހޯދުމަށް މަޖިލީހުގެ މިނިވަން މުއައްސަސާތަކުގެ ކޮމިޓީން އިއްޔެ ބޭއްވި ބައްދަލުވުމުގައި ވާހަކަ ދައްކަވަމުންނެވެ.

މި ބައްދަލުވުމުގައި ވާހަކަ ދައްކަވަމުން ޝުޖާއު ވިދާޅުވީ ދައުލަތުން މިހާރު އުފުލަންޖެހޭ މާލީ ބުރަ ކުޑަކުރުމަކީ ދައުލަތުގެ ތިން ބާރުން ވެސް ކުރަން ޖެހޭ ކަމެއް ކަމަށާއި ގާނޫނަށް އިސްލާހު ގެނެސްގެން ނަމަވެސް ރައްޔިތުންގެ މަޖިލީހުގެ މެންބަރުންގެ އަދަދު އަދި ސިޔާސީ މަގާމުތަކުގެ އަދަދު ލިމިޓް ކުރަންޖެހޭ ކަމަށް ފެންނަ ކަމަށެވެ.

އޭނާ މިހެން ވިދާޅުވީ ބައްދަލުވުމުގައި މާލީ ބުރަ އަންނަނީ ހަމައެކަނި މަޖިލީހުގެ މެންބަރުންގެ އަދަދާއި އޭގެ ހަރަދުގެ ސަބަބުންތޯ އެމްޑީޕީގެ ގަލޮޅު ދެކުނު ދާއިރާގެ މެންބަރު މިކާއިލް އަހުމަދު ނަސީމް ސުވާލު ކުރެއްވުމުންނެވެ.

ސިޔާސީ މަގާމުތައް ހިފެހެއްޓުމަށް ތާއީދު ކުރައްވާކަން ޝުޖާއު ވިދާޅުވުމުން، މީކާއިލް ވަނީ އެކަމަށް މަރުހަބާ ދަންނަވައުފަ އެވެ. އަދި ކުރިއަށް އޮތް ތަނުގައި އެފަދަ އިސްލާހުތައް މަޖިލީހަށް ހުށަހެޅުމުން ޕީއެންސީގެ އެއްބާރުލުން ލިބޭނެ ކަމަށް އުންމީދު ކުރައްވާ ކަމަށް ވެސް އޭނާ ވިދާޅުވި އެވެ.

އެ ބައްދަލުވުމުގައި އެމްޑީޕީގެ ފަރާތުން ބައިވެރިވެވަޑައިގެންނެވި އެ ޕާޓީގެ ތަރުޖަމާނު އަނަސް އަބްދުއްސައްތާރު ވިދާޅުވީ ދައުލަތުގެ މާލީ ބުރަ ކުޑަ ކުރުމަށް ސަރުކާރު ލެވެލްގައި ވެސް އެޅިދާނެ ފިޔަވަޅުތައް އެބަހުރި ކަމަށެވެ. އެ ފިޔަވަޅުތައް ނާޅައި، ކައުންސިލަރުންނާއި މަޖިލިސް މެންބަރުންގެ އަދަދު މަދު ކުރުން ހަމަ ނުޖެހޭކަން އޭނާ ފާހަގަ ކުރެއްވި އެވެ.

ރައްޔިތުންގެ މަޖިލީހުގެ މެންބަރުންގެ އަދަދު މަދުކުރުމަށް އިދިކޮޅު އެމްޑީޕީން ވެސް ވަނީ ތާއީދުކޮށްފަ އެވެ.

ދައުލަތުގެ މާލީ ބުރައިގެ ވާހަކަ ޝުޖާއު ދެއްކެވި އިރު، ރައްޔިތުންގެ މަޖިލިސްގެ މެންބަރުންގެ އަދަދާ ގުޅޭ ގޮތުން މަޖިލީހަށް ގަރާރު ހުށަހަޅުއްވަމުން އޭނާ ވަނީ ރައްޔިތުންގެ މަޖިލީހުގެ މެންބަރުންގެ މިހާރުގެ މުސާރަ އަދިވެސް ކުޑަ ކަމަށް ވިދާޅުވެފަ އެވެ. އެކަމާއި ގުޅިގެން އޭނާ އަށް ގިނަ ބައެއްގެ ފާޑުކިޔުން އަމާޒުވި އެވެ.