ބައެއް ރަށްރަށުގައި ހިންގާ ތަރައްގީގެ މަޝްރޫއުތައް ހުއްޓާލަން ސަރުކާރުން އެމްޓީސީސީއަށް އަންގައިފި އެވެ.

ކޮންސްޓްރަކްޝަން އެންޑް އިފްރާސްޓްރަކްޗާ މިނިސްޓްރީން މިއަދު އެމްޓީސީސީއަށް ފޮނުވި ސިޓީގައި ވަނީ ދައުލަތުގެ އާމްދަނީ އިތުރުކޮށް ހަރަދުތައް ކުޑަކުރުރުމަށް އަޅަން ހަމަޖެހިފައިވާ ފިޔަވަޅުތަކުގެ ތެރެއިން މި އަހަރުގެ ދައުލަތުގެ ބަޖެޓްގައި ހިމަނާފައިވާ މަޝްރޫއުތައް ރީ ޕްރިއޮޓައިޒްކޮށް ރޭޝަނަލައިޒްކޮށް މަސައްކަތްތައް ކުރިއަށްގެންދާނެ ގޮތުގެ ޕްލޭނެއް ވަނީ އެކުލަވާލައިފައި ކަމަށެވެ.

އެ މިނިސްޓްރީން ފޮނުވި ސިޓީގައި ވަނީ އެގޮތުގެމަތިން އެކުލަވާލި ލިސްޓްގެ ކޮޕީއެއް އެމްޓީސީސީއަށް ފޮނުވާފައިވާނެ ކަމަށެވެ. އަދި އެ ލިސްޓްގައިވާ މަޝްރޫއުތައް އެ މިނިސްޓްރީން ވަކިގޮތެއް އަންގަންދެން ހުއްޓާލަން ވަނީ އަންގާފަ އެވެ.

އެމްޓީސީސީއަށް އެ މިނިސްޓްރީން ފޮނުވި ލިސްޓްގައި އެކި ރަށްރަށުގައި ހިންގާ ތަރައްގީގެ 60 މަޝްރޫއެއް ހިމެނެ އެވެ.

ސަރުކާރުން މިފަދައިން އަންގާފައި ވަނީ މާލީ ހާލަތު ދަށަށްގޮސް ރައްޔިތުން ހިތިބޭސް ބޯންޖެހެންޏާ އެކަން ފިނޭންސް މިނިސްޓަރު ހާމަކުރަންޖެހޭ ކަމަށް މަޖިލީހުގެ ނައިބު ރައީސް އަހްމަދު ނާޒިމް ވިދާޅުވެފައިވާ ދަނޑިވަޅެއްގަ އެވެ.

މިކަމާ ގުޅޭގޮތުން އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބު ވިދާޅުވީ އެމްޓީސީސީއާ ވާލުކޮށްފައިވާ މަޝްރޫއުތަކުގެ ތެރެއިން އަމަލީ މަސައްކަތް ފެށިފައިވާ އެއްވެސް މަޝްރޫއެއް މަޑުޖައްސާލަން ސަރުކާރުން ނިންމާފައި ނުވާނެ ކަމަށެވެ.

" އެހެން ނަމަވެސް ސޮއިކޮށް ޢަމަލީ މަސައްކަތް ނުފެށިވާ މަޝްރޫޢުތައް މިވަގުތައް ނުފަށައި ޢަމަލީ މަސައްކަތް ފެށިފައިވާ މަޝްރޫޢުތައް ނިންމުމަށް އިސްކަން ދިނުމަށް ވާނީ ނިންމާފައެވެ. މިގޮތަށް ނިންމި މައިގަނޑު ސަބަބަކީ މަޝްރޫޢުތައް ކުރިއަށް ގެންދަން ބޭނުންވާ މިންވަރަށް ފާސްކޮށްފައިވާ 2024 ގެ ބަޖެޓުގައި ފައިސާ ހިމަނާފައިނުވުމެވެ.،" މިނިސްޓަރު ވިދާޅުވި އެވެ.