ޓްރާންސްޕޯޓް މިނިސްޓްރީގައި މައްސަލަތަކެއް އެބައުޅޭ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ވިދާޅުވެއްޖެ އެވެ.

ކުރިއަށް އޮތް ލޯކަލް ކައުންސިލް އިންތިޚާބުގައި މާލޭ ސިޓީގެ ދާއިރާތަކަށް ވާދަކުރައްވާ އެމްޑީޕީގެ ކެންޑިޑޭޓުންނާ ބައްދަލު ކުރައްވައި މިރޭ ވާހަކަފުޅު ދައްކަވަމުން ރައީސް ވިދާޅުވީ އެ މައްސަލަތަކާ ގުޅިގެން ޓްރާންސްޕޯޓް އޮތޯރިޓީގެ ގާނޫނު އުވާލަން ނިންމާފައިވާ ކަމަށް ރައީސް ވިދާޅުވި އެވެ.

ޓްރާންސްޕޯޓް އޮތޯރިޓީގެ ގާނޫނު އުވާލުމުގެ ބިލްގެ ޑްރާފްޓް އެޓާނީ ޖެނެރަލްގެ އޮފީހުން މިހާރު ވަނީ ރައީސް އޮފީހަށް ފޮނުވާފަ އެވެ.

ޓްރާންސްޕޯޓް މިނިސްޓްރީގެ ކޮރަޕްޝަން މައްސަލަތަކެއް ދާދިފަހުން ވަނީ ފެންމަތިވެފަ އެވެ. ނަމަވެސް އެ މައްސަލަތަކާ ގުޅިގެން އެއްވެސް ފިޔަވަޅެއް ރައީސް އަޅުއްވާފައެއް ނުވެ އެވެ.

ރައީސް ވިދާޅުވީ ޓްރާންސްޕޯޓް އޮތޯރިޓީގެ ގާނޫނު އުވާލައި ޓްރާންސްޕޯޓު މިނިސްޓްރީގެ އޮނިގަނޑަށް ގެނެވޭ ބަދަލުތަކާއެކު، މިނިސްޓްރީގެ ހިނގުން އަވަސްވެގެންދާނެ ކަމަށް ދެކެވަޑައިގަންނަވާ ކަމަށެވެ.

މީގެއިތުރުން ވެހިކަލް ރަޖިސްޓްރީ ކުރުމުގެ ކަންކަން ލާމަޒު ކުރަން ނިންމާފައިވާ ކަން އެމަނިކުފާނު ހާމަކުރެއްވި އެވެ.