ހިޒްބުﷲ އިން އިޒްރޭލުގެ ބަނދަރު ސިޓީއެއް ކަމަށްވާ ހައިފާއަށް ރޮކެޓް ހަމަލާތަކެއް ދީފި އެވެ.

އިޒްރޭލުގެ މީޑިއާތަކުން ބުނާ ގޮތުގައި ހައިފާގައި 10 މީހަކު ޒަހަމްވެފައިވެ އެވެ.

ލުބުނާނުގެ ވެރިރަށް ބޭރޫތުގެ ދެކުނުގައި އިޒްރޭލު ސިފައިން ހަމަލާތައް ދެމުން ދައީރު އިއްޔެ ވަނީ ގިނަ ގޮވުންތަކެއް ގޮއްވާލާފަ އެވެ. ފާއިތުވި ހަފްތާގައި އިޒްރޭލުން ދިން ހަމަލާތަކުގައި ލުބުނާނުގެ އެތައް ބަޔަކު ޝަހީދުވެ ޒަޚަމްވެފައިވެ އެވެ.

ލުބުނާނަށް އިޒްރޭލުން ދޭ ހަމަލާތައް ވަރުގަދަކުރަމުން ދާއިރު، އިއްޔެ ގާޒާގެ އުތުރުގެ ޖަބާލިއާ ރެފިއުޖީ ކޭމްޕުން އާންމުން ވަގުތުން ފޭބުމަށް އިޒްރޭލުގެ އަސްކަރިއްޔާއިން އަމުރުކޮށް، ވަނީ ބޮމުގެ ހަމަލާތަކެއް ދީފަ އެވެ. މި ހަލަތާކުގައި ޝަހީދުވި 17 މީހުންގެ ތެރޭގައި ފަލަސްތީނުގެ ނުވަ ކުޑަކުދިން ވެސް ހިމެނެ އެވެ.

ގާޒާގައި 2023 ވަނަ އަހަރުގެ އޮކްޓޯބަރު މަހުން ފެށިގެން އިޒްރޭލުން ދިން ހަމަލާތަކުގައި މިހާތަނަށް 41،870 މީހުން ޝަހީދުވެ، 97،166 މީހުން ވަނީ ޒަހަމްވެފަ އެވެ. ލުބުނާނަށް އިޒްރޭލުން ދެމުން ގެންދާ ހަމަލާތަކުގައި 2000 ވުރެ ގިނަ މީހުން ވަނީ ޝަހީދުވެފަ އެވެ.