ގިނަ ބައެއްގެ މަގުބޫލުކަން ހޯދާފައިވާ ހޮލީވުޑްގެ މަޝްހޫރު ރެޕް ލަވަކިޔުންތެރިޔާ ކާންޔޭ ވެސްޓްއަށް އަނެއްކާވެސް ގާނޫނީ ގޮންޖެހުންތަކެއް ކުރިމަތިވެއްޖެ އެވެ.

މިފަހަރު ކާންޔޭއަށް ކުރިމަތިވެފައިވަނީ އޭނާގެ އަންހެނުން ބިއަންކާ ސެންސޯރީއާއި ކުރީގެ އަންހެނުން ކިމް ކާޑޭޝަން އާއިލާގެ މެމްބަރުންނަށް ފާރަލުމުގެ ތުހުމަތެވެ.

ކާކުކަން ނޭނގޭ ފަރާތަކުން ކޯޓަށް ހުށައަޅާފައިވާ އެ މައްސަލައިގައި ބުނެފައިވަނީ ކާންޔޭގެ ފުރަތަމަ އަންހެނުން ކިމް ކާޑޭޝާންގެ އާއިލާއާއި ދެވަނަ އަނބި ބިއަންކާއަށް ފާރަލާން ޕްރައިވެޓް ޖާސޫސުންގެ ބޭނުން ކޮށްފައިވާ ކަމަށެވެ.

ކާންޔޭއަށް މަސައްކަތް ކޮށްދިން ޖާސޫސެއްގެ ގޮތުގައި ބުނާ އެ މީހާ އިތުރަށް ބުނެފައިވަނީ ކާންޔޭއަށް ކޮށްދިން މަސައްކަތުގެ ސަބަބުން އޭނާއަށް ނަފްސާނީ ގެއްލުން ވެފައިވާ ކަމަށާއި އެ މަސައްކަތަށް އޭނާ އަގުވެސް ނުދޭ ކަމަށެވެ.

މިހާރު މީޑިއާއަށް ލީކުވެފައިވާ ލިޔެކިޔުންތަކުން އެނގޭ ގޮތުގައި 2020 ވަނަ އަހަރުގެ ރިޔާސީ އިންތިހާބު ނާކާމިޔާބުވި ފަހުން އެ އިންތިހާބުގައި އޭނާއަށް މަސައްކަތް ކޮށްދިން ކެމްޕެއިން މެނޭޖަރާ ހަވާލުކުރީ ބިއަންކާއާއި ކާޑޭޝަން އާއިލާއަށް ފާރަލާށެވެ.

މި މައްސަލައިގެ ހަބަރުތައް މީޑިއާއަށް ފެތުރިފައިވާއިރު ކާންޔޭގެ ގާނޫނީ ޓީމުން މިކަމާ ބެހޭ ގޮތުން އެއްވެސް ބަހެއް އަދި ބުނެފައެއް ނުވެ އެވެ.

ކާންޔޭއާ ދެކޮޅަށް މި މައްސަލަ ހުށައެޅިފައި މިވަނީ އޭނާއާއި ބިއަންކާގެ ކައިވެނި ރޫޅިފައިވާ ކަމަށް މީޑިއާގައި ހަބަރު ފެތުރެމުން އަންނަ ދަނޑިވަޅެއްގަ އެވެ.