ވެރިކަންކުރާ ޕީއެންސީގެ ތެރޭގައި ދެ ފެކްޝަނެއް އެބައޮތް ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.

ޕީއެންއެފް އިން މިރޭ ބޭއްވި ޖަލްސާގައި ވާހަކަފުޅުދައްކަވަމުން ޔާމީން ވިދާޅުވީ ރައީސް ޑރ. މުހައްމަދު މުއިއްޒުގެ ފެކްޝަނަކާއި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲގެ ފެކްޝަނެއް އެބައޮތް ކަމަށެވެ.

ރައީސް ޔާމީން ވިދާޅުވީ މަޖިލީހުގެ ރައީސް ދިރިއުޅުއްވާ މުރައިދޫގޭގައި މަސައްކަތްކުރާ މުވައްޒަފުންގެ މައުލޫމާތު ދިނުމަކީ މަޖިލީހުގެ ރައީސަށް އޮތް ނުރައްކަލެއް ކަމަށް ކަނޑައެޅީ އަބްދުއްރަހީމް ރާއްޖޭގައި ހުންނަވަނިކޮށް ކަމަށެވެ. އެކަމަކު އޭނާ ރާއްްޖެއިން ފުރާވަޑައިގަތުމުން ރައީސް މުހައްމަދު މުއިއްޒުގެ އެންގެވުމަށް އެ ނިންމުން ބަދަލުކޮށްފައިވާ ކަމަށް ރައީސް ޔާމީން ވިދާޅުވި އެވެ.

މަޖިލީހުގެ ރައީސް ދިރިއުޅުއްވާ މުރައިދޫގެއަށް މުވައްޒަފުން ނަގާފައިވާތީ ޔާމީން ވަނީ އެކަމަށް ފާޑުވިދާޅުވެފަ އެވެ. އެމަނިކުފާނު ވިދާޅުވީ އެތަނަކީ އޮފީހެއް ނޫން ކަމަށާއި އެހެންކަމުން އެތަނަށް މުވައްޒަފުން ނަގަން ނުޖެހޭ ކަމަށެވެ.

"އަބްދުއްރަހީމްގެ ކަންތައްތައް ބަލަހައްޓަވަން އެތަނަށް އެ ލައްވާ ޚާދިމުންނަށް އަބްދުއްރަހީމް ހަރަދު ކުރައްވަން ޖެހޭނީ. އެއީ ދައުލަތުގެ ބަޖެޓުން ހަރަދު ކުރެވޭނެ ކަމެއް ނޫން،" ރައީސް ޔާމީން ވިދާޅުވި އެވެ.

ރައްޔިތުންގެ މަޖިލީހުގެ ރައީސް ދިރިއުޅޭ ތަނެއްގެ ހަރަދު ބަލަހައްޓަންޖެހޭނީ ދައުލަތުން ކަމަށް އެއްވެސް ގާނޫނެއްގައި އަދި ގަވާއިދެއްގައި ވެސް ލިޔެފައި ނޯންނާނެ ކަމަށް އެމަނިކުފާނު ވިދާޅުވި އެވެ.

ރައީސް ޔާމީން ވިދާޅުވިގޮތުގައި ކުރީގެ ރައީސް މުހައްމަދު ނަޝީދު މަޖިލީހުގެ ރައީސް ކަމުގައި ހުންނެވިއިރު ދިރިއުޅޭނެ ގެއެއް ދައުލަތުގެ ހަރަދުގައި ހަމަޖެއްސިޔަސް މަޖިލީހުގެ ރައީސް ކަމުގައިވާތީ އަބްދުއްރަހީމް ދިރިއުޅެން ދައުލަތުން ގެއެއް ހަމަޖައްސާކަށް ނުޖެހެ އެވެ.

ރައީސް ނަޝީދު ދިރިއުޅުއްވާނެ ތަނެއް ދައުލަތުގެ ހަރަދުގައި ހަމަޖައްސަން ޖެހުނީ ކުރީގެ ރައީސަކަށްވެފައި އެމަނިކުފާނަށް ދިމާވި ނުރައްކާތެރި ހާދިސާއާ ގުޅިގެން ކޮންމެހެން ސެކިއުރިޓީ ވަރުގަދަކުރަން ޖެހޭތީ ކަމަށް ރައީސް ޔާމީން ވިދާޅުވި އެވެ.

"ރައީސް ނަޝީދަކީ ހައިރިކްސް އޮންނަ ބޭފުޅެއް،" ރައީސް ޔާމީން ވިދާޅުވި އެވެ.

ރައީސް ޔާމީން މިރޭ ވަނީ ރައީސް މުއިއްޒު އަމަލުކުރައްވަމުންގެންދަވާ ބައެއް ކަންތައްތަކަށް ވަރަށް ބޮޑަށް ފާޑުވިދާޅުވެފަ އެވެ. އެގޮތުން ވެރިކަމަށް ވަޑައިގެން ފުރަތަމަ ކޮޅުގައި އިންޑިއާއަށް ބަހުގެ ހަމަލާތަކެއް ރައްދުކުރެއްވުމަށްފަހު މިއަދު "އިންޑިއާގެ އުނގަށް ވެއްޓިފައި" ވާތީ އެކަމަށް ފާޑުވިދާޅުވި އެވެ.