ޓޫރިޒަމްގެ ބޭނުމަށް ދޫކުރާ ރަށްތަކާއި ބިންތަކާއި ފަޅުތައް ޓޫރިޒަމް މިނިސްޓްރީން ކުއްޔަށް ދިނުމުގެ ކުރިން ރައީސް އޮފީހުގެ ހުއްދަ ހޯދަން ނުޖެހޭ ގޮތަށް ޓޫރިޒަމްއާ ބެހޭ ގާނޫނަށް ސަރުކާރުގެ ފަރާތުން އިސްލާހެއް ހުށަހަޅައިފި އެވެ.

މި އިސްލާހު ހުށަހަޅާފައިވަނީ ސަރުކާރުގެ ފަރާތުން މައްޗަންގޮޅި ދެކުނު ދާއިރާގެ ޕީއެންސީ މެންބަރު މުސްތަފާ ހުސައިން އެވެ. މި ބިލުގެ ފުރަތަމަ ކިޔުން އިއްޔެގެ މަޖިލިސް ޖަލްސާގައި ވަނީ އިއްވާފަ އެވެ. މިއަދުގެ ޖަލްސާގައި މި ބިލުގެ ބަހުސް ފެށުމަށް ވަނީ ތާވަލްކޮށްފަ އެވެ.

އެމްއެމްޕީއާރްސީ ހިޔާނާތާއި ގުޅިގެން ޓޫރިޒަމް ގާނޫނަށް އިސްލާހު ގެނެސް ރައީސް އޮފީހުން ހުއްދަ ހޯދަން ޖެހޭ ގޮތަށް ހެދީ ކުރީގެ ރައީސް އަބްދުﷲ ޔާމީންގެ ސަރުކާރުގައި 2016 ވަނަ އަހަރު އެވެ.

އެފަހަރު ގާނޫނަށް ގެނައި އިސްލާހުގައި ޓޫރިޒަމް ބޭނުންތަކަށް ދޫކުރާ ތަންތަނާ ބެހޭ މައުލޫމާތު ހިމެނޭ ލިސްޓެއް ޓޫރިޒަމް މިނިސްޓްރީން އާންމުކުރަން ޖެހެ އެވެ. އެ ލިސްޓް ތައްޔާރުކުރުކޮށް އުނިއިތުރު ގެނެވެނީ ރައީސް އޮފީހާއި މަޝްވަރާކޮށްގެންނެވެ.

ސަރުކާރުން މިފަހަރު ހުށަހެޅި އިސްލާހުގައިވާ ގޮތުން، އެ ލިސްޓު ހެދުމުގައި އަދި އުނިއިތުރު ގެނައުމަށްޓަކައި މަޝްވަރާ ކުރަން ޖެހެނީ ރައީސް އޮފީހުގެ ބަދަލުގައި ސީދާ ރައީސްއާ ކަމަށް ބަޔާންކޮށްފައިވެ އެވެ.

މީގެ އިތުރުން މި އިސްލާހުގައި ޓޫރިސްޓުންގެ އަތުން ނަގާ ގްރީން ޓެކްސް އަންނަ އަހަރުން ފެށިގެން ދެ ގުނަ ކުރާ ގޮތަށް ހެދުމަށް ގެންނަ އިސްލާހެވެ. އެގޮތުން ގެސްޓްހައުސްތަކުން (50 ކޮޓަރިއަށް ވުރެ މަދު) 3 ޑޮލަރުން 6 ޑޮލަރަށް ބޮޑުކުރުމާއި ރިސޯޓްތަކާއި ސިޓީ ހޮޓާ އަދި 50 ކޮޓަރިއަށް ވުރެ ގިނަ ޓޫރިސްޓުންނަށް ހިދުމަތް ދޭ ތަންތަނުން 6 ޑޮލަރުން 12 ޑޮލަރަށް ބޮޑުކުރުން ހިމެނެ އެވެ.