ގެދޮރުވެރިޔާ ސްކީމްގެ ދަށުން ފްލެޓް ލިބޭ މީހުންގެ ލިސްޓް އިއުލާން ނުކޮށް މިއަދު "ހިޔާވަހި ފައިނޭސިން ސްކީމް" ގެ ނަމުގައި ލޯން ސްކީމެއް ސަރުކާރުން ތައާރަފުކޮށްފި އެވެ.

މިއަދު ހައުސިން މިނިސްޓްރީން ބޭއްވި ރަސްމިއްޔާތެއްގައި ހިޔާވަހި ފައިނޭންސިން ސްކީމް އިފްތިތާހު ކޮށްދެއްވީ ރައީސް މުހައްމަދު މުއިއްޒު އެވެ.

ކުރީގެ ސަރުކާރުން ގެދޮރުވެރިޔާ ސްކީމުގެ ދަށުން 4000 ފްލެޓް ލިބޭ މީހުންގެ ލިސްޓް އިއުލާނުކުރުން މި ސަރުކާރުން އެކި ފަހަރުމަތިން ފަސްކޮށް، މިދިޔަ މަހު ފަހު ހަފްތާގައި ބުނެފައިވަނީ ފްލެޓް ލިސްޓް މި މަހު ދެވަނަ ހަފްތާގައި އިއުލާން ކުރެވޭނެކަމަށެވެ.

މާލެ ސަރަހައްދުން ފްލެޓް ދޫކުރުމަށް 26 ޖޫން 2022 ގައި ފަށާފައިވާ "ގެދޮރުވެރިޔާ" ސްކީމްގެ ދަށުން 15 ނޮވެމްބަރ 2023 ގައި އިއުލާނުކުރި ފްލެޓް ލިބޭ ފަރާތްތަކުގެ ދާއިމީ ލިސްޓް އެކުލަވައިލުމުގައި ކޮރަޕްޝަނަށް މަގުފަހިވާ ކަންތައްތަކެއް ހުރިކަމަށް ތުހުމަތުކޮށް، އާންމު ފަރާތްތަކުން އެންޓި ކޮރަޕްޝަން ކޮމިޝަނަށް ހުށަހަޅާފައިވާ މައްސަލައާއި ގުޅިގެން އަލުން ލިސްޓުތައް މުރާޖާއާކުރުމަށް ހައުސިން މިނިސްޓްރީން ފެށިފަހުން މިއަދާ ހަމައަށްވެސް އުޅެނީ އެމަސައްކަތް ނުނިމިގެންނެވެ.

މިއަދު ތައާރަފުކުރި "ހިޔާވަހި ފައިނޭންސް ސްކީމް: ގެ ދަށުން ގެދޮރު އިމާރާތް ކުރުމަށް ފަސް ޕަސެންޓަށްވުރެ މަތިނުވާގޮތަށް އިންޓްރެސްޓް ރޭޓްގައި ލޯނު ލިބޭނެކަމަށް ސަރުކާރުން ބުނެ އެވެ. މީ ރައީސް މުއިއްޒުގެ ވައުދުފުޅެއްކަމަށްވެސް ސަރުކާރުން ބުނެ އެވެ.

ފާހަގަކޮށްލެވޭ ގޮތުގައި މި ސަރުކާރަށް މި މަހު އަހަރުވާއިރު، އަދި މިހާތަނަށް ހައުސިން އެއްވެސް މަޝްރޫއެއް ކުރިއަށް ގެންދެވިފައިނުވެ އެވެ. އަދި ނިމިފައިހުރި ފްލެޓްތައްވެސް ހަވާލުނުކުރެވި ގިނަ ދުވަސްތަކެއް ވަމުން ދިއުމާއި ގުޅިގެން އާންމުން ދަނީ ކަންބޮޑުވުން ފާޅުކުރަމުންނެވެ. ކުރިން ރައީސް މުއިއްޒު ވިދާޅުވެފައިވަނީ ކުރީ ސަރުކާރުން ފްލެޓް ދިން އެއްވެސް މީހެއްގެ ފްލެޓް އަތުނުލާނެކަމަށެވެ. ނަމަވެސް ފްލެޓް ލިބުނު އެއްވެސް މީހަކަށް މިހާތަނަށް ފްލެޓް ހަވާލުކުރެވިފައިނުވެ އެވެ.