ކުރިއަށް އޮތް ރިޔާސީ އިންތިޚާބުގައި ވާދަކުރައްވާނެ ކަމަށާއި، އެކަމަކީ ޝައްކެތް ވެސް އޮތް ކަމެއް ނޫން ކަމަށް ކުރީގެ ރައީސް އަބްދުﷲ ޔާމީން މިއަދު ވިދާޅުވެއްޖެ އެވެ.

ރާއްޖެ ޓީވީގެ "ފަށާއިރު" ޕްރޮގްރާމްގައި ކުރިއަށް އޮތް ރިޔާސީ އިންތިޚާބުގައި ވާދަކުރައްވަފާނެތޯ ޕްރެސެންޓަރު އާމިރު ސަލީމް ސުވާލު ކުރުމުން އެންމެ ފުރަތަމަ ރައީސް ޔާމީން ވިދާޅުވީ، ކުރިއަށް އޮތް ރިޔާސީ އިންތިޚާބުގެ ކުރިން އެމަނިކުފާނު ޖަލަށް ނުލައި ހުރެދާނެތޯ އެވެ. އެކަން ފާހަގަ ކުރައްވައި ރައީސް ޔާމީން ވިދާޅުވީ ހުރިހާ އެންމެން ވެސް މަސައްކަތް ކުރަނީ އެމަނިކުފާނު ޖަލަށް ލާން ކަމަށެވެ.

މީގެ ކުރިން 2023 ވަނަ އަހަރުގެ ރިޔާސީ އިންތިހާބުގައި ވާދަކުރުމުގެ ފުރުސަތު އެމަނިކުފާނަށް ގެއްލުނީ ޖަލު ހުކުމެއްގައި ހުންނެވުމުންނެވެ. މިހާރު ހުންނެވީ ޖަލު ހުކުމުން ސަލާމަތްވެގެން ކަމަށާއި، ދެން އެކަން ނުބައި ވާން ޖެހޭ އެއްވެސް ސަބަބެއް ނެތް ކަމަށެވެ.

އެކަން ފާހަގަ ކުރައްވައި ރައީސް ޔާމީން ވިދާޅުވީ ކުރީގެ ނައިބު ރައީސް އަހުމަދު އަދީބަކީ އެމަނިކުފާނާ ދެކޮޅަށް ހެކި ބަސް ދޭ ކަމަށާއި، އޭނާ އަކީ މުރުއްވަތްތެރިކަން ގެއްލިފައިވާ ކަމަށާއި، އޭނާ އަކީ ފާސިގެއް ކަމަށް ހުރިހާ ކޯޓަކުން ވެސް ނިންމާފައިވާ މީހެއް ކަމަށެވެ. އެހެން ކަމުން އަދީބު ދައްކާ ވާހަކަ އަކީ އިތުރު ހެއްކަކާ ނުލައި ބަލައި ގަނެވޭނެ ވާހަކައެއް ނޫން ކަމަށް ވެސް ރައީސް ޔާމީން ވިދާޅުވި އެވެ. އެހެންކަމުން އެމަނިކުފާނުގެ ޝަރީއަތްތައް ގާނޫނީ ހަމަތަކުގެ މަތިން، އިންސާފުވެރިކަމާ އެކު ކުރިއަށް ގެންގޮސްފި ނަމަ، ހުކުމެއް އަންނާނެ ކަމަށް ގަބޫލު ނުކުރައްވާ ކަމަށް ރައީސް ޔާމީން ވިދާޅުވި އެވެ.

އެފަދަ ހުކުމެއް ނާންނަ ހާލަތެއްގައި ރިޔާސީ އިންތިޚާބުގައި ވާދަކުރައްވަފާނެތޯ ސުވާލު ކުރުމުން ރައީސް ޔާމީން ވިދާޅުވީ، ޝައްކެއް ވެސް ނެތް ގޮތުގައި ވާދަކުރައްވާނެ ކަމަށެވެ.

https://www.youtube.com/watch?v=YM6NFiTLffw

"އަޅުގަނޑު ކުރިމަތިލަނީ އަޅުގަނޑު ވެރިކަން ބޭނުންވެގެންނެއް ނޫން. އަޅުގަނޑު ކުރިމަތިލުމުގައި އޮތީ މައިގަނޑު ތިން ކަމެއް. އެންމެ ބޮޑު ކަމަކީ ފޯޅަވަހި ކަނޑުގެ ސަަރަހައްދު ހޯދުމާއި، އަދި ހޯދޭ ކަަމަށް ވަންޏާ ފޯޅަވަހި ހޯދުމަށް ކުރަން ޖެހޭ އެންމެހާ މަސައްކަތްތަކެއް ކުރުން،" ރައީސް ޔާމީން ވިދާޅުވި އެވެ. "މި ސަރުކާރު އެއް އަހަރު ވެގެން ދިޔައީ އިޓްލޮސްގެ ނެތް ސިޓީއެއް، ކުރީގަ ނިންމާފައި އޮތް ނިންމުން ތިމަންނަމެން އިހުތިޖާޖު ކުރަމޭ. ދެން އޮތީ އިންޑިއާ އަސްކަރިއްޔާ މިތަނުން ބޭލުން. މި ދެ ކަންތައް ޙައްލު ކުރުމަށްޓަކައި ވެސް، އަޅުގަނޑު ބޭނުންވޭ ޚިދުމުގެ ފުރުސަތު ލިބުން."

ރައީސް ޔާމީން 2013 ވަނަ އަހަރު ރާއްޖޭގެ ވެރިކަމަށް ރައީސް ޔާމީން ވަޑައިގެން، އޭގެ ފަސް އަހަރު ފަހުން 2018 ވަނަ އަހަރު އޮތް ރިޔާސީ އިންތިޚާބުގައި ދެ ވަނަ ދައުރަކަށް ވެސް ކުރިމަތިލެއްވި އެވެ. ނަމަވެސް އެ އިންތިޚާބުގައި ކުރީގެ ރައީސް އިބްރާހީމް މުހައްމަދު ސޯލިހާ ވާދަކޮށް އެމަނިކުފާނަށް ވަނީ ނާާކާމިޔާބާ ކުރިމަތިވެ ވަޑައިގެންފަ އެވެ.

އޭގެ ފަހުން މިދިޔަ އަހަރުގެ ސެޕްޓެމްބަރު މަހު އޮތް ރިޔާސީ އިންތިޚާބުގައި ވާދަކުރެއްވުމަށް ވެސް އެމަނިކުފާނު މަސައްކަތް ކުރެއްވި އެވެ. ނަމަވެސް ޖަލު ހުކުމެއް ތަންފީޒު ކުރަމުންދާތީ، އެމަނިކުފާނަށް އިންތިޚާބުގައި ވާދަ ނުކުރެވޭނެ ކަމަށް ކަނޑައެޅީ ސުޕްރީމް ކޯޓުންނެވެ. އެއާއެކު އިދިކޮޅު ކެންޑިޑޭޓެއްގެ ގޮތުގައި އެ އަހަރުގެ އިންތިޚާބުގައި ވާދަކުރެއްވީ މިހާރުގެ ރައީސް ޑރ. މުހައްމަދު މުއިއްޒު އެވެ.